Read Gangte THILSIEMBUL 11 Bible Online

THILSIEMBUL 11 - Gangte bible

THILSIEMBUL 11

¹Chun, lei a mi chengcheng chuh pau khat leh thugen dan kibang ahi chiet u a.

²Chun, hiti hi ahi a, suohlam zuona a kichawn zel lai u chun Shinar gam ah phaicham khat a muu a; zie tak achun a cheng tau a.

³Tichun, amau chun, “Hung tiem u, chêk siem hiting un, pha tak in hâl hitiu,” a kitiu a. Tichun suong thasang in chêk a mang u a, a châlna dingin thingnai a mang u a.

⁴“Khai, hung tiem u, khawpi kisiem hiting un, insang a sip in van supha hiel dingin sai ting un, I min uh suthang hitiu; khutilochun lei chung pumpi ahin thehzak in um khâi tiu,” a kitiu a.

⁵Chun, LALPA chuh mihiem chate’n khawpi leh insang a sak u chuh en dingin a hungsuk a,

⁶LALPA chun, “Ngaitiem u, mihiemte hi pumkhat ahiu a, a bawn un pau khatin a pau ngâl u a, ziehi ahi thil ahih pat nau chuh, tuhin chuh a thil guot hawu mawngmawng hi khapsak guol hita lo ding ahi.

⁷Hung tiem u, chieh hiting un, pau a kihettuoh lohna dingun zie tak a khun a pau uh va sukbuoi sak hitiu,” a ti a.

⁸Khutichun LALPA’n amau haw chuh zie akipat chun lei chung chengcheng achun a thehzak ta a; tichun a khawpi sak u chuh a haihsan tau hi.

⁹Zieziekchun a min chuh Babel a tiu hi; zie tak achun LALPA’n leia mi chengcheng pau chuh a sukzatchuom tâk ziekin; zie apat chun amau haw chuh lei chung chengcheng achun a kithehdalh tau hi.

¹⁰Ziehaw hi Shem suonte chuh ahiu hi. Shem chuh kum za mi ahi a, tuilet nung kum nih zawhin chapa Arpaksad a nei a;

¹¹Arpaksad a neih nung chun Shem chuh kum zanga a dam a, chanu leh chapate a nei kit a.

¹²Chun, Arpaksad chuh kum sawmthum leh nga a hihin chapa Selah a nei a:

¹³Selah a neih nung chun Arpaksad chuh kum zali leh thum a dam a, chanu leh chapate a nei kit a.

¹⁴Chun, Selah chun kum sawmthum a hihin chapa Eber a nei a;

¹⁵Eber a neih nung chun Selah chuh kum zali leh thum a dam nalai a, chanu leh chapate a neih beh kit a.

¹⁶Eber chuh kum sawmthum leh kum li a hihin chapa Peleg a nei a;

¹⁷Peleg a neih nung chun Eber chuh kum zali leh sawmthum a dam nalai a. chanu leh chapate le a nei kit hi.

¹⁸Peleg chuh kum sawmthum a hihin chapa Reu a nei a;

¹⁹Reu a neih nung chun Peleg chuh kum zanih leh kuo a dam nalai a, chanu leh chapate le a nei kit hi.

²⁰Chun, Reu chun kum sawmthum leh nih a hihin chapa Serug a nei a;

²¹Serug a neih nung chun Reu chuh kum zanih leh sagih a dam nalai a, chanu leh chapate le a nei kit hi.

²²Serug chuh kum sawmthum a hih in chapa Nahor a nei a:

²³chun, Nahor a neih nung chun Serug chuh kum zanih a dam nalai a, chanu leh chapate le a nei kit hi.

²⁴Chun, Nahor chuh kum sawmnih leh kum kuo a hihin chapa Terah a nei a;

²⁵Chun, Terah a neih nung chun Nahor chuh kum zakhat leh kum sawm le kuo a dam nalai a, chanu leh chapate le a nei kit a.

²⁶Terah chuh kum sawmsagih ahih in chapa Abram, Nahor leh Haran te a nei hi.

²⁷Ziehaw hi Terah suonte chuh ahiu hi: Terah chun chapa Abram, Nahor leh Haran a hing a, chun, Haran chuh Lot pa ahi.

²⁸Chun, Haran chuh a pienna Kaldai gama Ur khuo ah, a pa Terah masangah a thi a.

²⁹Chun, Abram leh Nahor chun zi a nei u a; Abram zi min chuh Sarai ahi a; Nahor zi chuh Haran chanu Milkah ahi a, Haran chuh Milkah pa leh Iskah pa chuh ahi.

³⁰Chun, Sarai chuh a chîng a, cha himhim a nei puoi.

³¹Chun, Terah chun a chapa Abram leh a chapa-cha, Haran chapa Lot tawh a chapa Abram zi, a monu Sarai te chuh a pui a; Kanaan gama chieh dingin Kaldai te khuo Ur apat chun a pawt khawm tau a; chun, Haran khuo a hung tung u a, tak achun a cheng tau hi.

³²Chun, Terah damsung chuh kum zanih leh nga ahi a, tichun, Terah chuh Haran achun a thi tai.