Read Gangte THILSIEMBUL 28 Bible Online

THILSIEMBUL 28 - Gangte bible

THILSIEMBUL 28

¹Tichun, Isak in Jakob a sama, vang a pie a, a kawmah, Kanaan gam nungak zi a na neih loh ding ahi, ti’n thu a pie a.

²“Kipan inla, Padan-aram gama, na nu pa Bethuel In ah chieh inla, zie chun na nu suohpihpa Laban chanute laka khat va kichênpih ah.

³El Shaddai Pathien chun hun vangsak intin, nam tamtak te pa na hung hihtheihna dingin, suonlepak tamtak hun neihsak in, hun hihpung hen;

⁴na malzinna gam, Pathien in Abraham a piek hi, na luohna dingin Abraham vangsakna a piek bangin vang hun pie hen la, nang leh na suonte le,” a ti a.

⁵Tichun, Isak chun Jakob chuh a sawlmang ta a; Padan-aram gama Jakob leh Esau nu Rebekah suohpihpa Bethuel chapa, Laban kawm achun a chieh tai.

⁶Chun, Jakob chuh Isak in a vangsaka, zi nei dingin Padan-aram gam ah a sawl hi tih Esau chun a he ta a. Isak in vang a piek lai khan Kanaan numeite kichênpih lo dingin le thu a piei tih a he a.

⁷Chun, Jakob chun a nu leh pa thu zawp in Padan-aram gam ah a chieh tai tih le a hedawk ta a.

⁸Esau chun a pa Isak in Kanaan gam nungakte chuh a deih puoi tih a he a

⁹Tichun, Esau chuh Ishmael kawmah a va chieh a, Abraham chapa Ishmael chanu Mahalath, Nebaioth suohpih nu chuh a zi neih sate banah zi’n a neih beh lap hi.

¹⁰Chun, Jakob chuh Beer-sheba apat in a pawt a, Haran khaw lam a zuon ta a.

¹¹Chun, khawitak mun ahim khat hi ava tunga, ni atum tâk ziekin zie tak achun a giek ta a; chun, zie muna suong khat chuh a la a, khapchâk in a mang a, ipmu dingin a kuol tai.

¹²Chun, mang a nei a, lei apat a van chana lei kidawh leh a chunga Pathien vânsâwlchâk te kum leh kal haw chu tawh a mu ta a.

¹³Chun, ngaitie, a sip achun LALPA a dinga, “Kei hi LALPA, na pu Abraham Pathien leh Isak Pathien chuh ka hi: na kuolna lei khah nang leh na suonlepak te hun pie’ng ka.

¹⁴Chun, na suonte chuh leia pîlnel zah hiu intin, suohlam leh tumlam leh simlam leh mâllam haw ahin hung kithehzak un tin: nang leh na suonte achun khawvel a namtin vangsak in um un au.

¹⁵Chun, ngaitie, na kawmah ka um a na chieh na taphawt ah hun vangsak zel ing ka ting, zie gam ahin hun puikit ing ka; Na kawma ka thugen hi ka hih masieh chuh hun thahtham lo hiel ding ka hi,” a ti a.

¹⁶Chun, Jakob ipmu chuh a hung khanglo a, “Ka na he puoh na a chuh; zie mun ahin LALPA chuh a um ngêi hi,” a ti a.

¹⁷Tichun, a lau a, “Zie mun hi a lauh-um na e, ziehi mun dang hilo in Pathien In ahi hila, ziehi van kawtkhak ana hi hi uo,” a ti a.

¹⁸Chun, Jakob chuh zingkal matak in a tho a, suong khapchâk a a mat chuh a la a, hetzingna dingin a phut a; a sip achun sathau a sung a.

¹⁹Zie mun min ding chun Bethel a sa a: a khuo min chu vang a tûngin Luz ahi.

²⁰Chun, Jakob in LALPA kawmah thu a tiem ta a, “Ka kawma na um a, ka zinna lampi ahi nei venbit a, nek ding leh silhlechen nei piek a,

²¹ka pa In lam a bit taka ka kilehkit chun ka Pathien hi’n la,

²²Zie hetzingna suong ka phuhna mun hi nang hun hona mun hi’n tin, nei piek taphawt apat chun sawma-khat pie zel ing ka,” a ti a.