Read Gangte THILSIEMBUL 17 Bible Online

THILSIEMBUL 17 - Gangte bible

THILSIEMBUL 17

¹Chun, Abram chuh kum sawmkuo leh kum kuo mi ahih in, LALPA chuh a kawmah a hung kilak a, a kawmah, “Kei, Pathien Bangkim bawlthei ka hi; ka masang ah um inla pha bukim in um in.

²Tichun nang leh kei kal ah ka thu gawlh ing ka ting, nasa takin hun supung ing ka,” a ti a.

³Chun, Abram chuh a bawkkhup ta a: chun, Pathien in amah chuh a hopih a,

⁴“Ngaiin, ken vang nang kawmah ahi thu ka gawlh chuh: tichun nam tamtak pa hung hi’n na tin.

⁵Chun, na min le Abram hita puo’n tin, na min hi Abraham hung hizaw ta’n a, nam tamtak te pa a ka hun siem tâk ziekin.

⁶Chun, nasa takin chi hun sep zak sak ing ka ting, nang apat a chi tih kham hiel chuh siem ing ka; nang apat chun lengte le hung pawt in au.

⁷“Chun, kei leh nang leh na nunga na suonte leh a suonteu chanin le ka thugawlh hi, nang ding leh na nunga na suonte dingin, a Pathien uh hi dingin kumkhuo a thugawlh dingin sudet ing ka.

⁸Chun, nang leh na nunga na suonte kawm achun na malzinna gam Kanaan gam chengcheng hi kumkhuo go dingin hun pie’ng ka ting; chun, Kei hi a Pathien uh hi’ng ka,” a ti a.

⁹Chun, Pathien mah chun Abraham kawmah, “Nang chun ka thugawlh hi na zawp ding ahi; nangin na zawp ding ahi a, na nunga na suonte, a suon sawn zel teu inle a zâwp dinguh ahi.

¹⁰Chun, ziehi kei leh nang leh na nunga na suonte kikala ka thugawlh na zawp ding u chuh ahi na lak u a pasal taphawt chuh a zek na tan dinguh ahi.

¹¹Tichun na zek vun uh taksa achun na tan dinguh ahi, zie chuh nang tawh I kikala thugawlh melchikna hi’n a.

¹²Tichun na lak u a ni giet a upa chuh, na suonsawn zel hawu chan inle, na suon uh hi khello le na In a pieng ahim, malzin kuo hitaleh suma châwk hilele pasal taphawt chuh zek tan ding ahi.

¹³Na In a pieng leh na suma na châwk chule zektan tei ding ahi; tichun; ka thugawlh dingin na taksa ah um ta’n a.

¹⁴Himahleh, pasal zektan loh taphawt chuh, zie pa ngêi chuh a chipihte laka pat sukmang hi’n a; amah chun ka thugawlh chuh a susie ngâla” a tikit a.

¹⁵Chun, Pathien mah in Abraham kawm achun, “Na zi Sarai chuh amin Sarai ti ta puo’n na tin, amin chuh Sarah hizaw ta’n a.

¹⁶Amah chuh vangsak ing ka ting, zielo chun le amah apat chun chapa hun pie’ng ka ting; ahi vangsakna’n tuom ing ka ting, namte nu hung hi’n tin; amah apat in lengte le hung pawt in au,” a tikit zel a.

¹⁷Khutichun, Abraham chuh a khupbawk a, “Kum za mi hin cha a nei dinga ahim? Sarah kum sawmkuo mi hin cha a nei dem?” ti’n a lunggil in a nui a.

¹⁸Chun, Abraham mah in Pathien kawmah, “Ishmael hi na ma ah um thei hile chu aw!” a ti a.

¹⁹Chun, Pathien in, “Hilo e, na zi Sarah hin chapa hun hinsak zawn tin a min dingin Isak na sak ding ahi: ka thugawlh chuh amah nung a a suonte dingin kumkhuo thugawlh dingin amah achun sudet ing ka.

²⁰Ishmael chungchanga na ngetna le hun ngaihthak sak ing ka ting; Sarah chuh vangsak ing ka ting, chi tamtak leh suon tamtak nei in siem ing ka ting; nasatak in supung ing ka: amah chun leng sawmlenih hun hing intin, amah chuh chi lopi takin siem ing ka.

²¹Himahleh, ka thugawlh vang chuh kum kit tuhun hileh Sarah in a hun hinsak ding Isak kawm achun ahi ka sukdet zawk ding chuh,” a ti a.

²²Tichun, a kawma thu a gen zawhin Pathien chun Abraham chuh a chieh toh san ta a.

²³Chun, Abraham chun a chapa Ishmael leh, a In a pieng cheng leh suma a châwk chengcheng, Abraham inkawte laka pasal taphawt chuh Pathien in a kawma a gensa guolin, zie ni ngêi chun a zek vun pheh a tan sak ta a.

²⁴Chun, Abraham chuh a zek vun a tan sak lai u chun kum sawmkuo leh kuo mi ahi a,

²⁵Chun a chapa Ishmael chuh a zek vun a tan lai chun kum sawm leh thum mi ahi a,

²⁶Zie ni ngêi chun Abraham leh a chapa Ishmael chuh zektan a hung hi tau a,

²⁷a inkuonpihte laka, pasal chengcheng, a In a piengte leh malzinte kawma pata dangka suma a chawk haw chuh amah chu tawh zektan ahung hi vek tau hi.