Read Gangte THILSIEMBUL 22 Bible Online

THILSIEMBUL 22 - Gangte bible

THILSIEMBUL 22

¹Zie thil haw nung chun Pathien in Abraham chuh a patep a, a kawmah “Abraham,” a ti a; amah chun, “Zie hin ka um hi,” a ti a.

²Chun, Pathien in “Na chapa, na chapa neihsun, na lungsiet tak, Isak ngêi kha pui inla, Moriah gam ah chieh in. Zie taka ka hun hilh ding tâng khat achun hâlmang thilpiek in pien,” a ti a.

³Tichun, Abraham chuh zingkal matak in a tho a, a sabiltung a guonggalh a, a kawmah a suok tangval nih a pui a, a chapa Isak tawh; chun hâlmang thilpiek na ding thing a ek a, a kipan a, Pathien in a hilhna lam achun a chieh ta a.

⁴Chun, a ni thum ni chun Abraham chuh a vak dâk to a, a mun chuh gamla tak ah a vak gâl muh a.

⁵Tichun a suok tangvalte kawm achun, “Zie hin sabiltung hi tawh a na um u, kei leh naupang hi zie khun va chieh ing ka ting un, Pathien va ho ing ka ting un, na kawm u ah hungkit ing kau,” a ti a.

⁶Tichun, Abraham chun hâlmang thilpiekna ding thing chuh a la a, a chapa Isak chuh a put saka; amah chun mei leh chemcha a chawia, khutichun a nih u chun a chieh tau hi.

⁷Isak chun a pa Abraham chuh a hopih a, “Hepa,” a ti a; amah chun, “Ka chapa, zie tak ahin ka um hi,” a ti a. Amah chun, “Entie, mei leh thing chuh a um a, mahleh hâlmang thilpiek ding belamno chuh khawia um ahi?” a ti a.

⁸Abraham chun, “Ka chapa, Pathien in amah dinga hâlmang thilpiek ding belam chuh ngaihtuoh na ven ti,” a ti a. Khutichun a nih un a chieh zawm zel u a.

⁹Chun, Pathien in a hilhna mun chuh ava tung tau ui; chun, Abraham in zie tak achun maichâm a siem a; thing chuh a sep khawm a, a chapa Isak chuh a kan a, maichâm a thing chung achun a siel ta a.

¹⁰Chun, Abraham chun a chapa thah na ding chemcha chuh a la a, a khut a lam ta a;

¹¹Himahlele, LALPA vânsâwlchâk in van apat in amah chuh a vak sama, “Abraham, Abraham!” a vak ti a: chun amah chun, “Zie hin ka um hi,” a ti a.

¹²Chun, amah chun, “Naupang chung akhan na khut tha ki’n la, amah kha bangmah lawh kih: na chapa na neih sun le nei piek dinga na it loh ziekin Pathien na kihchai tih tu’n ka he tai,” a ti a.

¹³Chun, Abraham chuh a khawdak viel a, chun, ngaitie a nung lam achun belamchal a ki a thing nawk laka a na tâng hih a mu a: tichun Abraham in belamchal chuh a va la a, zie chuh hâlmang thilpiek in a chapa thasang in a pie tai.

¹⁴Tichun, Abraham in zie mun min ding chun Jehovah-Jire tih a sa ta a: tuni chan a, “LALPA tângah ngaihtuoh hi’n a,” a tih sek guol u hin.

¹⁵Chun, LALPA vânsâwlchâk chun a nih veina ah van apat in Abraham chuh a vak hopih kit a,

¹⁶“Zie thil hi na hih tâk ziekin leh, na chapa na neihsun le na it loh ziekin hun vangsak tei tei ing ka ting.

¹⁷Vana aksi zah leh tuisuohgiet panga pîlnel zah in na suonte chuh hun supung ngêi ngêi ing ka, tih leh, na suonte chun a melmateu kulh kawtkhak bul chanin luoh in au.

¹⁸Ka thu na awih tâk ziekin na suonte achun khawvel a namtin vangsak in um in au tih kei ngêi kipautiem in ka gen tai, LALPA’n a tii” a vak ti a.

¹⁹Khutichun, Abraham chuh a suok tangvalte kawm achun a kilehkit a, chun, a kipan u a, Beer-sheba lam zuon in a chieh tau a; chun, Abraham chuh Beer-sheba achun a um zing tai.

²⁰Zie thil haw nung chun Abraham chuh, “Ngaitie, Milkah khan le na suohpihpa Nahor chuh chate a hinsak ta ve” ti’n a hilh u a.

²¹A chapa upapen chuh Uz ahi a; a suohpihpa chuh Buz ahi a, Aram pa Kemuel ahi.

²²Chesed, Hazo, Pildah, Jidlaph leh Bethuel ahiu hi.

²³Chun, Bethuel in chanu Rebekah a nei a; chun, Abraham suohpihpa Nahor ding chun Milkah chun zie giette chuh a na hinsak hi.

²⁴Ziehaw cheng bân achun, a meinu, Reumah chun le Tebah te, Gaham te, Tahash te, Maakah te a hing hi.