Read Galela EWAIDA 16 Bible Online

EWAIDA 16 - Galela bible

EWAIDA 16

¹Ugatameja owaa duba make ibo mana wuu juwii, jaetigo-tai pituwo kedeepa eteete mana, „Ugatameja emoge dimi tapuja pituwo kede makiida tuume-uwei,” etii.

²Tijake edoga ka jaetigo-tai kidi uwijake tapuja makiida tuumai. Tijake jina tegee edojake ebijaabija migaakobe tei tita bagee maida kodaa nokii jati ewaa kai.

³Wijaago jaetigo-tai kidaa maikai duba tapuja tuumai, tijake emo kita, bokata me ka emo dani, daana maikaida ka ija agijoudo utoma bokai.

⁴Widaago jaetigo-tai kidaa tapuja oneida ma uwo momaatouda ma tuumai, tijake emo kidaa tai.

⁵Tijake uwo ipuwe ka jaetigo-tai kidi ani juwii, kei teete mana, „Akija peu eewii ko pidou pidou, Ei, tou to me, tota me, jimubeu bokouto me.

⁶Me ka jimubeu bagee ma, mana wudita bagee ma, emo kodo jauwijawita kouja, tijake emo no-tita tijake aki menii. Okeija kei tita kodo ma utuutu mana kodo.”

⁷Tijake jo-menijaida make mana wuu ani juwii, „Beu maa, e boko te boko duwa-tai me, Ugatame e bida te bida kidi, Maakodo ma, pidou pidou ma, akija peu eewii kodo.”

⁸Wiijago jaetigo-tai kidaa meuka maida tapuja tuumai, tijake me bodija ka wei kogi tijawii:

⁹Tani umina ka me wei kogi tijake Ugatame eka ewidogai, peu agijoudo maida bida jago me kidi. Okei tedemai beu tijake ibo ejaikai beu.

¹⁰Idibaago jaetigo-tai kidaa jina jegeenaka animakaida tapuja tuumai, tijake okaija jakimakita makiida bunita; me didi umina kouja okei kede eta amo duwa-no tai.

¹¹Okei Ugatame epaawado ewidogi-motii, okeija didi ma jati ma kouja, daana kei tita agijoudo tedemai beu.

¹²Benumaago jaetigo-tai kidaa tapuja ibo onee Ferat maida tuumai, tijake uwo kodo wedoke tita, awii jato ka maki jakimake-tai bagee ita jawadeete.

¹³Tijake matokaato ka peka jago jina peguuto ebeida make, daana ego jago jina ebeida make, daana puja mana pitoke-tai ebeida make nokii roh wido podomai ani dou, doge dani bukaa.

¹⁴Okei wido kede enija roh, dou beu agijoudo kei tijawii; makiida maki utoma jakimake-tai kedeepa uwigoo, japeepa kotuu etijawiine tijake, Ugatame e bida te bida kidi ibo putuuda gaa.

¹⁵„Gai, ani oma me dani bukaa mei. Ideide no! douto-tai me kidi, okaija kagaba jaki-tou to bagee, okai emi to poupoudaiga uwidoke na kojoka, daana okaija ego agijo kodo me ka jadou.”

¹⁶Tijake enija roh kedaa maki jakimake-tai bagee kotuu etijawii, Iberani manaida eka ko Harmagedon ebatitaida.

¹⁷Pituwaago jaetigo-tai kidaa tapuja wado tuumijake tai, tijake ibo mana Ugatame owaa duba make, jegeenaka animakaidaapa make, „Tiki keega” wegai.

¹⁸Tijake paijaiwakii ma, ibo ninigi ma, gekamugu ma, maki pigi umina ma, me makiida ewaa kitaida make kou dani ewaa kai beu kodaa, umina kuutakaa maki pigi kodo danite.

¹⁹Ibo maki kou ko akage wido kai, daana ojaa bagee ka ibo makijoudo bogomidaa tita; daana Ugatameja Babil peguuto ga-tou, emoge dimi uwaawe no-tijake meniine tijake.

²⁰Maikai jupi ka uwouja okogo utoma beu kidaa tai, daana bagoudo ena ma domakai beu.

²¹Tijake epa po mogo peguuto dani me maida epa maida make mijo gootita, epa po gakita udo ebijado-toojogo ko lima puluh kilo. Tijake me ka Ugatame ewidogai, epa po maida make, udo peu kouja.