Read Gangte THILSIEMBUL 12 Bible Online

THILSIEMBUL 12 - Gangte bible

THILSIEMBUL 12

¹Chun, LALPA’n Abram kawm achun, “Na khuo leh na inkuonpihte leh na pa in apat in pawt inla, gam ka hun etsakna ding lam achun chieh ah:

²tichun nam lopi takin hun siem ing ka ting, chun, hun vangsak ing ka; na min sulopi’ng ka ting, chun, nang vangsakna hung hi’n la:

³Nang hun vangsakte chuh vangsak ing ka ting, hansie hun lawh ta chuh hansie lawh ing ka: chun, nang achun lei a nam cheng hi vangsak in um in au,” a ti a.

⁴Chun, Abram chuh kum sawmsagih leh nga a hih in, LALPA’n a kawma a gen guol khan Haran apat chun a pawt ta a; Lot inle a zui a.

⁵Chun, Abram chun a zi Sarai leh a suohpihpa chapa Lot leh, a sum neih chengcheng tawh, Haran khuo a a suok neihteu chuh a pui a; Kanaan gama chieh dingin a kipan dawk tau hi; Kanaan gam chuh a tun phet u chun.

⁶Abram chun zie gam chengcheng chuh a tawh viel a, Sekem muna Moreh a gangpi thing tieng chun a chieh zel a. Zielai chun Kanaan mite chuh zie gam achun a cheng nalai u a.

⁷LALPA chuh Abram kawmah a kilak a, “Zie gam hi na suon te kawmah pie’ng ka,” a ti a: tichun zie tak achun a kawma kilak LALPA a ding chun maichâm a siem tai.

⁸Chun, zie nung chun simlam a Bethel suohlam pang achun a kichawn a, thanglam panga Bethel leh suohlam panga Ai kikal achun puon-In a zak a. Zie tak achun maichâm a siem a, Pathien a sam ta a.

⁹Abram chuh simlam a Negev zuonin a kichawn zel ta a.

¹⁰Chun, Kanaan gam achun kiel a kie ta a: zie gama kiel chuh a huoisiet bêk ziekin Abram chuh Aigupta gama chawmkhat cheng dingin a chieh suk ta a.

¹¹Chun, hiti hi ahi a, Aigupta gam a lut ding kuon u chun, a zi Sarai kawm achun, Ngaitie, numei melhawih tak na hi tih ka hêi;

¹²Aigupta mite’n a hun muh tieng u leh, “Ziehi a zi ahi hi,” tiu intin, chun, kei hi ei that untin, nang vang chuh hun hinghawih in au.

¹³Nang vanga bit taka ka um a, nang zâla ka hin theihna dingin “A suohpihnu ka hi; lungsiet takin ti zel ah aw” a ti a.

¹⁴Chun, hiti hi ahi a, Abram chuh Aigupta gama a lut phetin Aigupta mite chun numei chuh a muu a; melhawih a sa mah mah u a.

¹⁵Chun, Pharaoh milien te’n le a muu a, Pharaoh kawmah a phatzie a gen u a; tichun numei chuh Pharaoh In ah a puilut u a.

¹⁶Chun, amah chun Sarai ziek chun Abram chuh pha tak in a bawl a: tichun belamte, bâwngchalte, sabiltungchalte, suoknu leh suokpa te sabiltung nute, sangawngsaute a neih lawh ta a.

¹⁷Chun, LALPA’n Abram zi Sarai ziek chun Pharaoh leh a inkuonpihte chuh natna hi lauh-um takin a gawt ta a.

¹⁸Ziephet chun, Pharaoh chun Abram a sama, “Ka chunga na thilhih hi bangti dân ahi? Bang dinga na zi ahih nei hilh loh a?

¹⁹Bang dinga ‘Ka suohpihnu ahi,’ na tih a? Zieziekchun apuo zi a ka na neih hiel tâk chuh: awle, en in, na zi hih, kipuih inla, chiehmang kêi ah,” a ti a.

²⁰Tichun, Pharaoh chun a chungchâng thu achun mite kawmah thu a pie a, tichun amah chuh a zi leh a neih chengcheng tawh a sawldawk tau hi.