Read Gangte THILSIEMBUL 20 Bible Online

THILSIEMBUL 20 - Gangte bible

THILSIEMBUL 20

¹Chun, Abraham chuh zie apat chun simlam zuonin a kichawn a, Kadesh leh Shur kikal achun a cheng a, Gerar khuo achun le ava um a.

²Abraham in a zi Sarah chuh, “Ka suohpihnu ahi,” a ti a: tichun Gerar leng Abimelek chun mi a sawl a, Sarah chuh a va puih sak ta a.

³Himahlele, zie zan a Abimelek mang chun a kawmah Pathien a hung kilak a, “Ngaitie, zie numei na kipuih ziek hin a thisa na hi tai; mi zi ahi ngâl a,” a ti a.

⁴Abimelek chun a na kuolpih nai puoh a; tichun amah chun, “LALPA, mi thiemlohna neilo chuh na that dinga ahim?

⁵Amah ngêi in ka kawmah, ‘Ka suohpihnu ahi,’ a ti puoh a ahim? chun, amahnu ngêi inle, ‘Ka suohpihpa ahi,’ a ti ngâl a: lungthim pha tak pu leh khut thiengtho tak nei kawmin ziehi ka hih ahi,” a ti a.

⁶A mang lam mah chun Pathien in, “Ahi, ziehi lungthim pha tak pukawm a na hih ahi tih ka hêi, tichun ken le ka chunga thil na hihkhelh ding chuh ka hun khap ahi; zieziekchun ahi amah na khawih ka phal loh chuh.

⁷Khutichun, tuhin mi zi kha piekit in; amah chuh thiemgau ahi ngâl a, hun paucham sak intin, chun, hung dam inla: na piek kit loh le vang thi tei inla tih he’n nang leh na mite chengcheng tawh,” a ti a.

⁸Tichun, Abimelek chuh zingkal matak in a tho a, a suokte chengcheng a sam a, a zak u ah zie thu haw cheng chuh a hilh a; mi chengcheng chun a lau mah mah tau hi.

⁹Khutichun, Abimelek chun Abraham a sama, a kawmah, “Ka chunga na thilhih hi bangti dân ahi ta’m? Bang taphet ka hihkhiel a kei leh ka khuo leh tuite chunga thil gilo huoisie tak mai hih na tunsak a, hihloh hiel ding thil ka chunga na hih tâk hih” a ti a.

¹⁰Chun, Abimelek chun Abraham kawmah, “Bang na ngaihtuoh a zie tawbang thil hi na hih a?” a tikit a.

¹¹Abraham chun, “Zie khuo ahin Pathien kihchakna um hiel puo’n tin, ka zi ziek hin ei that kha’n au tih ka ngaihtuoh a ahi.

¹²Zielo chun le ka suohpihnu a hihna chuh, ka pa chanu ahi a, ka nu chanu vang ahi puoi; tichun, ka zi a hung hi tai.

¹³Chun, Pathien in ka pa In apat ei vakvaih sak lai khan, a kawmah, ‘Zie hi na lungsietna ka chunga na suklatna ding chuh ahi; ka tunna mun cheng u ah, Ka Suohpihpa ahi ei ti zelin, ka tih him ahi,’” a ti a.

¹⁴Chun, Abimelek chun belamte leh bâwngchalte leh suok pasal haw leh suok numei haw a pui a, Abraham chuh a pie a, a zi Sarah chule a pie kit ta a.

¹⁵Chun, Abimelek chun, “En in ka gam hi na ma ah a um hi, na utna phawt ahin cheng in,” a ti a.

¹⁶Chun, Sarah kawm achun, “En in, na suohpihpa hi dangka sekel sangkhat ka pie ta a; na kawma um cheng te laka na thiemchanna ding leh mitin mit muh a dem kailo a na dikna suklatna ding ahi a; na chungchâng thu mawngmawng ahin na thieng suok kêi tai,” a ti a.

¹⁷Tichun, Abraham chuh Pathien kawmah a paucham a; chun Pathien in Abimelek leh a zi leh a suok numeite chuh a hihdam kit tai; tichun chate a hun nei kit tau a.

¹⁸Abraham zi Sarah ziek chun LALPA’n Abimelek inkawte cheng chuh a sûl uh a sukbing sak vek ta ngâla.