Read Galela EWAIDA 4 Bible Online

EWAIDA 4 - Galela bible

EWAIDA 4

¹Kou wadoutouga ani dojake, dododou, epaawado ka damo kebadoke dou. Tijake ani edoga kidi mana wuu juwipa kodo, mitoopi danite, ani juwii, eneete mana, „Wado medou, wadoutouga ka ewaa kaita manaido kamuwakaipiga,” enita.

²Okai kou gaa kodaa ani Roh duba kijake jegeenaka animakaida epaawado toojogo dou, daana kou maida animakita ka kidi.

³Kou maida animakita ka kidi edou ko, agakato dani mogo jasib[1] ma, akik[2] ma, dani bukaa; daana jegeenaka animakaida wajamo ka ebobimakita, zamrud[3] dani bukaa.

⁴Jegeenaka animakaida bobe kodaa joko ka animakaida wii ma mepiina, daana iboudo me ida wii ma mepiina okai kou maida animakita; pokade kagaba makita, daana dagiimouda mas petege makijake tei tita.

⁵Jegeenaka animakaida make wawakii wawakii ma, mana wuu ma, gekamugu ma podomai; daana kou jumaapa pito pituwo etakimakita; kou ko Ugatameja Roh pituwo kodo.

⁶Daana jegeenaka animakaida jokouto kodo papaadou peku dani bukaa, jitijouto. Daana jegeenaka animakaida bobe, aito amouto, wouto wakouto, ebe puu jago ida wii, aito jokouto peka jago to.

⁷Edoga ka ebe puu jago kidi singa dani bukaa; wijaago ka ebe puu jago kidi sapi dani bukaa; widaago ka ebe puu jago kidi ebepeka ko me dani bukaa; daana wiijago ka ebe puu jago kidi tuba pati-pati dani bukaa.

⁸Ebe puu jago ida wii kede nana nana aa uu benumaago, peka ka apumita, tugo jato ma, tapo jato ma; daana wanee agapi te duwajake godaate mana, „Jimubeu kidi, jimubeu kidi, jimubeu kidi, Ugatame e boko te boko duwa-tai me, E bida te bida jago kidi. Tota me, tou to, daana meitagi me kidi!”

⁹Ebe puu jago ida wii kedaa jegeenaka animakaida animakita ka imo kidi to tou me kidiipa ajiipi awija gaa kodaa, daana ibo ejaikija gaa ma, nagajaweege mana wegaja gaa ma kodaa,

¹⁰iboudo me ida wii ma mepiina kedaa jegeenaka animakaida animakita kidi jumaapa maki jato mijouga kigoo, daana ajii tai imo kidi to togoo me kidi migaakobe etigoo; jegeenaka animakaida jokouto okeija petege mijo pii atijake, godaate mana,

¹¹„Ei, Ugatame, e boko te boko nijaduwa-tai me, Ibo kajaikijake aki ajiipi ma, bida bokouto ma go-motii enaa; Utoma agijo utoma aki komogajawita kouja; Akija dimiidaiga ewaa kidaa tita, akija komogajawijake.”