Read Gangte THILSIEMBUL 30 Bible Online

THILSIEMBUL 30 - Gangte bible

THILSIEMBUL 30

¹Chun, Rachel chun Jakob chuh cha himhim a hinsak puoi tih a kihet phet chun, a suohpihnu chuh a itthik ta a; Jakob kawm achun, “Cha haw ei pieh, ahihloh leh thi ding ka hi,” a ti a.

²Jakob chuh Rachel chungah a lungna a, a kawmah, “Na gil a gah hun phalsak lo pa Pathien thasang chuh ka hi a ahim?” a ti a.

³Amahnu chun, “Entie, zie hin ka suoknu Bilhah a um a, kuolpih inla, kei a dinga cha ei hinsak theihna dingin. Tia chuh amah zieka nu ka hunghih theihna dingin, ka pheichung ahin cha hun hing ding ahi” a ti a.

⁴Tichun a suoknu Bilhah chuh zi dingin a pie a: chun, Jakob in amah chuh a na kuolpih a.

⁵Bilhah chun nau a vawp a, Jakob chuh chapa a hinsak a.

⁶Chun, Rachel chun, “Pathien in ei ngaihtuoh a, ka aw le a za a, chapa ei piek ahi hi,” a ti a: tichun a min dingin Dan a sa a.

⁷Chun, Rachel suoknu Bilhah chun nau a vawp kit a, Jakob chuh chapa dang a hinsak kit a.

⁸Rachel chun, “Pathien buon in ka suohpihnu ka buon a, ka zo tai,” a ti a: tichun a min dingin Naphtali a sa a.

⁹Chun, Leah chun cha dang a nei thei kit tadih puoi tih a kihet phet chun, a suoknu Zilpah chuh a pui a, a zi dingin Jakob chuh a pie tai.

¹⁰Tichun.Leah suoknu Zilpah chun Jakob chuh chapa a hinsak a.

¹¹Leah chun, “Vangphat a um na e,” a ti a: tichun a min dingin Gad a sa a.

¹²Leah suoknu Zilpah chun Jakob chuh chapa dang a hinsak kit a.

¹³Chun, Leah chun, “Ka kipâk na e! Numei haw chun vangpha ei sa mah mah ding ahiu hi,” a ti a: tichun a min dingin Aser a sa tai.

¹⁴Chun, buh ât lai in Reuben in lo ah zawldeih-âi a va mu a, a nu Leah kawmah a hun chawi a. Khutichun Rachel in Leah kawmah, “Lungsiet takin na chapa zawldeih-âi kha neukhat ei pie tie,” a ti a.

¹⁵Leah chun a kawmah, “Ka pasal nei lâksak hi hun sa nailo maw? Ka chapa zawldeih-âi hi lâksak nei guo kit nalai a,” a ti a. Rachel chun, “Na chapa zawldeih-âi nei piek leh, tuzan hin hun kuolpih thei ina,” a ti a.

¹⁶Tichun, nitâk lam in Jakob chuh lo apat in a hung a, Leah chuh a dâwn ding in a va pawt a, “Nei kuolpih ding ahi; ka chapa zawldeih-âi in ka hun gawih na hita ngâl a,” a ti a. Tichun, zie zan chun a kuolpih tai.

¹⁷Chun, Pathien in Leah pauchamna chuh a ngaitha a, tichun nau a vawp a, Jakob chuh chapa ngana a hinsak kit a.

¹⁸Leah chun, “Ka suoknu ka pasal kawma ka piek ziekin Pathien in ka lawh ei piek ahi ta hi,” a ti a: tichun a min dingin Issakar a sa a.

¹⁹Chun, Leah chun nau a vawp kit a, Jakob chuh chapa gupna a hinsak a.

²⁰Leah chun, “Pathien in thil ken pha tak in ei thuom a ka pasal chuh chapa gupna ka hinsak tâk ziekin tuhin chuh ei pawm det ta’n a,” a ti a: tichun, a min dingin Zebulun a sa a.

²¹Zie nung chun chanu a hing kit a, a min dingin Dinah a sa a.

²²Chun, Pathien in Rachel chuh a hezing a, tichun Pathien in a pauchamna a ngaitha a, a sûl a hawn sak ta a.

²³Tichun nau a vawp a, chapa a hing ta a: “Pathien in ka minsietna ei lâkmang sak tai,” a ti a.

