Read Gangte THILSIEMBUL 23 Bible Online

THILSIEMBUL 23 - Gangte bible

THILSIEMBUL 23

¹Chun, Sarah damsung chuh kum za leh sawmnih leh sagih ahi a; zie chuh Sarah damsung kum chuh ahi.

²Chun, Sarah chuh Kanaan gama Kiriath-arba khuo ah a thi a, (zie chuh Hebron ahi) Chun, Abraham chuh Sarah sûn ding leh kah dingin a chieh a.

³Chun, mithi luong umna mun apat chun a ding dawka, Heth suonte kawm achun,

⁴“Nanguh lak ahin malzin leh khawpem mai ka hi a: ka mithi luong hi ka muh loh a ka vuih mang theihna dingin na lak u ahin vuihna mun go dingin ei pieu in” ti’n a ngên a.

⁵Chun, Heth suonte chun Abraham kawm achun,

⁶“Hepu, ei ngaitha tie, nang chuh kei u laka hin leng lopi tak na hi a; ka thân hawu ahin na deihna pên pen ah na mithi chuh vui zieng ah: na mithi vuihna dingin ka lak u a kuoma’n ka thân uh hun it sak puo’ng kau” a tiu a.

⁷Tichun, Abraham chuh a kipan a, a bawkkhup a zie gama mi, Heth suonte chuh chibai a bûk a.

⁸“Ka mithi hi ka muh loh a vuih nei lemsak u chun, ei ngaithau in, Zohar chapa Ephron kawmah Makpelah kawlpûk, a lo chin a um khu ei pie dingin ei ngetsak un.

⁹Na lak u a kivuihna mun ka neih den dingin a man zat zat chuh na mitmuh ngêi un pie’ng ka,” ti’n a hopih a.

¹⁰Ephron chuh Heth suonte lak achun a na chu zing a: tichun Hit mi Ephron chun Heth suonte zak leh a khuo kulh kawtkhaka lutte zak ngêi achun,

¹¹“Hilo e, hepu ei ngaitha’n, lo chuh ka hun pie a, a sunga kawlpûk um chule ka hun piei; ka chipihte chate mitmuh ahin ka hun piei; na mithi chuh vui mai in,” ti’n Abraham chuh a dâwng a.

¹²Chun, Abraham chuh zie gam mite ma achun a khun a, chibai a bûk a.

¹³Zie gam mite zak chun Ephron kawm achun, “Pha na sak ahih phawt chun lungsiet takin ei ngaitha’n la, lo man chuh hun pie zaw’ng ka ting; ka kawm apat hin la’n la, zie tak achun ka mithi hi vui ing ka,” a ti a.

¹⁴Chun, Ephron chun Abraham chuh a dâwng a, a kawmah,

¹⁵“Hepu, ei ngaitha tie, leiman paisa sekel zali man haw cha chuh, nang leh kei a dingin gen kham ahi a ahim? Na mithi chuh vui mai ah” a ti a.

¹⁶Tichun, Abraham chun Ephron thu chuh a zawp ta a; chun, Abraham in Heth suonte zak in Ephron in paisa a gen zah, sekel zali, sumkawlveite’n a mat sek uh chuh a teh a, Ephron chuh a pie ta a.

¹⁷Khutichun Ephron lo, Mamre zawna Makpelah gama um chuh, a lo pumin, a sunga kawlpûk um chu tawh, lo a thing um chengcheng tawh,

¹⁸Heth suonte mitmuh leh khuo kulh kawtkhaka lut cheng mitmuh achun, a neih den dingin Abraham kawm achun piek in a um ta a.

¹⁹Ziehaw nung chun Abraham in a zi Sarah chuh Kanaan gama Mamre zawna Makpelah kawlpûk achun a vui ta a: zie chuh Hebron khuo ahi.

²⁰Tichun, lo leh a sunga kawlpûk um chuh, kivuihna muna neih den dingin Abraham chuh Heth suonte chun a pie den tau hi.