Read Galela EWAIDA 21 Bible Online

EWAIDA 21 - Galela bible

EWAIDA 21

¹Tijake ija ka epa ma maki ma ani dou. Edoga ka epa ma maki ma igadoke tita kouja, daana maikai na beu kita.

²Tijake jimubeu makijo, ija ka Jerusalim kodo, Ugatame epaawado make mijo meete ani dou, jagamo idaana waka akabuke tija gaa diiti diiti tija danite.

³Tijake ibo mana jegeenaka animakaida make ani juwii, kei teete mana, „Dodou, Ugatame to-taida me ma enaimo. Okai okei ma enaimo toutagi, tijake okei ke okai ipuwe uguwo kaitai, daana Ugatame kidi ootoutagi.

⁴Okeija jegeido utoma jabudijawiitagi. Okai kouda make wado bokai beu, gaagaa na beu, jege na beu, didi na beu. Tika ka agijoudo beu kidaa tita kouja.

⁵Tijake jegeenaka animakaida animakita ka kidaa wegaate mana, „Dodou, utoma agijo utoma ija to tijawii.” Daana kei teete mana, „Kii ke ebijadou: Kei manaido enanauto ma, maakodo ma mana kouja.”

⁶Tijake eneete mana, „Tiki keega! Ani ki Alif ma Ja ma, epauto ma ketagouto ma. Uwo naidi bagee kede ani gei tai uwo pidiida make uwo ojaa to no-menii.

⁷Petee kija me kidi kou mana gowaitagi. Ani okai ipuwe me kijake okai ani joka kaitagi.

⁸Kodeja weda ga-tai ma, dimi takaida ma, jimu anija ma, me wagimake-tai ma, mogai te-tai ma, kego te-tai ma, enija migaakobe te-tai ma, puja mana wegata bagee utoma okei didee ko, bodija ma nodogi peu nogaa ma wii te-tai peku kodo duba. Kou ko wijaago bokai mana kodo.”

⁹Tijake ketago ka peu pituwo awimakita tapuja pituwo jago jaetigo-tai pituwo kede idaana ka aneepa mejake mana naawegai, eneete mana, „Medodou, ebukeete jagamo kamuwakaipiga, domba-Joka waka kodo no te,” enita.

¹⁰Rohdaiga nabukijake ibo bago weja kodoopa nadokijake jimubeu makijo Jerusalim kodo epaawado Ugatameepa make mijo meete namuwakai.

¹¹Ugatameja ajiipi jago; ataati ko jegeenaka agakato dani mogo kodo dani, jasib danite, jitijouto.

¹²Eda ibo ma woja ma; damo wija ma gaatijago. Damoutoopa kodaa jaetigo-tai wija ma gaati, daana damo maida Israil epa wija ma gaati eka ugata.

¹³Awii jato uwai jato, waato jaamato damo widoudo to.

¹⁴Ibo makijo ka eda kodo kabo wija ma gaatijago, daana kou maida domba-jokaja eti-awita ida wija ma gaati kede ekaido ebijamakita.

¹⁵Ani ma mana naawegata kidi ki mas ka ebijadou kopa jago, kou makijo kodo ebijado-tita, damo kede ma, eda kodo ma.

¹⁶Ibo makijo kodo ko wouwe wakouwe ma, aiko jakai ma ena kidi. Ebijadou kopa ka ibo maki kodo ebijado-toojogo ko, dua belas ribu setadi. Woja pini wado mijo ko ena kidi to.

¹⁷Eda ebijado tijake ko gane kipo ebijado seratus empat puluh empat, me ka ebijadou kodo epeepeidaiga, kou ko jaetigo-tai kodaa.

¹⁸Eda ko jasib ka wagita, daana ibo makijo kodo mas puki, papaadou dani bukaa jitijouto.

¹⁹Ibo makijo ka eda kabo makitaido kei agakato dani mogo utoma ka diiti tijawita. Edoga ko jasib; wijaago ko nilam; widaago ko pokade akik; wiijago ko zamrud;

²⁰idibaago ko unam mogo; benumaago ko dege akik; pituwaago ko piruz; waguwaago ko arzak; ijeejago ko jakut kuning; gaatijago ko akik hidjau; ena ma gaatijago ko pusparagam; wija ma gaatijago ko martais.

²¹Damo wija ma gaati kei mutiara nipo wija ma gaati. Damo gakita ko mutiara nipoona kei tita. Ibo makijo ita kodo mas puki, papaadou danite jitijouto.

²²Ani dojake ibo makijo duba ko Ugatameja owaa dou beu; e boko te boko duwa-tai Ugatame, e bida te bida kidi, daana domba-Joka kidi maija owaa kodo kojoka.

²³Ibo makijo kodaa meuka mas agoo ma ganimake-tita beu kai peu ko beu, Ugatameja ajiipi agijo awe kodo kouja, daana lampu kodo domba-Joka kidi.

²⁴Kou aweidaiga me tuma tumaija uwina taitai; daana makiida maki utoma ka jakimake-tai bageido okeija ajiipi agijo kou duba doke-meitai.

²⁵Agapi gaa damo umina jekamai beu, daana kouda kodaa wanee beu kodaa.

²⁶Kou duba me tuma tumaija ka ajiipi ma ibo agijo ma doke-dapii taitai.

²⁷Jimu anija agijo umina wadoujo te kaita; daana nokii te-tai agijo juwa, puja wega-tai juwa, na beu; kodeja domba-Joka kidaa ajii kapogeije duba eka ebijamakita bagee kede to.