Read Gangte THILSIEMBUL 3 Bible Online

THILSIEMBUL 3 - Gangte bible

THILSIEMBUL 3

¹Chun, LALPA Pathien in ganhing a siem chengcheng lak achun gûl a gukhah pên a. Tichun amah chun numei kawm achun, “Pathien in, ‘Huon a thinggah mawngmawng hi na nek loh ding uh ahi,’ a ti maw?” a ti a.

²Chun, numei chun gûl kawm achun, “A ti puoi, huon a thing gah haw hi ka ne thei uh a puo:

³Amahvang chuh, huon lailung taka thinggah vang hi chuh Pathien in, Na nek loh dinguh ahi a, suk le na sukkhak loh dinguh ahi, khutilochun thi’n lau, a tih ahi,” a ti a.

⁴Chun, gûl chun numei kawm achun, “Thi hiel puo’n lau;

⁵Na nek niu apat chun na mit uh hung vak intin, asie leh apha he’n Pathien hung bang ding na hiu hi tih Pathien in a he a ahi chu!” a ti a.

⁶Tichun, numei chun thinggah chuh nek tuok tak ahi tih leh mitla tak leh duhchak um tak, misuching thei ahi tih a het phet chun, agah chuh a lo a, a ne ta a, a pasal le a pie a, amah chun le a ne ta a.

⁷Tichun a nih un a mit uh a hung vak ta a, sangawn ahih uh a hung kihedawk tau a; tichun, a chên dingun theipi nah a khui khawm u a, a kituom tau a.

⁸Chun, nitâk ni nem chun huon achun LALPA Pathien hung thawm chuh a zau a; tichun Adam leh a zi chun huon a thing lak achun LALPA Pathien chuh a kisel san tau hi.

⁹Chun, LALPA Pathien chun Adam chuh a sama, a kawmah, “Adam, Khawitaka um na hi?” a ti a.

¹⁰Chun, amah chun, “Huon a na thawm ka za a, sangawn a um ka hih ziekin ka lau ta a; a na kisel ka hi,” a ti a.

¹¹Chun, amah chun, “Sangawnna hih kuo hun hilh a? Thing gah nek loh ding ka tih kha na nek ahi maw?” a ti a.

¹²Adam chun, “Ei umpih dinga numei nei piek ngêi khan thinggah chuh ei pie a, ka nek ahi tai,” a ti a.

¹³Chun, LALPA Pathien chun numei kawm achun, “Na thilhih hi bangti dân ahi ta?” a ti a. Numei chun, “Gûl in ei thêm a, ka na nek ahi,” a ti a.

¹⁴Chun, LALPA Pathien in gûl kawm achun, “Zie bang thil hi na hih ziekin ganhing chengcheng leh gamsa tincheng lak ah hansie dawl in um chuom in na tin, bawkvak in chieh zing ta’n la, chun, na damsung chengin leivui ne ta’n la.

¹⁵Chun, nang leh numei hi hun kidosak ing ka ting; nang suonte leh numei suon le kido sak ing ka; amah chun na luchang khên thidup intin nangin a khawtalzum chu thidup in la,” a ti a.

¹⁶Chun, numei kawm achun, “Na gimtheihna leh na nauvawpna chuh nasa takin supung ing ka ting, gimthei takin cha nei sek inla; himahleh na utna chuh na pasal lam hi’n tin, amah chun na chungah thu nei zing ina,” a ti a.

¹⁷Chun, Adam kawm achun, “Na zi thu na zawp a, thing khat, A gah na nek loh ding ahi, ti a thu ka hun piek khah na nek tâk ziekin lei hi nang ziekin hansie dawl ahi ta a; zieziekchun, na damsung chengin gim taka sem in a gah chuh ne ta’n la;

¹⁸Ling leh buolte le hun pawtsak intin; chun leia thai chuh ne ta’n la.

¹⁹Chun, leia na vaihkit ma chengin na maia khawsa-ul luong in nek ding kimuh ta’n la; leia pata lâkdawk na hi ngâla; leivui na hi a, leia vaikit ding na hi,” a ti a.

²⁰Chun, Adam chun a zi chuh mihing chengcheng nu a hih ziekin a min dingin Evi a sa a.

²¹Chun, LALPA Pathien in Adam leh a zi a dingin savun puonâk chuol haw a siem sak a, a aksak ta a.

²²Chun, LALPA Pathien in, “Ngaitiem u, mihiem chuh asie leh apha he’n ei u laka khat tawbang a hung hi ta a, tuhin chuh a khut a ban in, hinna thinggah chuh lo a ne’n kumkhuo’n hing kha’n au,” a ti a.

²³Zieziekchun LALPA Pathien in amah a lâkdawkna lei chuh let dingin Eden huon apat chun a sawldawk ta a.

²⁴Khutichun, mihiem chuh Eden suohlam achun a nawhdawk ta a; chun, hinna thing lampi chuh veng dingin Eden huon suohlam pang achun Cherub te leh meiko chemzâm kipei tuoh zing chuh a kawih ta a.