Read Gangte THILSIEMBUL 14 Bible Online

THILSIEMBUL 14 - Gangte bible

THILSIEMBUL 14

¹Chun, Shinar leng Amraphel, Ellasar leng Ariok, Elam leng Kedorlaomer, Goiim leng Tidal te damlai chun hiti hi a hung hi a.

²amau chun Sodom leng Bela chuh a do u a, Gomorra leng Birsha, Admah leng Shinab, Zeboiim leng Shemeber, leh Bela leng te chu le a do u a (Bela chuh Zoar ahi).

³Zie leng ngate chuh Siddim phaicham ah a pang khawm u a (zie phaicham chuh Tuisuohgiet Al hi ahi tai),

⁴kum sawm leh kum nih sung Kedorlaomer nuoi ah a um u a, a kum sawm leh thumna achun a kiphin tau a.

⁵Tichun a kum sawm leh lina achun Kedorlaomer leh a pankhawmpih leng haw leh a sepaihteu chuh a hung u a, Ashteroth Karnaim khuo ah Rephraim haw chuh a that u a. Ham khuo a Zuzim haw leh Kiriathaim phaizawl a Emim te chu le a that u a,

⁶A umnau Seir tângah, Elparan chanin Hor mite chuh a that u a (El-paran chuh thalek tawh kigamgi ahi).

⁷Tichun a vaikit u a, En-mispat a tung u a zie chuh Kadesh ahi Amalek mite gam chengcheng leh. Amor te, Hazazon-tamar khuo a umte chu le a that u a.

⁸Tichun Sodom leng, Gomorra leng, Admah leng, Zeboiim leng leh Bela lengte chun Siddim luiphai achun kido dingin a sepaihteu a pui u a;

⁹Elam leng Kedorlaomer, Goiim leng Tidal, Shinar leng Amraphel, Ellasar leng Ariok te chuh do dingin, leng li’n leng nga a do u a.

¹⁰Chun, Siddim guom chuh thingnai khuk in a dim a, Sodom leh Gomorra lengte chuh kidona apat a taihmang a guot lai un zie khuk achun a kie tau a, leng dang te chuh tâng gam ah a taimang tau hi.

¹¹Tichun Sodom leh Gomorra mite sum chengcheng leh a nek ding chengcheng uh a lau a, a chieh tau a.

¹²Sodom khuo a Abram suohpihpa chapa Lot chule a neihlelam cheng tawh a pui tau hi.

¹³Himahleh a suokcha laka khat chun Hebrai mi Abram chuh a va hilh a: amah chuh Amor mi Mamre a gangpi thing kieng a cheng ahi. Mamre chuh Askol suohpih leh Aner suohpih ahi a; ziehaw chuh Abram tawh pangkhawm ahiu hi.

¹⁴Abram in a suohpihpa chapa chuh salin a pui ui tih a het phet chun, a In a pieng amah hilh thiemsa mi zathum leh sawm leh giet a pui a, Dan khuo chanin a delh tau a.

¹⁵Zan lai chun amau do ding chun a suokte leh amah chuh a kikhenzak u a, amau haw chuh a that u a, Hoba khuo chanin a delh u a Hoba chuh Damaska khuo mâllam ah a um ahi.

¹⁶Chun, gâllâk thil chengcheng chuh a la kit vek tau a. A suohpihpa chapa Lot leh a thil neih chengcheng leh numei chengcheng leh sala a matteu cheng chu tawh a la kit vek tau hi.

¹⁷Chun, Kedorlaomer leh a kawma leng um haw that a a vaihkit nung chun Sodom leng chuh Shave guom achun Abram muok dingin a pawt a (Shave guom chuh leng guom ahi tai).

¹⁸Chun, Salem leng Melkisedek, Pathien Chungnung pên Thiempu chun Abram kawm achun chângthâk leh uain a hun chawi a.

¹⁹Chun amah chun Abram chuh vang a pie a, a kawmah, “Lei leh van neipa Pathien Chungnung pên chun Abram chuh vang pie hen.

²⁰Na melmate hun zawhsakpa Pathien Chungnung pên chu le pahchak in um hen,” a ti a. Chun, Abram in amah chuh bangkim ah sawma-khat a pie a.

²¹Chun, Sodom leng chun Abram kawmah, “Mihiem cheng hi ei pie’n la, van haw hi chuh nang chang ah,” a ti a.

²²Himahleh Abram chun Sodom lengpa kawm achun, “Patzang chakhat ahim, kengtawbek khau chakhat ahim le, nanga phawt chuh bangmah la puo’ng ka,

²³ti’n lei leh van neipa LALPA Pathien Chungnung pên ma achun ka kitiem ta a, khutilochun, ‘Abram chuh kei sukhauh sak ahi,’ ti kha’n la;

²⁴Tangval haw nek mang leh ka mi puihte chanvo tihloh chuh la puo’ng ka; Aner te, Eshkol te, Mamre te chun a chanvo u chuh lau hen,” a ti a.