Read Galela EWAIDA 7 Bible Online

EWAIDA 7 - Galela bible

EWAIDA 7

¹Okai kou wadoutouga jaetigo-tai ida wii ani edou, maki butu wii jatouga jooni-toojogo; okei makiida ka ukija epauto wii kede jamo jakimakai, makiida juwa, maikaida juwa, pija uteena maida juwa, ukija pupugu te te-tita.

²Tijake joko ka jaetigo-tai me awii jato make wado meete ani edou, ajii bokouto jago Ugatameja tegee edou dokijake, daana maki ma, maikai ma peu awe-tita bida jago jaetigo-tai ida wii kedeepa

³wuu eteete mana, „Maki juwa, maikai juwa, pijaido juwa peepu te tijawii, inii Ugatame jakei te-tai bagee kede utugu maida tegee edojawiitageida to.”

⁴Tijake tegee edota bagee kede gakijake ani juwii, seratus empat puluh empat ribu, Israil epa gakita ka kede.

⁵Kou ko, Jahuda epaida ka dua belas ribu tegee edota; Rubin epaida ka dua belas ribu; Gad epaida ka dua belas ribu;

⁶Asjir epaida ka dua belas ribu; Naftali epaida ka dua belas ribu; Manasseh epaida ka dua belas ribu;

⁷Simeon epaida ka dua belas ribu; Lewi epaida ka dua belas ribu; Issachar epaida ka dua belas ribu;

⁸Zebulon epaida ka dua belas ribu; Jusuf epaida ka dua belas ribu; Benjamin epaida ka dua belas ribu tegee edota.

⁹Okai kou wadoutouga ani dojake, ibo kotoona, me idaana ka ma te egakimake, me tuma gakita ka kede, daana me epa gakita, me uguupuguu gakita, mana gimo gakita ka kede; okei jegeenaka animakaida jumaapa daana domba-Joka jumaapa jooni-toojogo; okei pokade kagaba woja makijawita, daana eke ije dani ganeida doki-toojogo.

¹⁰Okei ibo mana emeeme teete, „Ajii bokouto iniija Ugatame epauto, jegeenaka animakaida animakita ka kidi, daana domba-Joka epauto!”

¹¹Tijake jaetigo-tai bagee utoma jegeenaka animakaida bobe jooni-toojogo, daana ebe puu jago ida wii ma, iboudo ma bobe, daana jegeenaka animakaida jumaapa mijouga kijake Ugatame migaakobe

¹²eteete mana, „Amin. Iniija Ugatame muta etuwai; ajiipi ma, dimi boko ma, nagajaweege mana ma, ibo ejaikai ma, bida bokouto ma, petee ma okai ipuwe to kii kidi imo to togoo. Amin.”

¹³Tijake iboudo ka idaana mana naawegajake eneete mana, „Kei ke meima? pokade kagaba makijawita ka kede, daana kaija make meta?” nagaado tita.

¹⁴Tijake anija eteete mana, „Ei, Ibo, aki to epi.” Etijake eneete mana, „Kei ke tetepepe peijo duba make podomita bagee; okeija kagaba kodo domba-Joka emo kodaa witogimakijake pokade awita.

¹⁵Okai kouja okei Ugatame jegeenaka animakaida jumaapa tou, daana okaija owaa duba wanee agapi jakei tigoo; jegeenaka animakaida animakita ka kidaa ewatijawiitagi.

¹⁶Okei naidi juwa, jowee juwa, wado te gaitai; meuka tani ka te wagiita, daana tedii na beu.

¹⁷Domba-Joka jegeenaka animakaida jupiida kodaa ootoutagi kouja; okai gei uwo puduudaapa ouwiitagi; daana Ugatame kidaa okeija jegeido utoma jabudijawiitagi.