Read Gangte THILSIEMBUL 1 Bible Online

THILSIEMBUL 1 - Gangte bible

THILSIEMBUL 1

¹Atûng in Pathien in lei leh vante a siem a,

²Lei chuh guong bei leh a hawm mai ahi a; tui thuk tak chung achun thimna a um a: Pathien Thagau chun tui chung chuh a awp zing a.

³Chun, Pathien in, “Vak hung um hen,” a ti a, tichun vak a hung um ta a.

⁴Chun, Pathien in vak chuh a en a, pha a sa a; tichun Pathien in vak leh thim chuh a khen ta a.

⁵Chun, Pathien in vak chuh “Sun” a vawh a, thim chuh “Zan” a vawh a. Tichun nitâk a hung hi a, zingkal a hung hi kit a, a ni khatna chuh.

⁶Chun, Pathien in, “Tui leh tui kikalhaw achun vanthamzawl zatak um hen la, zie chun tui leh tui haw chuh khendang hen,” a ti a.

⁷Tichun, Pathien in vanthamzawl chuh a siem a, vanthamzawl nuoia tui haw leh vanthamzawl chunga tui haw chuh a khen ta a: khutibang chuh a hung hi ta a.

⁸Pathien in vanthamzawl chuh “Van” a vawh a. Tichun, nitâk a hung hi a, zingkal a hung hi kit a, a ni nihna chuh.

⁹Chun, Pathien in, “Van nuoia tui haw chuh mun khat ah kigawm khawm hen la, lei hul hung lang hen,” a ti a; tichun, khutibang chuh a hung hi ta a.

¹⁰Pathien in lei hul chuh “Lei” a vawh a; tui um khawm haw chuh Tuisuohgiet haw a vawh a; chun, Pathien in zie chuh a en a, pha a sa mah mah a.

¹¹Chun, Pathien in, “Lei chun hampahaw, thaichi nei haw, theikung, leia amau haw chi umdan ding banga gah leh a gah sunga chi um haw chuh sepdawk hen,” a ti a; tichun, khutibang chuh a hung hi ta a.

¹²Tichun, lei chun hampahaw leh thaichi amau umdan ding banga chi nei haw, thing amau haw chi umdan ding banga gah, a gah sunga chi um haw chuh a sepdawk ta a; Pathien in a en a pha a sa a.

¹³Tichun nitâk a hung hi a, zingkal ahung hi kit a, a ni thumna chuh.

¹⁴Chun, Pathien in, “Sun leh zan khenna dingin vanthamzawl akhun vak haw um u hen la, ziehaw chuh melchikna haw, hunbi haw, nihaw, kum haw hetna ding hiu henla,

¹⁵lei chung salhvak dingin vanthamzawl akhun vakna pie dingin um u hen,” a ti a: tichun khutibang chuh a hung hi ta a.

¹⁶Tichun Pathien in vak lopitak nih a siem ta a; vak lopizaw chuh sun a vaihawm ding leh, vak lopi lo zaw chuh zan a vaihawm dingin a siem a, aksihaw le a siem hi.

¹⁷Pathien in ziehaw chuh lei chung salhvak ding leh,

¹⁸suna vak ding leh zan a vak dingin leh thim leh vak khen dingin vanthamzawl achun a kawih ta a: tichun, Pathien in zie chuh a en a, pha a sa a.

¹⁹Tichun nitâk a hung hi a, zingkal a hung hi kit a, a ni lina chuh.

²⁰Chun, Pathien in, “Tui haw chun thilsiem tawithei hinna nei tamtak hun sepdawk sak hen la, vacha haw le vanthamzawl achun leng u hen,” a ti a.

²¹Tichun Pathien in tuisuohgiet a ngapi lientak haw chuh a siem a, thilhing tawithei tincheng, tui in chi chuom chuom a sep dawk haw chuh, amau haw chi umdan bang chietin a siem a, vacha tha nei tincheng le amau haw chi umdan bang chietin a siem a: Pathien in zie chuh a en a, pha a sa mah mah a.

²²Chun, Pathien in, “Chi tamtak suoh in hung pung unla, tuisuohgiet tui haw hi luoh dim un, vachate le lei ahin hung pung u hen,” ti’n vang a pie a.

²³Tichun nitâk a hung hi a, zingkal a hung hi kit a, a ni nga na chuh.

²⁴Chun, Pathien in, “Lei chun thilhing amau haw chi umdan ding bang chietin, gancha haw, ganhing haw, gamsa haw amau haw chi umdan ding bang chietin pawtsak u hen,” a ti a: tichun khutibang chuh a hung hi ta a.

²⁵Tichun Pathien in gamsa amau haw chi umdan ding bang chietin, leia bawk vak chengcheng te amau haw chi umdan ding bang chietin a siem a: Pathien in zie chuh a en a, pha a sa a.

²⁶Chun, Pathien in, “Hung tiem u! ei uh mellepâng pu’n, ei u bang bang in mihiem siem hitiu, amau chuh tuisuohgiet a ngahaw chung leh, chung leng vacha haw chung leh, gancha haw chung leh lei chung chengcheng leh, ganhing leia bawk vak chengcheng te chung achun thu neih sak hitiu,” a ti a.

²⁷Tichun Pathien in amah melpu’n mihiem a siem a, Pathien lim bang ngêi in ahi a siem chuh. Amau chuh numei leh pasal in a siem hi.

²⁸Chun, Pathien in amau chuh a vangsak a: Pathien mah in a kawm u ah, “Chi tamtak sep a hung pung in, lei hi luoh dim un la, na thu thuu in um sak un: tuisuohgiet a nga chunghaw leh, chung leng vacha chung leh, thilhing leia bawkvak chengcheng te chung achun le thu nei un,” a ti a.

²⁹Chun, Pathien mah in, “Ngaiun, lei chung chengcheng a thaichi nei um tincheng leh thing tincheng, thinggah nei chi umna haw chuh na an dingun ka hun piei.

³⁰Chun, leia sa tincheng kawm leh chung leng vacha tincheng leh ganhing leia bawka vak, hinna nei bawkvak tin chengte kawmah a an dingun hampa chitin ka piei,” a ti a: tichun khutibang chuh a hung hi ta a.

³¹Tichun, Pathien in a thilsiem tincheng chuh a en a, ngaiin, pha a sa mah mah a. Tichun nitâk a hung hi a, zingkal a hung hi kit a, a ni gupna chuh.