Read Gangte THILSIEMBUL 25 Bible Online

THILSIEMBUL 25 - Gangte bible

THILSIEMBUL 25

¹Chun, Abraham chun zi dang a nei a, amin chuh Keturah ahi.

²Amah chun Zimran te, Joksan te, Medan te, Midian te, Ishbak te, Shuah te a hinsak a.

³Joksan chun chapa Seba leh Dedan a nei a. Dedan chapate chuh Asurim te, Letusim te, Leumim te ahiu hi.

⁴Midian chapate chu Ephah te, Epher te, Hanok te, Abida te, Eldaah te ahiu a, ziehaw chengcheng chuh Keturah chate ahiu hi.

⁵Chun, Abraham chun a thil neih chengcheng Isak a pie a.

⁶Himahleh, a mei haw chapate chu vang Abraham in kipahmante a pie a; amah damsung ngêi chun a chapa Isak kawm apat in, suohlam ah, suohlam gam achun a sawl mang ta a.

⁷Abraham damsung chuh kum za leh sawmsagih leh nga ahi.

⁸Abraham chuh kum ting tak, têkkûn a dam in a thi a, a chipihte kawm achun puih in a um tai.

⁹A chapate Isak leh Ishmael chun Hit mi Zohar chapa Ephron lo a, Mamre suohlam Makpelah kâwlhâwm achun a vui tau hi.

¹⁰Zie mun chuh Abraham in Heth suonte kawm apat a a châwk ahi. Zie tak achun Abraham leh a zi Sarah chuh a kivui ui.

¹¹Chun, Abraham thih nung chun Pathien in a chapa Isak chuh a vangsak a; Isak chuh Beer-lahai-roi ah a cheng hi.

¹²Ziehaw hi Sarah suoknu, Aigupta mi Hagar in Abraham a hinsak Ishmael suonte chuh ahiu hi:

¹³Ziehaw hi Ishmael chapate, a pien dân dungzui u leh amin hawu ahi: Ishmael chapa upapen min chuh Nebaioth ahi a; a naute chuh Kedar leh, Adbeel leh Mibsam leh,

¹⁴Mishma leh Duma leh Masa ahiu a;

¹⁵Hadad leh, Tema leh Jetur, Naphish leh Kedama le ahiu hi:

¹⁶Ziehaw hi Ishmael chapate chuh ahiu a; ziehaw hi a khuou bang zel leh a giehbuk uh bang zela a min uh zik ahi a; a nam dungzui zelin leng sawmlenih ahiu hi.

¹⁷Chun, Ishmael damsung kum chuh hiti hi ahi a, kum zakhat leh sawmthum leh sagih ahi a: a thagau a thah a, a thi a, a chipihte kawm a puih in a um tai.

¹⁸Chun, a chapate chu Havilah gam apat Shur chanin, Asuria gam zawtna Aigupta zawn tiengin a um u a: a suohpihteu chu tawh a cheng khen tau hi.

¹⁹Ziehaw hi Abraham chapa Isak suonte chuh ahiu hi: Abraham in Isak a hing a:

²⁰Isak chuh kum sawmli a upa a hih in, Padan-aram gama Suria mi Bethuel chanu, Laban suohpihnu Rebekah zi’n a nei hi.

²¹A zi chuh a chîng ahih ziekin Isak chun LALPA kawmah a ngetsak a, LALPA’n a ngetna a ngaihthak sak a, a zi Rebekah chun nau a vawp ta a.

²²Chun, a gil sung achun a nauvawpte chuh a kisuol tau a; amah chun, “Hitibangpi hi ahih chun, bang ziekin e ka hin zing ding?” a ti a. Khutichun LALPA dawng dingin a chieh ta a.

²³Chun, LALPA’n a kawmah, “Na sûl achun nam nih a um u a, Na gil sung apat ngêi chun nam nih kikhen untin: Nam khat chuh nam khat sang chun hatzaw’n tin; A upazaw chun a naupangzaw na chuh sem in a,” a ti a.

²⁴Chun, a nausuok a hung phat phet chun, ngaitie, a sûla nau chuh a kiphik ana hi a.

²⁵A hung suok masa zaw chuh a sana san, puon mul guola mul thiepthuop in a hung suok a, khutichun amin dingin Esau a sau a.

²⁶Zie zawh chun a suohpihpa chuh a hung pawt kit a, a khut in Esau khawtalzum chuh a tu zing a; tichun amah min ding chun Jakob a sau a: Rebekah chun amau chuh a hinlai chun Isak chuh kum sawmgup mi ahi tai.

²⁷Naupangte chuh a hung khanglien u a; Esau chuh sa kap thiem tak, gamvak mi ahi a; Jakob vang chuh mi thip hiet hiet, puon-In a um mi ahi.

²⁸Isak chun sakhi sa a nek sek ziekin Esau chuh a hehpih a, Rebekah chun vang Jakob chuh a ngaina zawi.

²⁹Ni khat chuh Jakob in meh bang ahim a huon a, Esau chuh gamlak apat in a hungtung a, a gilkiel mah mah a,

³⁰Esau chun Jakob kawm achun, “Lungsiet takin na thil huon chuh ei nêk sak tie; a tâmsawl ka hi” a ti a. (Zieziekchun ahi a min chuh Edom tih a a um).

³¹Chun, Jakob chun, “Chapa upa hihna ei châwksak phawt inla,” a ti a.

³²Chun, Esau chun, “Tâmsawl a thi ding dinmun a um ka hi ngâl a; cha upa hihna mai hi kei a dingin banga phachuom?” a ti a.

³³Chun, Jakob chun, “Ka kawmah kihâksiel masa phawt ale” a ti a: tichun a kawmah a kihâksiel ta a; khutichun chapa upa hihna chuh Jakob kawmah a khawng mai tai.

³⁴Chun, Jakob chun Esau chuh chângthâk leh betuikhawng kihuon chuh a pie ta a, tichun a ne a, a dâwn a, a kipana, a chieh ta a: zie bang chun Esau in chapa upa a hihna chuh a ngainep hi.