Read Gangte THILSIEMBUL 13 Bible Online

THILSIEMBUL 13 - Gangte bible

THILSIEMBUL 13

¹Khutichun, Abram chuh Aigupta gam apat chun a pawt a, Kanaan simlam achun a zi tawh, a neih chengcheng tawh a chieh ta a. Lot inle a zuia

²Tichun, Abram chuh ganguolte, dangka leh sana te’n a hausa mah mah a.

³Simlam gam apat chun Bethel lam zuonin a chieh zela, Bethel leh Ai kikala puon-In a zakna mun kha a tunga,

⁴Tichun, maichâm a siemna mun ngêi akhan Abram chun LALPA chuh a sam ta a.

⁵Chun, Abram tawh kitawn Lot ngêi khan le, belam guolhaw, bâwngguol haw, inkuon leh suokte leh puon-In haw a nei a.

⁶Ganguol tamtak a neih gel ziekun, a chenkhawmna dingun gam chuh a kiting ta puoh a.

⁷Tichun, Abram ganchingte leh Lot ganchingte kal achun kinielna a hung pawt ta a: zielai chun Kanaan te leh Periz mite chuh zie gam achun a um u a.

⁸Tichun, Abram chun Lot kawmah, “Nang leh kei kikal leh na ganchingte leh ka ganchingte kikal ahin kinakna um kihen ti’n ka hun ngên hi; unau-pachan I hi ngâl a.

⁹Gam chuh a pum in a um diei duoi hilo ahim? Kei apat a um chuom dingin ka hun ngên hi: veilam a na kihei leh kei changlam ah kihei ing ka ting; changlama na kihei leh kei veilam ah kihei ing ka,” a ti a:

¹⁰Tichun Lot chuh Zoar khuo lam nga’n a dâk dawk a, Jordan phaicham chengcheng chuh LALPA huon tawbang, Aigupta gam bang khan gam hing diei duoi, tui tampi umna mun ahi tih a mu ta a LALPA’n Sodom leh Gomorra khuo a suksiet masang khah ahi ngâla.

¹¹Khutichun Lot chun Jordan phaicham chengcheng chuh a têl a; suohlam achun a kichawn a, tichun a kikhen tau hi.

¹²Chun, Abram chuh Kanaan gam achun a um a, Lot chuh phaicham khuo haw achun a um a, a puon-In chuh Sodom khuo tiengin a chawn zel a.

¹³Sodom mite chuh LALPA mitmuh in huoisie taka nunsie leh migilo ahiu hi.

¹⁴Chun, a kawm apat a Lot a chiehdawk nung chun, LALPA’n Abram kawmah, “Khawdak inla, na umna apat khan mâllam te, simlam te, suohlam te, tumlam te en in:

¹⁵gam na muh chengcheng hih nang leh na suonte kawmah kumkhuo a dingin hun pie ding ka hi.

¹⁶Chun, na suonte chuh leia leivui bang mai in siem ing ka ting; min leia leivui hi a simsen u chun, na suonte le simsen hi’n au.

¹⁷Kipan inla, gam hi a dung avai tawh suok ah; hun pie ding ka hi,” a ti a.

¹⁸Tichun, Abram chun a puon-In chuh a chawn a, Hebron a um Mamre a gangpi kienghaw achun a va cheng a, zie tak achun LALPA dingin maichâm a siem ta a.