Read Galela EWAIDA 19 Bible Online

EWAIDA 19 - Galela bible

EWAIDA 19

¹Okai kou wadoutouga epaawado me wedaba kotuu timakita ka mana ibo dani ani juwii, kei teete mana, „Hallelujah! Ajii tai ma, ajiipi ma, bida agijoma, epauto ko iniija Ugatame kidi to.

²Okaija peu eewii kou ko maakodo ma, pidou pidou ma kouja. Ibo mogai jago kodo boko petajawita kouja, mogai ka makiida maki utoma peu eewita jagamo kodo. Tijake jakei te-tai bagee emo ko, mogai jago kodo maida abu japata.”

³Tijake wijaagouda kei teete mana, „Hallelujah! Okaija nakagi ko wado pudu pudu kii kidi imo to togoo.”

⁴Tijake iboudo me ida wii ma mepiina kede ma, ebe puu jago ida wii kede ma, mijouga kijake jegeenaka animakaida animakita Ugatame kidi migaakobe etai, kei teete mana, „Amin. Hallelujah!”

⁵Tijake jegeenaka animakaida make mana wuu juwii, kei teete mana, „Iniija Ugatame kidi muta etuwai, ei, jakei te-tai bagee utoma, ikii weda egata bagee, ibo beu, mijo beu.”

⁶Tijake me wedaba kotuu timakita kodo danite ibo mana wuu ani juwii, uwo wedaba gee dani bukaa, daana gakamugu ibo dani, kei teete mana, „Hallelujah! E boko te boko duwa-tai me, iniija Ugatame e bida te bida kidi bida peu kidi maki jakimakeegi kouja.

⁷Ideide neetijake gaida gaida neetiwei, Daana kii kidi ibo neejaikiwei, Domba-Joka waka bukii putuuda keega kouja, Daana jagamome kodaa akaato epeepi tijawita.

⁸Enauto pokade kagaba make-tijake menijawita, ataati jimubeu kidi.” Enauto pokade kagaba kou ko jimubeu bagee ka enaa kei tita manaido kodo.

⁹Tijake jaetigo-tai kidaa eneete mana, „Kii dani ebijai: Ideide no! domba-Joka waka bukijake buka naidaapa manaa-tita bagee kede.” Tijake eneete mana, „Kii ke Ugatameja mana puki.”

¹⁰Tijake okai jumaapa ani mijouga kijake migaakobe etaine, kodeja okaija eneete mana, „Kou dani ko beu kojoka! Ani na jakei te-tai kidi, aki danite, daana aki ma enakeneka bagee kede danite, Jesusja mana jakimakita bagee. Ugatame migaakobe etai. Jesus jawega-tai mana kou ko Rohdaiga wega-tai kouja.”

¹¹Tijake epaawado ka damo kebadoke tita ani dou, tijake ako kuda ewaida kai. Kii wado animakita me kidi eka ki Enanauto ma, Maakodo ma. Okai pidou pidou kidi peu eewii ma, jape makii ma.

¹²Peka ko bodija wii dani bukaa, daana dagi maida petege wedaba jawejawita. Eka ebijata meena ma epi beu, okai to epi.

¹³Emo gapi atita kagaba makita, daana eka eebatita ko, Ugatameja Tota Mana.

¹⁴Epaawado ka jape degijake kotuu timakita bageido kede ako kuda maida animakita kede eepei, enauto kagaba pokade jimubeu makijake tita.

¹⁵Ebe duba make kataana aitaato jokoutaato emuu kodo kago atii; me tuma tumaija eduwa-tita. Okai pute kopa ka ejakimakaitagi. E bida te bida Ugatameja emoge peu uta jugejake tijaida daimaitagi.

¹⁶Kagaba maida ma, muta maida ma, eka ebijata, kou ko maki jakimake-tai bagee Ejakimakita Me kidi, daana boko duwa-tai bagee Boko Jaduwajawita Me kidi.

¹⁷Tijake jaetigo-tai idaana meuka duba joonidoke ti-toojogo ani edou. Ibo mana wuu kodaa epa ma maki ma bedeidaiga patii tina teete bedoudo utoma manaa-tai, eteete mana, „Mewei, Ugatameja ibo buka naidaapa kotuu tai no!

¹⁸Maki jakimake-tai bagee tineido jano-tita, jape migougu make-tai bagee tine maija, iboudo tine maija, kuda ma okai maida animakita bagee tine maija, daana me utoma tine, ojaa beu ejakimakita bagee beu, mijo beu ibo beu.”

¹⁹Tijake ego jago jina kodo ma, makiida maki utoma jakimake-tai bageido ma, jape makiine kotuu timakita bageido ma, enaimo kotuu timakita ani edou. Kuda maida animakita kidi ma, okaija kotuu timakita bageido ma jape makiine tijake.

²⁰Tijake ego jago jina kodo ejakimakita, daana puja mana pitoke-tai kidi ma, jina jumaapa dou beu agijo kei tijawita kidi, daana jina tegee edojake ebijaabija migaakobe etita bagee puja eukita kidi. Okejai wija bodija peku duba ija kodo eemigimakita, nodogi peu nogaa ma wii te-taida kodaa.

²¹Kuda animakita ka kidi joko kaido kei kataana ka eduwajake tita; ebe duba make kago atita kataana kodaa; bedoudo utoma okeija tineido nojake mobu kai.