²⁴Tichun, amin dingin Joseph a sa a, LALPA’n chapa dang ei piekbeh kit hen, a ti a.

²⁵Chun, hiti hi ahi a, Rachel in Joseph a hin nung in, Jakob in Laban kawmah, “Kei mah umna ngei mah, ka gam lam u a ka chieh theihna dingin ei chieh sak tah.

²⁶Na na ka sep lawh pên ka zite leh ka chate hi ei pie’n la, ei chiehsak in, na ka hun sepsak dân kha na he ngâl a,” a ti a.

²⁷Laban chun a kawmah, “Nei lungsiet theih chun um tadih in: LALPA chun nang ziekin vang ei piei tih aisân in ka he a puo,” a ti a.

²⁸Amah mah chun, “Na lawh ding gen inla, tichun hun pie’ng ka,” a ti a.

²⁹Jakob in a kawmah, “Na na bang ka ti sep ahim, na ganchate chuh bangti’n ka kawmah a um um tih na he a puo.

³⁰Ka hung ma khan tawmchah na nei a, tuhin vang tamtak a hung hi tau hi; ka kiheina lam chengah LALPA’n vang a hun pie zel hi. A hih ziekin bangtik leh keimah inkuon a ding ka sem dawk ta die?” a ti a

³¹Chun, Laban chun a kawmah, “Banga ka hun piek ding?” a ti a Jakob chun, “Bangmah ei pie kih: zie thil hi nei hihsak chun na ganhawnte vakin, ching kit ing ka:

³²Tuni’n na gan hawnte va en suok vek ing ka ting, belam laka a vawma-sihkap leh a vawm in a hel pawl phelhphulh leh a vawm taphawt leh, kel laka a kang a sihkap leh a kang in a hel pawl phelhphulh haw chuh zie apat chun puichuom zel ing ka: tu apat a khutibanga hung pieng taphawt chuh ka lawh ding hita hen.

³³Tunung leh ka ginumna chuh baihlam takin mudawk thei inla. Ka lawh enchien dinga na hung a, kelcha a pawl lo ahim, a sihkap lo ahim, belam a vawm lo ahim, ka neih chun, zie chuh ka gûk ahi tih he zieng inla,” a ti a.

³⁴Chun, Laban chun, “Ngaiin, na gen bang tak chuh hi hen,” a ti a.

³⁵Tichun zie ni ngêi chun kêlchal a kang a zetan leh, a kang in a hel phelhphulh cheng leh, kelnu a kâng têlna phawt leh, a kang in a hel phelhphulh chengcheng, a kâng telna phawt chuh, belam laka a vawm haw chengcheng chu tawh a puichuom a, a chapate khut ah a pie a;

³⁶amah leh Jakob kikal ni thum chiehna a gamla achun a umsak a; chun, Jakob chun Laban ganhawn dang chengcheng chuh a ching kit ta a.

³⁷Chun, Jakob chun hiengzau leh zuonmuot leh siething tuoi haw chuh a la a, a hawng a khawk vam a, mawlhhaw achun a kâng chuh a sulang a.

³⁸Chun, mawlh hawng khawh haw chuh gan hawnte’n a hung dâwn sek nau tui dawnna kuonghaw a, tui luonna haw achun, ganhawn azawn zel ah a kawih ta a; chun, tui dâwn dinga a hung tak u leh a gai pan sek u a.

³⁹Tichun, gan hawnhaw chuh mawlh zawn achun a gai pan sek u a, zetan poh, sihkap poh, pawl phelhphulh poh in ano a hung pieng sek u a.

⁴⁰Jakob chun belamno haw chuh a kawihchuom a, chun, ganhawn haw chuh Laban ganhawn laka a zetan leh a vawm chengcheng lam chuh a ngat sak sek a; amah ganhawn haw chuh a kawihchuom sek a, Laban ganhawn lak achun a kawih puoh a.

⁴¹Hiti hi ahung hi a, gancha damthei deuhte chuh a gaih pat tieng u leh mawlh laka a gaih theihna dingun, Jakob chun tui luonna ah, mawlhhaw chuh a kawih sek a;

⁴²amahvang chuh ganhawn damtheilo masang ah vang a kawih sek puoi: khutichun a no hatlo deuhte chuh Laban a ahi zel a.

⁴³Tichun, Jakob chuh nasatak in a hung pung a, ganhawn tamtak takte, suok numeite, suok pasalte, sangawngsaute, sabiltungte a hun nei tai.