Read Gangte THILSIEMBUL 21 Bible Online

THILSIEMBUL 21 - Gangte bible

THILSIEMBUL 21

¹Chun, LALPA’n a gensa guol khan Sarah chuh a va veh a, LALPA chun a gensa guolin Sarah chungah a hih ta a.

²Tichun, Sarah chun nau a vawp a, Pathien in a kawma hun a tiem hun tak chun Abraham chuh a têk nung in chapa a hinsak ta a.

³Chun, Abraham in a chapa, Sara’n a hinsak min ding chun Isak a sa ta a.

⁴Chun, Abraham chun, Pathien in a kawma thu a piek bang ngêi in, a chapa Isak chuh a ni giet ni chun zek a tan sak tai.

⁵Chun, a chapa Isak a pien lai chun Abraham chuh kum za mi ahi tai.

⁶Chun, Sarah chun “Pathien in ei nuih sak tai, mitin a he taphawt in ei nuih pih in au,” a ti a.

⁷Amah mah in, “Sara’n nausen hun pawm ina tih kuo a Abraham kawma gen ngaihna he ding? A têk nung hin chapa ka hinsak ta hi,” a ti a.

⁸Tichun, nausen chuh a hung khanglien a, a nawichep a haihsak tau a; Isak chuh a nawichep a haih ni chun Abraham in guolvakna lopitak a siem a.

⁹Chun, Aigupta mi Hagar chapa, Abraham dinga a hinsak chun a nuihsan lai tak Sarah chun a mu a.

¹⁰Zieziekchun Abraham kawm achun, “Zie suoknu leh a chapa hi nawhdawk ah; suoknu chapa hin ka chapa Isak go luohpih thei puo’n a,” a ti a.

¹¹Zie thu chun Abraham a sulungkham a, a ziek chuh Ishmael chu le a chapa a hih ziekin.

¹²Himahlele, Pathien in Abraham kawmah, “Naupang chungchâng leh na suoknu chungchâng thu hi nang ngaih in thil phalo tak hi kihen; Sara’n na kawma a gen cheng chuh zawp mai in; Isak ahin na suonte hun ti ding ahi ngâl u a.

¹³Suoknu chapa hile nang suon ahih ziekin, chi a gen kham zet hung pawt ina,” a ti a.

¹⁴Tichun, Abraham chuh zingkal matak in a tho a, chângthâk leh tui-ûm tuia dim in a la a, Hagar a pie a, a liengko ah a tunsak a, naupang chu tawh a sawlmang ta a; tichun a chieh a, Beer-sheba gamgaw ah a vak, a vak ta a.

¹⁵Chun, tui-ûm a tui chuh a hung bei ta a, tichun naupang chuh hambawk lak mun khat achun a kawih ta a.

¹⁶“Naupang thi ding chuh ka en ngam puoi,” a tih ziekin thal kap phâk vel ding tieng achun a va chu ta a, ngeih tak in a kap ta a.

¹⁷Chun, Pathien in naupang aw chuh a za a; Pathien vânsâwlchâk in van apat in Hagar chuh a vak sama, a kawmah, “Hagar, bang na ti a ahi? lau kih, a umna a naupang aw kha Pathien in a za apuo!

¹⁸Tho inla, naupang kha kaitho inla, na khut in tu’n; amah chuh nam lopi taka siem ding ka hi,” a ti a.

¹⁹Chun, Pathien in a mit a sukvak saka, tuisutdawk a mu ta a; tichun a va chieh a, tui-ûm achun tui a thal dim a, naupang chuh a dâwnsak ta a.

²⁰Chun, Pathien chuh naupang kawm achun a um zel a, a hung khanglien zel a; gamgaw achun a um a; thal kap thiem mi a hung hita a.

²¹Paran gamgaw achun a um a; a nu chun Aigupta mi zi’n a neihsak tai.

²²Zielai chun Abimelek leh a sepaihte lawiupa Phikol chun Abraham kawmah, “Na thil hihna lam cheng achun Pathien na kawmah a um zel sek a.

²³Zieziekchun, tuhin Pathien min lo in, kei leh ka chapa leh ka chapa-chapa’n le diklo taka hun bawllo a, ka hun na lungsiet guol khan kei leh na umna gam hih lungsiet thuk zaw diek dingin ka kawmah kipautiem in” ti’n a gen a.

²⁴Chun, Abraham chun, “Kitiem ing ka,” a ti a.

²⁵Abimelek suokte’n tuisutdawk a lâksak ziekun Abraham in Abimelek chuh a hilhgaih a.

²⁶Chun, Abimelek chun, “Zie thil hihpa chuh kuo ahih ka he hiel puoi: nangin la nei hilh puoh ngâla, tuni tih loh chun ka na he kha hiel puoi,” a ti a.

²⁷Tichun, Abraham chun belamte leh bâwngchalte a kai a, Abimelek chuh a pie a; chun a nih u chun thugawlh a siem tau hi.

²⁸Abraham in a belam hawn lak a belamno anu sagih a kawihchuom a,

²⁹Chun, Abimelek chun Abraham kawmah, “Belamno anu sagih a chuom a na kawih dawk hi bangti dân a?” a ti a.

³⁰Abraham chun, “Zie tuisutdawk hi ken ka laih ngêi ahi tih nei hetpihna dinga zie belamno a nu sagih hi ka khut apat na lak ding ahi,” ti’n a dâwng a.

³¹Zieziekchun zie mun chuh Beer-sheba a sa a; zie taka chuh a nih u a a kipautiem ziek un.

³²Khutichun Beer-sheba achun thugawlh a bawl tau a: Abimelek leh a sepaihte lawiupa Phikol chuh Philistia te gam achun a chieh kit tau hi.

³³Chun, Abraham in Beer-sheba achun châk thing a phut a, zie tak achun LALPA kumkhuo a Pathien min chuh a lo ta a.

³⁴Tichun, Abraham chuh Philistia te gam achun sawttak a um hi.