Read Gangte THILSIEMBUL 19 Bible Online

THILSIEMBUL 19 - Gangte bible

THILSIEMBUL 19

¹Chun, vânsâwlchâk nih chuh nitâk lam in Sodom khuo chuh ava tung u a, Lot chuh Sodom khuo kulh kawtkhak achun ana chu a; amau chuh a muh phetin a muok dingin a ding dawka, a mai a leisi’n chibai a bûka.

²A kawm u achun, “Pute haw, lungsiet takin na suok pau In ahin hunglut un, na keng uh sil unla, tichun, zingkal mataka tho in chieh zawm zel na’n lau” a ti a.Himahlele, amau chun, “Hilo e, khawlai ahin giek zaw’ng kau,” a tiu a.

³Himahlele, amah chun a nget luoi luoi ziek chun a zui tau a, tichun, a In achun a lut u a; chun, amah chun nek ding a siem saka; chângthâk chawl sawhloh a kang a, tichun, a ne tau a.

⁴Himahleh, a kuol masang u chun khawpi a mite, Sodom khuo a mite ngêi chuh atek akhang a hung taikhawm u a, In chuh a ûmkimvel tau a.

⁵Chun, Lot chuh a sam dawk u a, a kawmah, “Tuzan a na kawma mi hunglut te khah khawi ah a um u? Amau chuh ka kuolpih theih na dingun ka kawm u ah hun puidawk ah” a tiu a.

⁶Chun, Lot chuh kawtkhak bula a kawm u achun ava pawt a, kawt a lehkhak kita.

⁷“Ka suohpihte haw, lungsiet takin khuti lâwm lâwm chun nunsie kiu in,

⁸Ngaitiem u, pasal kuolpih khâk loh chanu nih ka nei a, ei lungsiet unla, amau chuh na kawm u ah hun puidawk ing ka ting, na nawp nawp uh ana lawh mai unla, zie mite chung ahin vang bangmah hih kiu in; zieziekchun apuo ka insung a a hunglut uh” a ti a.

⁹Himahlele, amau chun, “Kikiengkawih mai in” a tiu a. Chun, amau haw mah chun, “Zie pa hih zie tak a um ding hin a hung pemlut a, vaihawm a pan a guo nalai seta; tuhin chuh, amau chunga hih sang in nang chung ahin hihsie zaw sem ing kau” a tiu a Tichun, mipite chun Lot chuh ahun bawh u a; kawtkhak chuh susie dingin a hun naih u a.

¹⁰Himahlele, mi nih te chun a khut uh ahun thun dawk u a, Lot chuh a kawm u ah insung achun a kailut u a, kawt chuh a khâk tau hi.

¹¹Chun, kawtkhak bula mihaw chuh alien aneu in a mit uh a sukdûk sak u a; khutichun, kawtkhak chuh a mu thei ta puou hi.

¹²Chun, mite chun Lot kawmah, “Ziehaw tih loh hi zie khuo sung ahin Inkuon pih dang na nei nalai hi? Na mâkpate, na chanu leh chapate leh khuo sunga um taphawt khuo apat hin puidawk ah.

¹³LALPA masanga a kiko thawm uh a nasat tâk ziekin zie khawpi hih sumangthai ding ka hiu hi; a sumangthai dingin LALPA’n ei sawl ngâla,” a tiu a.

¹⁴Tichun, Lot chuh a pawtdawk a, a chanute pasal, a mâkpate kawm achun ava chieh a, “Kipan unla, zie khawpi apat hin pawtdawk un; LALPA’n zie khawpi hih sumangthai ding ahi,” a ti a. Himahleh, a mâkpate chun chiemnuih thugen bang phetin a ngai u a.

¹⁵Chun, thingzangvak in Vânsâwlchâkte chun, “Kipan in la na zi leh zie a na chanu nih umte hi tawh puidawk ah: khutilochun, zie khuo gawtna ahin beimang khawm kha’n lau” ti’n Lot chuh kin takin a nawh u a.

¹⁶Himahlele, amah chuh a muong ten a, khutichun, LALPA’n amah a hehpih ziekin mite chun a khut leh a zi khut leh a chanu nih te khut chuh a tuu a, tichun, a puidawk u a, khawpi pawlam achun a kawih tau a.

