Read Galela EWAIDA 17 Bible Online

EWAIDA 17 - Galela bible

EWAIDA 17

¹Tijake jaetigo-tai tapuja pituwo jago kede idaana aneepa mejake eneete mana, „Medou, mogai jago jagamo peguuto uwo wedaba maida animakita ka kodo peu kai mana kamuwakaipiga.

²Makiida maki utoma ka jakimake-tai bagee okai ma mogai tita, daana okaija mogai utaadijo ka makiida maki utoma uneune tidaa tita,” enita.

³Tijake Rohdaiga me beuda nadoke-uwii, tijake jagamo idaana dege wuwuguuto jina wado animakita ani edou, peu eka ka apumijawita; okai dagi pituwaago ma, pija gapa gaatijago ma.

⁴Jagamo kodo digijo kagaba ma dege wuwuguuto kagaba ma makijawita, daana mas ma, agakato dani mogo ma, pakooba ka ma jigijaga tita, daana ganeida mas uwaawe dokijawita, okaija mogai tei tita peudo ma nokiido ma ka ebetume.

⁵Jagamo kodo utugu jato te gaja eka ebijata: „Babil peguuto, mogai uka, daana makiida ka nokiido uka,” tita.

⁶Daana jagamo kodo emo nojake uneune ani edou; kou ko jimubeu bagee emo ma, Jesusja mana wega-tai bagee emo ma. Ani edojake ego takuu-takuu umina.

⁷Kodeja jaetigo-tai kidaa eneete mana, „Magijo ka aki ego takuu-takuu? Jagamo kodo boone-boone mana kodo epi kaawiipiga, daana edokita jina kodo mana ma, dagi pituwaago ma, pija gapa gaatijago ma kodo.

⁸Aki edooge jina kodo tota, tijake ito ko beu. Daana agaagumugu duba make wadouwe kijake peuda uwiitagi. Daana makiida ewaa awitaida make eka ajii kapogeije ebijai beu daniido kedaa jina kodo edojake ego takuu-takuu taitai, tota kodeja beu topi, daana meitagi kouja.

⁹Kiija dimi bokouto kodo beu kai peu! Dagi pituwo kei ke bago pituwo, jagamo animakitaida kodaa.

¹⁰Okei maki jakimake-tai pituwo maija; okei idibi beu kita, meena topi, tijake joko ka kidi mei beu gaa; okai mepi ki mijo gaa to tou.

¹¹Tika ka tota jina daana ito beu kijake kidi, kii ke waguwaago, pituwouda ka kidija, daana kii ke peu kaida uwii.

¹²Aki dooge ka pija gapa gaati kei ke maki jakimake-tai gaati kede, ito kou bida bokouto jaduwajawii beu bagee kodeja jina ma enaimo maki jakimake-tijake bida agijo go-motii, djam ena to.

¹³Okei dimeena to kepajawijake okeija bida agijo ma, boko duwaja kodo ma jina kodoopa to ekegajawii.

¹⁴Okei domba-Joka ma jape makiitai, tijake domba-Joka kidaa daba ejaikaitagi. Okai boko duwa-tai bagee Boko Jaduwa-jawita Me kouja, daana maki jakimake-tai bagee Ejakimakita Me. Daana eepe-tai bagee maija petee kai, kei ke manaa-tita ma, ewitokita ma, enanauto ma kede.”

¹⁵Tijake eneete mana, „Aki dooge uwo kou ko, mogai jago jagamo animakitaida kodo, kou ko me uguupuguu ma, kotuu timakitaido ma, me tuma tumaija ma, mana gimo gimouja ma.

¹⁶Tijake aki dooge pija gapa gaati ma, jina kodaa ma mogai jago jagamo kodo be egaitai; okainiinii etijawijake emi to poupou ejaikaitai; okai tine enojake bodijaida jookogaitai.

¹⁷Okaija dimi kei te-tita tijake Ugatame kidaa okeija kegepa duba kei tijawita, okei ena dimi kepajawijake jakimakita makiida jinaapa jaekegajawii kodo, Ugatameja manaido kobaitaida to.

¹⁸Aki edooge jagamo kou ko ibo makijo kodo, makiida maki utoma jakimake-tai bageido ejakimakita ka kodo.”