Read Galela EWAIDA 5 Bible Online

EWAIDA 5 - Galela bible

EWAIDA 5

¹Jegeenaka animakaida animakita ka kidaa etikaato ganeida donimakita kapogeije ani dou. Kou duba ma tapo jato ma mana ebijamakita; daana topi atii pituwo ka topi atita.

²Tijake bida jago jaetigo-tai me kidaa mana ibo kodaa pitokeete edou, pitokeete mana, „Meija kapogeije kebajawija, daana topi atita kei ke meija gokodijawija?” wegai.

³Tijake epaawado maija, makiida maija, maki mijo maija, kapogeije kebaja me, doja me, meena ma beu.

⁴Tijake ani jege umina tigoo, kapogeije kodo kebaja me, doja me, me idaana ma edomakai beu kouja.

⁵Tijake iboudo kei me idaana ka eneete mana, „Jege te tai; edodou, Jahuda epaida ka Singa kidi, kii ke Daud Epauto kidi, petee kita, kapogeije kodo kebaja, daana topi atita pituwo kede gokodimakija.”

⁶Jegeenaka animakaida ma ebe puu jago ida wii ma utuuja, daana iboudo kede jupiida, domba-Joka idaana jooni-toojogo; edou ko wagimakita danite; pija gapa pituwo jago, daana peka pituwo; kou ko Ugatameja Roh pituwo makiida maki utomaapa ebadikumita.

⁷Domba-Joka kidi mejake jegeenaka animakaida animakita ka kidaa etikaato ganeida make kapogeije kodo motigou.

⁸Kapogeije motijake ko, ebe puu jago ida wii kedaa ma, iboudo me ida wii ma mepiina kedaa ma, domba-Joka jumaapa migaakobe etai; okei gakita tekeuga jago, daana mas tapuja unu enaa agijo awimakita; kou ko jimubeu bagee ka sembahjang manaido.

⁹Okei ija ebetaataa teete mana, „Kapogeije ko aki motijake topi atitaido gokodijawii enaa; aki kagimakita kouja, daana akija emo kodaa Ugatameja uguupuguu jaeda-motita, me epa gakita, mana gimo gakita, uguupuguu gakita, me tuma gakita maida make kodo.

¹⁰Tijake iniija Ugatame jumaapa jakimakita makiida ka imam eewita; okei bida peu kidi makiida maki utoma boko duwajawiitai.”

¹¹Tijake ani dojake jaetigo-tai bagee wedaba jegeenaka animakaida bobe mana wuu ani juwii; daana ebe puu jago kede ma, iboudo ma; okei umina kidi te gakimake[4]

¹²kuutakaa godaate mana, „Wagimakita domba-Joka kidi bida agijo gou enaa, tonawi kai na, dimi boko gou na, petee kai na, ibo ejaikai na, ajiipi gou na, muta etuwai na.”

¹³Tijake utoma agijo epaawado ma, makiida ma, maki mijo ma, maikaida ma, daana kei duba ka utoma kede ani juwii, godaate mana, „Jegeenaka animakaida animakita ka kidi, daana domba-Joka kidi muta etuwai ma, ibo ejaikai ma; daana ajiipi ma, bida bokouto ma, okejai ipuwe to kii kidi imo to togoo!”

¹⁴Tijake ebe puu jago ida wii kede „Amin” wegai, daana iboudo kede mijouga kijake migaakobe etai.