¹⁷Chun, khawpi pawlama a puihdawk zawh phet u chun, “Na hinna dingin tai ah, kinunghei ki’n la, phaicham mawngmawng ahin le ding hiel ki’n la tâng lam akhun taidawk ah, khutilochun mangthai kha’n la,” a ti a.

¹⁸Himahleh, Lot chun a kawmah, “Hepu, khutichuh hidah hen,

¹⁹Ngaitie, na mitmuh ah deihsakna ka changa, ka hinna humbit na dingin ka chungah na zaidawhna chuh na sulang ta a, himahleh, tâng akhun vang taidawk zo puo’ng ka; sietna chun ei hun tunbichilh intin, thi khang ka.”

²⁰Ngaitie, zie khuo khu taihna dingin a naipen a, khuo neucha le ahi ngâla; zie khun ei taih sak zaw’n, tichun, hing ing ka, a ti a.

²¹Chun, amah chun a kawmah, “Ngaitie, zie thu achun le ka hun zui a; khuo na gen chuh sumang puo’ng ka.”

²²Kin inla, zie tak achun tai ah; zie tak chuh na tun ma cheng bangmah hih theilo ding ka hi ngâla, a ti a. Zieziekchun, zie khuo min ding chun Zoar a sa tau hi.

²³Lot chuh Zoar khuo a tun in leichung ah ni a hung suok ta a.

²⁴Tichun, LALPA’n Sodom leh Gomorra chung achun van a LALPA kawm apat chun mei leh kât a zuk sak ta a.

²⁵Tichun, zie khawpi haw chuleh phaicham chengcheng leh khuo a mi cheng cheng leia thil kekhaw chuh a sumang suok kêi ta a.

²⁶Himahleh, a zi vang chuh Lot nung lam apat ana kinunghei a, tichun chikhawn a suok ta a.

²⁷Chun, Abraham chuh zingkal vaima takin LALPA masanga a dinna mun akhan a chieh to a.

²⁸Tichun, Sodom leh Gomorra leh phaicham lam cheng chuh a thîl a, a en zinga; ngaiin, zie gama meikhu chuh hâltuina meikhu bang mai in a khuto vuohvuoh maia.

²⁹Chun, Pathien in phaicham khuo haw chuh a sukmang lai in Abraham khah a hezing a, chun, Lot chênna khawpi a suksiet lai in Lot chuh manthaina lak apat chuh a sawldawk a.

³⁰Chun, Lot chuh Zoar khuo apat chun a chieh to a, tâng achun a chênga, a chanute nih chule a kawmah a um u a, Zoar khuo ah a um ngam puoh ngâl u a; tichun, amah leh a chanute nih chuh kâwlhâwm ah a cheng tau hi.

³¹Chun, a chanu upa zaw chun a naupang zaw kawm achun, “I pa hih a upa ta a, khawvel dân banga ei kuolpih ding pasal khat chale a um ta puoh ngâl u a.

³²Hung tie, I pa hih uain dâwn kham sak hiting, I pa hih suon mang lo a I siem theih na dingin kuolpih hiti,” a ti a.

³³Tichun, zie zan chun a pau chuh uain a dâwn kham sak u a, tichun, a upa zaw chuh a luta, a pa kawma chun ava kuol ta a; amah chun la a va kuol lam chuh a he puoh a; a thawhkit lam chule a he diek puoi.

³⁴Chun, hiti hi ahung hi a, a zing chun a upa zaw chun a naupang zaw kawm achun, “Ngaitie, thangni zan khan I pa kieng ah ka kuol a, tuzan hin le uain dâwn sak kit hiting, nang le lut in la I pa suon mang lo a I siem theihna dingin a kawmah va kuol in,” a ti a.

³⁵Tichun, zie zan chun le a pau chuh uain a dâwn sak u a, a naupang zaw chuh a chieh a; a kawmah a va kuol ta a, chun, amah chun a va kuol lam le a he puoh a, a thawhkit lam le a he diek puoi.

³⁶Khutibang chun Lot chanute nih chun a pau apat chun nau ahun vawp gêl gêl tau hi.

³⁷Chun, a upa zaw chun chapa a hinga, amin in Moab a sa a; amah chuh tulai a Moab haw suonpa hih ahi.

³⁸Chun, a naupang zaw chun le chapa a hinga, amin in Ben-ammi a sa a, amah chuh tulai a Amon suonte hun suonpa hih ahi.