Read Gangte THILSIEMBUL 18 Bible Online

THILSIEMBUL 18 - Gangte bible

THILSIEMBUL 18

¹Abraham chuh sun nisat lai taka puon-In kawtkhaka a chut lai in, LALPA chuh Mamre gangpi thingbul achun a kawmah ahung kilak ta a.

²Chun, a vak dâk dawk leh, ngaitie, mi thum a masanga ding chuh a vak mu a; chun, a muh phet chun puon-In kawtkhak apat amau haw tuok ding chun kintakin a tai phei a; leituol a bawkkhup in chibai a bûk a.

³A kawmah, “Hepu, nei lungsiet theih chun, lungsiet takin na suok hih ei chiehpel hiel ki’n” a ti a.

⁴Tui tawmchah hun chawih sak u hen la, na keng uh sil unla, thingbul nuoi ahin kichawl tadih unla,

⁵Chun, chângthâk tawmchah bêk va la’ng ka ting, na lunggil uh suhalh unla, zie zawh chuleh chieh zawm zel na’n lau; zie dinga chuh, na suokpau kawma hi hung na hiu hi, a ti a. Chun, amau chun, Na gen guol chun va hih ta leh, a tiu a.

⁶Tichun, Abraham chuh puon-In sunga Sarah kawm achun kin takin ava lut vaka, “Changbuong nêl hawih tak kha tehna dim thum teh inla, mêk inla, chângthâk siem in” a ti a.

⁷Chun, Abraham chuh bâwng In lam ah a tai a, bâwngno tuoi hawih tak, zawl hiuhieu ahun kai a, a suokte kawm achun kintaka hun huon dingin a sawl a.

⁸Chun, bâwngnawi khalte, bâwngnawite leh a bâwngno sa huon u chuh a la a, a masang u ah a luihsak ta a. Thing nuoi achun a kieng uh ah a ding zinga; tichun, amau chun a ne tau hi.

⁹Chun, amau chun a kawmah, “Na zi Sarah khawitak ah a um hi? a tiu a. Amah chun, zie a puon-In akhun a um hi” a ti a.

¹⁰Amah chun a kawmah, “Kum kit tuphat hileh na kawmah hungkit tei ing ka ting; chun ngaiin, na zi Sarah hin chapa nei ina” a ti a. A nunga puon-In kawtkhak apat chun Sarah chun ana za a.

¹¹Chun, Abraham leh Sarah chuh upa tak leh têk tak ahi tau a; numei dân ngeina chuh Sarah achun a um ta puoh a.

¹²Tichun, Sarah chun, “teksie ka hih nung in chapa ka nei na die aw! ka lalpa hila a têk ten ta a,” ti’n a lungthim gûkin a nui a.

¹³Chun, LALPA chun Abraham kawmah, “Bang zieka Sarah hin kei teksie hin chapa ka hing tak tak na die aw ti a gûk nuih ahi?

¹⁴LALPA a dingin thil bangkim a haksa taluo a um a ahim? Hun tiem ahung tun phat chuleh na kawmah hungkit ing ka ting, chun Sara’n chapa nei ina” a ti a.

¹⁵Ziephet chun, Sarah chun, “Ka nui puoi,” ti’n a kilep a; a lau ngâla. Amah chun, awihloh hiel ding, na nui ngêi khala, a ti a.

¹⁶Chun, zie mite chuh a kipan dawk u a; Sodom khuo lam chuh a en u a; chun Abraham chuh amau haw thadawk dingin a kipan dawka.

¹⁷Chun, LALPA chun, “Ka thilhih guot hih Abraham kawmah ka îm die aw!

¹⁸Abraham hi nam lopi tak leh thilhih thei tak hung hiding ahi a, amah achun khawvel a namtin vangsaka hung um ding ahi ngâl u a.

¹⁹LALPA lampi a hawh theih na ding u leh a nung u a a chate leh a inkuonpih teu thil dik hih ding leh diktaka vaihawm ding leh kitûp taka hih dinga thu a piek theih na dingin amah chuh ka guot ta ngâla. Khutichun, a chungchâng thu LALPA’n a gen chuh Abraham chunga a tunsak theih na dingin,” a ti a.

²⁰Tichun, LALPA chun, “Sodom leh Gomorra kiko thawm chuh anasa a, a gitlohnau chuh a huoisie mah mah a,

²¹Tuhin va chieh suk ing ka ting a kiko thawm uh ka kawm hungtung bang taka ahih u leh a hihloh uh en ing ka ting, a hihloh u le chuh he mai ing ka” a ti a.

²²Tichun, mite chuh zie apat chun a kihei u a, Sodom khuo lam chuh a zuon tau a; Abraham vang chuh LALPA ma achun a ding zinga.

²³Chun, Abraham chun ava naih a, “Mi diktatte chuh migilote tawh sumangthai khawm mai ding na him?

²⁴Khaw sung achun mi diktat sawmnga bêk um ta henla hileh, khaw sung a mi diktat sawmnga umte zal chun khuo chuh hawilo in na sumangthai tho dinga ahim?

²⁵Nang hielin khutibang chun mi diktatte chuh migilo banga a umna dingun, mi gilote tawh suklup khawm hiel chuh hih guo sam puo’n na tin; leichung cheng chenga vaihawmpa chun diktak in hih lo ding na him?” a ti a.

²⁶Chun, LALPA chun, “Sodom khuo sung ah mi diktat sawmnga tieng le ka muh chun, amau haw zal chun khuo pumpi chuh hâwi ing ka,” a ti a.

²⁷“Ngaiin, kei leivui leh meivam mai hin LALPA chuh ka hun hopih phawlawk ta a,

²⁸Mi diktat chuh nga’n sawmnga a ting lo maithei a; nga a tin loh ziek chun khuo pumpi chuh na sumangthai dinga ahim?” ti’n a dâwng a. Amah chun, “Zie tak achun sawmli leh nga mai ka muh lele sumang puo’ng ka,” a ti a.

²⁹Chun, amah chun a hopih kita, “Zie tak achun sawmli mai mu ta leh chin la,” a ti a Chun, amah chun, “Sawmlite ziek chun le sumang puo’ng ka” a ti a.

³⁰Chun, amah chun, Aw LALPA lungna ki’n la, vak gen kit dîng ka: zie tak achun sawm thum mai um ta le la? a ti a. Chun, Amah chun, “Zie taka chuh sawmthum tieng le ka muh chun sumangthai puo’ng ka” a ti a.

³¹Chun, amah chun, ngaitie LALPA chuh ka hun hopih laklawh ta a, zie tak achun sawmnih mai na mu kha mawh die, a ti a.

³²Amah chun, “Aw LALPA lungna hiel ki’n la, khatvei hun gen kit ing ka; zie tak achun sawmkhat mai na mu kha mawh die” a ti a. Amah chun, “Sawmte ziek chun le sumangthai puo’ng ka” a ti a.

³³Tichun, LALPA chuh Abraham tawh a kiho zawh u chun a chieh ta a, Abraham chuh amah umna mun lam ah a vaikit tai.