Read Galela EWAIDA 9 Bible Online

EWAIDA 9 - Galela bible

EWAIDA 9

¹Idibaago jaetigo-tai kidaa mitoopi ewijake ijapu kato epa maida make makiida gootidoke ani dou, daana agaagumugu peguuto damo kebajawe-tai agijo menijawita.

²Okai agaagumugu damo kebajawijake ko ibo bodija dani ka nakagi wadouwe kai, daana meuka ma pá kodo ma dipumidoke tai, agaagumugu kodaa nakagi kouja.

³Tijake nakagi kodo duba make waine makiida mei, daana bida agijo menita, makiida ka kaladjengking[7] ka bida agijo dani.

⁴Tijake okei makiida ka ija boudo peu taawe-tijake etimakita, daana ejata agijoudo juwa, pija uti juwa, kodeja me tumaija to, Ugatameja utugu maida tegee edojawii beu daniido.

⁵Agoo idibi me peepu ete-tita ejaikita, kodeja wagimakai beu, daana okeija ka tedii ko kaladjengking ka tedii dani bukaa, me enokogi-toojogo ko.

⁶Okai kou gaa kodo me bokaine ubaitai, kodeja te bokai. Okei bokai ide gaitai, kodeja boka ko okeepa make beu kaita.

⁷Waine epoo ko kuda japeepa uwiine jato dani bukaa; dagi maida mas petege dani bukaa; daana ebepeka ko me ebepeka dani bukaa.

⁸Ijo ko jagamo ka ijo dani bukaa, daana ego ko singa ka ego dani.

⁹Boko ko pute toopu dani, daana aa uu gedu ko kuda koma wedaba ena gaa to japeepa tibigi uwija dani bukaa.

¹⁰Puga ko kaladjengking puga dani, nokoge-tai jago, daana agoo idibi me tedii tijawii bida agijo kou ko puga duba.

¹¹Etimake-tai kidi agaagumugu jaetigo-tai kidi; Iberani manaidaiga eka ki Abbaddon, daana Gerika manaidaiga ko Apollion.

¹²Edoga ka peu agijo kodo wokaato kidoke. Dodou, peu agijo wija potu taineegai.

¹³Benumaago jaetigo-tai kidaa mitoopi ewijake ko, Ugatame jumaapa ka mas jo-menijaida ka butu wii jato make mana wuu ani juwii;

¹⁴benumaago jaetigo-tai mitoopi jakita ka kidiipa eteete mana, „Ibo onee, kou ko Ferat onee jato egadimimakita jaetigo-tai ida wii kede eekegajawii,” etii.

¹⁵Tijake jaetigo-tai ida wii kede eekegajawii. Okai kou gaa kodo, kou naago kodo, kou agouda kodo, kou taun kodo maida make epeepi timakita, me tumaija widaago kabuuda wagimaketita.

¹⁶Kuda animakita ka kede dua laksa laksa. Egakimakita mana kodo ani juwii.

¹⁷Ani dotaida kodaa kuda kede, daana kou maida animakita bagee kede edou ko, kou dani: Toopu pute bodija dani boko maida makita, daana digijo ma, dege ma. Kuda migo ko singa migo dani bukaa; daana ebe duba make bodija ma, nakagi ma, peu nogaa[8] ma podomai.

¹⁸Kei peu boko wido kouja me jokaija widaago kabuuda bokai, bodija ka ma, nakagi ka ma, peu nogaa ka ma, okeija ebeida make podomita ka kodo.

¹⁹Kei kuda ka bida agijo ko ebe duba ma puga duba ma kouja; puga ko ugenija dani bukaa, migo jago, daana okai kouja me jati ewajake tai.

²⁰Daana joko ka bageido kei, kou peu agijo wido ka wagimakai beu daniija, okeija ka gane ka peu kei te-tai maida make tedemai beu. Daana enija ma ebijaabija ma, kou ko mas ka ma perak ka ma, pute ka ma, mogo ka ma, pija ka ma, kei ke dou juwa, juwii juwa, uwina tai juwa, beu agijoudo migaakobe tei tita kodo maida make tedemai beu.

²¹Daana me wagimake-tai ma, kego ma, mogai ma, oma ma, tedemai be.