Read Gangte THILSIEMBUL 27 Bible Online

THILSIEMBUL 27 - Gangte bible

THILSIEMBUL 27

¹Isak chuh a hung têk a, a mit a hung thim ta a. A chapa upa zaw Esau chuh a sama, a kawmah, “Ka chapa,” a ti a. Chun, amah chun “Zie hin ka um hi,” ti’n a dâwng a.

²Chun, Isak chun, “Ngaitie, ka têk ta a, ka thih ni ding ka he puoh ngâla.

³Khutichun, tuhin na matchâk thalpi leh na thalbawm chawi inla, gamvak in chieh inla, sakhi ei va kap sak inla;

⁴Chun, ka thih ma a ka hun vangsak theih na dingin, ka duh dân takin meh ei huon sak inla, ei hun chawihsak in” a ti a.

⁵Isak in a chapa Esau a hopih lai chuh Rebeka’n a na ngaitha zing a. Esau chuh gamvak a sakhi hun puo dingin gamlak ah a chieh ta a,

⁶Rebekah chun a chapa Jakob kawmah, “Ngaitie, na pa’n na u Esau kawmah,

⁷‘Sakhi sa ei hun chawihsak inla, ka nek a, ka thih ma a LALPA masanga ka hun vangsak theihna dingin, meh lim takin ei huon sak in,’ a tih ka hêi.

⁸Khutichun, tuhin ka chapa, thu ka hun piek bang zelin ei ngaitha’n.

⁹Ganhawn lak ah va chieh inla, kelno hawihtak tak nih ei va lâksak in; tichun ziehaw chuh na pa nek dingin a duh dân takin meh lim tak na huon sak ing ka.

¹⁰A thih ma a vang a hun piek theihna dingin, a nek dingin na pa kawma na va chawihsak ding ahi,” a ti a.

¹¹Chun, Jakob chun a nu Rebekah kawmah, “Ka u Esau chuh mul hau tak ahi a, kei chuh mi mâm tak ka hi ngâla.

¹²Ka pa chun ei na tham viel kha’n tin, amah thêm ka hih hedawk intin, vangpiek malak in hansie buokkhum hi zaw kha’ng ka ie,” a ti a.

¹³Chun, a nu chun a kawmah, “Ka chapa, na hansie thuok ding chuh kei chungah chu hen: ka thu zawp inla, ei va lâksak mai in,” a ti a.

¹⁴Khutichun, a chieh a, a va la a, a nu kawmah a hun chawi a: tichun a nu chun a pa duh dân tak chun meh lim takin a huon ta a.

¹⁵Chun, Rebekah chun a chapa upazaw Esau silhlechen hawih pên chuh a la a, a chapa naupang zaw Jakob chuh a kivan sak ta a;

¹⁶Tichun, a khut leh a ngâwng mâmlai haw achun kelno vun haw chule a belh a.

¹⁷Meh lim tak leh chângthâk a siem haw chuh a chapa Jakob khut achun a pie a.

¹⁸Tichun, Jakob chuh a pa kawmah a chieh ta a, “Hepa,” a ti a. “Zie hin ka um hi, ka chapa kuo zaw na hi” ti’n a na dâwng a.

¹⁹Chun, Jakob chun a pa kawmah, “Na chapa, upazaw Esau ka hi; nei sawl bang khan ka hih zo ta a: lungsiet takin hung tho inla, vang nei piek theihna dingin chu’n la, ka sakhi sa hi neh le,” a ti a.

²⁰Isak chun a chapa kawmah, “Ka chapa, bangti dana leh, na hun mu vak zieng na e?” a ti a. Chun, amah chun, “LALPA na Pathien chun ei lawhtin sak ziek ahi,” a ti a.

²¹Isak in Jakob kawm achun, “Ka chapa, lungsiet takin hung nai tie, hun na tham viel ing ka, ka chapa Esau na hi ngêi nai mawh,” a ti a.

²²Tichun, Jakob chun a pa Isak chuh a va naih a; chun, amah chun a na tham viel a, “A aw chula Jakob aw ahi a, a khuthaw hila Esau khut ahi ngâla” a ti a.

²³Tichun, a u Esau khut banga a khut a mul ziek chun amah chuh a he thei puoh a, khutichun a vangsak ta a.

²⁴“Ka chapa Esau na hi ngêi na maw?” a ti a. Chun, amah chun, “Hi e,” a ti a.

²⁵Chun, amah chun “Sa chuh ei hun chawihsak tie leh, ka hun vangsakna dingin ka chapa sakhisa chuh ana ne’ng ka” a ti a. Chun, a hun chawi naia, a ne ta a; uain chule a dâwn a.

²⁶Chun, a pa Isak chun a kawmah, “Ka chapa, hung nai inla, ei châwp in,” a ti a.

