Read Gangte THILSIEMBUL 15 Bible Online

THILSIEMBUL 15 - Gangte bible

THILSIEMBUL 15

¹Zie thil haw nung chun, LALPA thu chuh Abram kawmah vaulam in a hung tung a, “Abram, lau kih, kei hi na phaw ka hi a, na kipahman chuh lopi tak hiding ahi” ti’n

²Himahleh, Abram chun “Aw LALPA Pathien, banga nei piek ding, cha neilo in ka um zinga, ka goluoh ding chuh Damaska khuo a Eliezer hi himai ding ahim?” a ti a.

³Chun, Abram mah in, “Ngaiin, suon himhim la nei neihsak puoh ngâl a; ka In a pieng, ka suokte laka khat hi ka goluoh ding chuh ahi,” a ti a.

⁴Chun, ngaitie LALPA thu a kawmah ahung tunga “Zie na suokpa hih na goluoh ding hi puo’n tin, nangmah chapa ngêi chun na go luoh ina,” ti’n.

⁵Chun, amah chuh pawlam ah a puidawk a, “Van lam khu en in la, aksihaw khu na sim theih chun sim in: na suonte chuh khuti zat khu hung hi’n au,” a ti a.

⁶Chun, amah chun LALPA chuh a gingcha a; tichun amah chun zie chuh a diktat na’n a sânsak ta a.

⁷Chun, LALPA’n a kawmah, “Zie gam hi luoh dinga hun pie dinga Kaldai haw gama Ur apat a hun puidawkpa LALPA khah ka hi,” a ti a.

⁸Himahleh, amah chun, “Aw LALPA Pathien, luoh ding ka hi tih bangti’n a ka het theih ding?” a ti a.

⁹Amah chun a kawmah, “Bâwngla kum thuma upa leh kelpi kum thuma upa, belamchal kum thuma upa leh vakhu leh vapalno ei hun chawih sak in,” a ti a.

¹⁰Tichun ziehaw chengcheng chuh a hun chawih sak a, akim tak ah a phelsuoh chiet a, a phel khat chuh a phel lehlam zawn achun a kawih chiet a; vacha haw chu vang a phelsuoh puoi.

¹¹Chun, sasiel ne vacha haw chuh saluong haw chung achun a va chu sek u a, Abram chun a na nawhdawk zel a.

¹²Chun, nisa a hung tum dungzui chun Abram chuh a na ipmu ta mai a; chun, ngaitie, thim huoisie tak leh lauh-um tak chun ahun khuh ta a.

¹³Chun, LALPA chun Abram kawmah, “Na suonte chuh mi gam ah malzin in hung um untin: suok in um un tin, kum zali sung chuh sugimthei un au tih he’n;

¹⁴Himahleh, suok a hun nei namte chung achun ken vaihawm ing ka ting; zie nung chuleh neih leh lam tamtak nei in hung pawt un au.

¹⁵Nang vang chuh a hun suonte kawmah thamuong takin chieh in na tin; na luzâng a kelsam kek in hun vui unau

¹⁶Chun, a khang lina achun na suonte chuh zie gam ahin hungkit in au; a ziek chuh Amor mite gitlohna chuh a tungkim tadih puoh ngâl a,” a ti a.

¹⁷Chun, ni a tum a, khuo a hung thim phet chun, ngaitie, hâlmang meikhu vutvut leh saphel haw kikal achun meisel kuong puotpuot a kitawl vielviel hi a um a.

¹⁸Zie ni chun LALPA’n “Zie gam hi Aigupta lui apat a lui lien, Euphrates lui chanin na suonte ka pie tai:

¹⁹Ken mite, Keniz mite, Kadmon mite,

²⁰Hit mite, Periz mite, Rephraim mite,

²¹Amor mite, Kanaan mite, Girgash mite, Jebus mite haw hi tawh ka pie tai,” ti’n Abram kawm achun thuthun a siem ta a.