Read Gangte THILSIEMBUL 26 Bible Online

THILSIEMBUL 26 - Gangte bible

THILSIEMBUL 26

¹Chun, zie gam achun, Abraham damlaia kiel hungkie masa zaw tih loh kha, kiel a hung kie kit a. Tichun Isak chuh Philistia leng Abimelek kawmah Gerar khuo ah a va chieh a.

²Chun, LALPA chuh Isak kawmah a hung kilak a, “Aigupta gam achun va chieh kih; gam ka hun hilh ding achun um in.

³Zie gam ahin um tadih inla, tichun na kawmah um zing ing ka ting, hun vangsak ing ka ting; zie gam chengcheng hi nang leh na suonte pien, na pa Abraham kawma ka kihâksiel na kha sudet ing ka.

⁴Chun, van a aksi zah in na suonte chuh hun supung ing ka ting, zie gam chengcheng hile na suonte pie’ng ka.Chun, na suonte apat chun khawvel a namtin vangsak in hung um in au.

⁵Abraham in ka thu a zawp a, ka thuhilhte, ka thupiekte, ka thuguot te leh ka dante a zawp ziek khan,” a ti a.

⁶Tichun Isak chuh Gerar khuo achun a cheng ta a.

⁷Zie khuo a mite chun a zi chanchin a dawng u a, “Ka suohpihnu ahi,” a ti a: a mel a hawih ngâla, “Zie khuo a mite hin Rebekah ziekin ei that kha’n au.” a tih ziekin “Ka zi ahi,” a ti ngam puoi.

⁸Chun, tihi ahung hi a, zie taka chu sawttak a um nung chun, Philistia lengpa Abimelek chun tukvan apat in a hun en a, chun, Isak in a zi Rebekah a saih lai tak a vak mu a.

⁹Tichun Abimelek in Isak chuh a sama, “Na zi ngêi ahi hi la: bangati a ‘Ka suohpihnu ahi,’ na tih mai a?” a ti a. Isak chun a kawmah, “Amah ziekin thi kha’ng ka tih ka lauh ziek ahi,” a ti a.

¹⁰Abimelek chun, “Ka chunga na thilhih hi bangti dân ahi ta? Mi laka khatto hin na zi hi a na kuolpih mai thei lo ding ahim, tichun ka chung u ahin thiemlohna na hun tunsak hi ding ahi,” a ti a.

¹¹Abimelek mah chun, “Kuole, zie mi hi ahim, a zi hi ahim khawih ta chuh suklup ngêi ngêi ding ahi,” ti’n mi chengcheng chuh thu a pie a.

¹²Chun, Isak chun le zie gam achun buh a chîng a, zie kum chun a leh za a mu a: LALPA’n a vangsak ziekin.

¹³Tichun amah chuh a hung hausa mah mah ta a, nasa taka mi lopi hung hi hielin a hung lien deuh deuh tai:

¹⁴belam hawnte leh bâwng hawnte le a nei a, inkuon le tamtak a nei a: tichun Philistia te chun a hun itthik tau a.

¹⁵A pa Abraham damlai a, a suokte’n tuisutdawk a laih chengcheng u kha Philistia te’n a hubing u a, lei a vuk dim suok kêi u a.

¹⁶Chun, Abimelek chun Isak kawmah, “Kei u kawm apat hin chieh mang kêi ah, kei u sangin na hatzaw ngâl a,” a ti a.

¹⁷Tichun, Isak chuh zie apat chun a pawt a, Gerar guom ah puon-In a zak ta a, zie tak a chun chawmkhat a châm ta a.

¹⁸Chun, Isak chun a pa Abraham damlaia a tuisutdawk laihteu kha a lai kit a, Abraham thih nunga Philistia te’n ana hukbing sak u chuh: a pa’n a min a na sak guol zel khan a min a sa kit tai.

¹⁹Isak suokte’n guom achun a lai u a, zie tak chuh ahi tuisutdawk nak nei a muhdawk nau chuh.

²⁰Tichun Gerar khuo a ganchingte chun, “Tui hi kei u a ahi,” ti’n Isak ganchingte chu tawh a kiniel u a: tichun amah tawh a kiniel tâk ziek u chun tuisutdawk min ding chun “Esek” a sa ta a.

²¹Isak suokte chun tuisutdawk dang a lai kit u a, zie chu le chuh guon a kiniel kit u a: tichun a min ding in “Sitnah” a sa kit a.

²²Zie apat chun a kichawn kit a, tuisutdawk dang a lai kit a. Zie chung achun kinielna a um ta puoi. “LALPA’n ei nawplen sak ta a, khawsathei ta’ng ka,” ti’n a min ding chun “Rehoboth” a sa ta a.

²³Isak chun zie mun chuh a nusieh a, Beer-sheba ah a chieh to a.

²⁴Zie zan chun LALPA chuh a kawmah a hung kilak a, “Kei hi na pa Abraham Pathien chuh ka hi: lau ki’n, na kawmah ka um hi, vang hun pie’ng ka ting, ka suokpa Abraham ziekin na suonte chuh hun hihpung ding ka hi,” a ti a.

²⁵Tichun, zie tak achun maichâm a siem a, LALPA min chuh a lo a, zie tak achun puon-In le a zak a: a suokte’n zie tak achun tuisutdawk a lai kit ui.

²⁶Chun, Gerar khuo apat in Abimelek chuh a guolpa Ahuzat tawh, a sepaih lawiupa Phikol tawh Isak kawmah a chieh u a.

²⁷Isak chun a kawmah, “Nei hawu a, na kawm u apat in nei sawlmang ngâl u a, bang zieka ka kawma hung na hiu hi?” a ti a.

²⁸Amau chun, “LALPA chuh na kawmah a um hi tih chientakin ka heu a, kei u leh nangmah kal ngêi ah kitiemna um hen. Na kawmah thu ei gawlh sak in ti ka hiu hi;

²⁹Nang dinga thil phalo bangmah ka hih khâkloh mah bang un leh, thilpha mai tihloh chuh na chungah bangmah ka hihloh bangun leh, thamuong taka ka hun chiehmang sak guol un, kei u chung ale sietna ding bangmah na hih lohna dingin tuhin nang chuh LALPA vangsakna mu na hi ta hi,” a tiu a.

³⁰Isak in amau dingin guolvakna a siem a, a neu in, a dâwn tau hi.

³¹A zingkal kit chun a kihâksiel gêl gêl tau a: Isak chun chibai pie’n guolchân pha tak guolin a kikhen tau hi.

³²Chun, zie ni mah mah chun Isak suokte chuh a hung u a, a tuisutdawk laih chanchin uh a hung gen u a, a kawmah, “Tui ka mu tau hi,” a tiu a.

³³Tichun zie tuisutdawk chuh “Shiba” a sau a: zieziekchun ahi zie khuo min chuh tuchan hin “Beer-sheba” sak a hih tâk chuh.

³⁴Esau chuh kum sawmli mi ahih in, Hit mi Beeri chanu Judit leh Hit mi, Elon chanu Basemet zi’n a nei a:

³⁵Ziete chuh Isak leh Rebekah lungthim sugimthei sekte chuh ahiu hi.