²⁷Chun, a va naih a, a châwp a, a silhlechen gim chuh a he a, vang a pie a, “Ngaiin, ka chapa gim hi LALPA vangsak gam gim bang ahi:

²⁸Tichun, Pathien in van dâichîm leh, Lei phatna leh, buh tamtak leh uain tamtak hun pie henla.

²⁹Nam chuom chuomte’n na na sem u henla, Chi chuom chuomte’n chibai hun bûk u hen: Na suohpihte chungah lal in um inla; Na nu chate’n chibai hun bûk u hen: Hansie hun lawh ta chuh hansiet in um u henla, Vang hun pie ta chuh vangsak in um u hen,” a ti a.

³⁰Chun, hiti hi ahung hi a, Isak in Jakob vang a piek zawh phet chun, Jakob chuh a pa Isak kawm apat a hung pawt man chauh in a u Esau chuh a gamvak na apat chun a hung tunga,

³¹Amah chun le meh lim tak in a huon a, a pa kawmah a hun chawi a. A pa kawmah “Hepa, tho inla, vang nei piek theihna dingin na chapa sakhisa hi neh le,” a ti a.

³²Chun, a pa Isak chun a kawmah, “Kuo na hi?” a ti a. Amah chun, “Na chapa upazaw Esau ka hi,” a ti a.

³³Tichun, Isak chuh nasatak in a kithing a, “Na hung ma a sakhi sa, ka kawma hun chawi a, ka nek zawh vek a, vang ka na piek khah kuo ahi die leh? Amah chuh ka vangpiekna nunung pên chuh ka pie ta a, kumkhuo a a chan ding chuh hita’na,” a ti tai.

³⁴Chun, Esau in a pa thugen chuh a zak phetin, thasie takin hah kah in a kap a, a pa kawm achun, “Aw hepa, kei hi, kei hile ei vangsak tei in,” a ti a.

³⁵Chun, amah chun “Na nau in ei hung them a, na vangsakna chuh a hun lâksak ahi ta chu” a ti a.

³⁶Chun, amah chun, “Tuhi nihvei ei chuhthâk na a hita a. Amin Jakob ahih hi a mak puoi; cha upa ka hihna ei lâksak a, tuhi ka vangsakna ei lâksak kit a. Kei a dinga vangsakna chuh sit talo na him?” a ti a.

³⁷Chun, Isak chun a dâwng a, Esau kawmah, “Amah chuh na chunga thunei in ka siem a, a suohpihte chengcheng le a suok dingin ka pie veka. Buh leh uain le ka pie a, nanga dingin banga ka hun hih sak tâk ding, ka chapa!” a ti a.

³⁸Chun, Esau chun a pa kawmah, “Hepa, vangsakna khat chauh ahim na neih? Aw hepa, ei vangsak in, kei le ei vangsak tei tei in,” a ti a. Tichun, Esau chuh ngeih tak in a kap ta a.

³⁹Chun, a pa Isak chun a kawmah, “Na chênna ding chuh lei phatna mun, Chunglam apat a van dâichîm kiek na mun hi’n a.

⁴⁰Himahleh, na chemzâm in hing in na tin, na suohpihte suok in um in la. Chun hiti hi hung hi’n tin, na hel phat chuleh a thunuoi apat chun pawtdawk inla,” a ti a.

⁴¹Chun, a pa’n a vangsak ziek chun Esau chun Jakob chuh a mudah ta a, Esau chun a lungthim in, “Ka pa sûnna ding ni chuh a nai ta a, zie tak chuleh ka nau Jakob hi that mai ing ka,” a ti tai.

⁴²Chun, a chapa upa Esau thugen chuh Rebekah a hilh u a; tichun, mi a sawl a, a chapa naupang zaw Jakob chuh a sama, a kawmah: Ngaitie, na u Esau hi nang hun thah chuh a kingakna ahi mai hi.

⁴³Khutichun, ka chapa, tuhin ka thu hi zawp in; kipan inla, Haran khuo a ka suohpihpa Laban kawmah taimang inla;

⁴⁴Na u lungnatna hi a haih masang sieh a kawmah ni bang zah ahim va um tadih in;

⁴⁵Na chunga na u lungnatna hi a beih a, a chunga na thilhih hi a hetngilh tak leh mi hun sawl ing ka ting zie apat chun hun puih dawk sak ing ka; bang dingin e ni khat thu a na nih u a ka hun cha’n ding? a ti a.

⁴⁶Chun, Rebekah chun Isak kawmah, “Hit chanute ziekin hin hi ka khawp mah mah hi, Jakob in zie gam nungak, Hit chanute hih zi’n hun nei kit nalai vang leh keia dingin hin hi banga phachuom ding?” a ti a.