Read Gangte THILSIEMBUL 31 Bible Online

THILSIEMBUL 31 - Gangte bible

THILSIEMBUL 31

¹Chun, amah chun Laban chapate’n, “Jakob in ka pau neih chengcheng a lâksak vek a, ka pau apat a hauhsakna a muh ahi,” a tih thuu chuh a hun za ta a.

²Tichun Jakob in Laban maisuoh a en a, tuma guol khan a chungah a pha ta puoi tih a he a.

³Chun, LALPA chun Jakob kawmah, “Nang hun suonte leh na inkawte kawmah chieh kit ta’n; na kawmah um zel ing ka,” a ti a.

⁴Tichun Jakob in mi a sawl a, phul a a ganhawn umna lam achun Rachel leh Leah chuh a sama,

⁵a kawm u ah, “Na pau maisuoh ka et leh, tuma lam guol khan ka chungah a pha ta puoi tih ka he a; himahlele ka pa Pathien chuh ka kawmah a um zing hi.

⁶Na pau na hi ka theihtawp in ka sem hi tih nangun le na heu a.

⁷Himahlele, na pau chun ei thêm a, ka lawh hi sawmvei hiel ei suklamdang sak ta a; himahlele, Pathien in ka chunga thil phalo a bawl dinga phal puoh a.

⁸‘A sihkap a pieng haw chuh na lawh ding hi’n a,’ a tih leh, ganhawn chengcheng chuh a sihkap in a hung pieng sek a; ‘A zetan te chuh na lawh hi’n a,’ a tih leh ganhawn chengcheng chun a zetan haw a hing sek uh a.

⁹Khutibang chun Pathien in na pau gancha haw chuh a lâksak a, kei ei piek ahi.”

¹⁰“Chun, hiti hi ahi a, ganchate chuh a gaih pat lai u chun, ka mang lam in gancha anu hawnhaw chuh, a zetan haw, a sihkap haw, a zekai zengzung haw ahiu hi tih ka mu a.

¹¹Ka mang chun Pathien vânsâwlchâk in, ‘Jakob,’ ei hun ti a: ‘Zie hin ka um hi,’ ka ti a.

¹²Amah chun, ‘Vak dâk inla, en in, a chal gancha bawh haw chengcheng khu: a zetan haw, a sihkap haw, a zekai zeng zung haw ahiu khu: Laban in na chunga thil a hih cheng hi ka mûi.

¹³Kei hi suongphuh a thau na nuhna, ka kawma thu na tiemna, Bethel Pathien kha ka hi: tuhin kipan inla, zie gam apat hin pawt inla, na pienna gam achun chieh kit ta’n,’ ei tii,” a ti a.

¹⁴Chun, Rachel leh Leah chun a dâwng u a, a kawmah, “Ka pau In achun kei u dingin chanvo leh goluoh ding himhim a um ta puoi.

¹⁵Amah chun malzin bangpheta ei ngaih hi talo ahim? Ei zuok a, ka man u le a ne zo vek ta ngâl a.

¹⁶Pathien in ka pau sum a lâksak chengcheng chuh kei u a leh ka chateu a ahi hi: khutichun Pathien in na kawma a gen takphawt chuh hihin,” a tiu a.

¹⁷Tichun Jakob chuh a kipan a, a chapate leh a zite chuh sangawngsau chungah a chuon sak a;

¹⁸Kanaan gama a pa Isak kawma chieh dingin a ganhawn chengcheng leh a sum khawlkhawm chengcheng, a gancha muh haw, Padan-aram gama a khawlkhawm haw chuh a chiehdawk pih vek ta a.

¹⁹Chun, Laban chuh a belam mul met dingin a chieh ta a: chun, Rachel in a pa milim haw chuh a gu a.

²⁰Chun, Jakob chuh Suria mi Laban hetloh kâl in a chieh ta a, taihmang a guot chuh a hilh puoh a.

²¹Tichun, a neih chengcheng chu tawh kintak in a taimang ta a.tichun Euphrates luipi chuh a kân u a, Gilead tâng gam lam chuh zuonin a kipandawk tau hi.

²²Chun, zie nung ni thum ni chun Jakob a taimang hi tih Laban a hilh u a.

²³Tichun a mite a pui a, ni sagih lam chanin a delh u a, Gilead tâng achun a delhpha tau a.

²⁴Chun, Suria mi Laban kawm achun a mang in Pathien a hung kilak a, a kawmah, “Jakob kawmah a sie, apha bangmah gen lo dingin chingthei ah,” a ti a.

²⁵Chun, Laban chun Jakob chuh a delhpha ta a. Jakob in a puon-In chuh tâng achun a na zak a: chun, Laban inle a suohpihte chu tawh Gilead tâng achun a zak u a.

²⁶Laban chun Jakob kawmah, “Na thilhih hi bangti dân ahi, ka het loh kal a na chiehmang kêi mai u hih, suok a um guol maia ka chanute na na puihmang hih?

²⁷Bang zieka gûk a taimang a, nei kilep san ahi? Kipahna tawh, la haw tawh, khuong haw tawh, kingkang haw tawh ka hun thak theihna dinga bang a ti a nei hilh loh hiel ahi?

²⁸Ka tute leh ka chanute ka châwp phal lo in ngawlhuoi takin ahi thil na hih hi.

²⁹Hun susie thei ka hi a puo: himahlele na pa Pathien in thangni zan khan, ‘Jakob kawma a sie, apha bangmah gen lo dingin chingthei in,’ ti’n ei hopih ahi.

³⁰Chun, na pa In na ngaih mah mah zieka chieh nuom mah mah hileh chinle, bang zieka ka pathien haw nei gûk sak a?” a ti a.

³¹Jakob chun a dâwng a Laban kawmah, “Na chanute hi nei pawng lak sak khan la tih ka lauh ziek ahi.

³²Kuole na pathiente a na muh na taphawt chuh suklup ding hi hen. Ka mite mitmuh ngêi ahin nanga haw chuh enchien inla, kilak in,” a ti a. Rachel in a na gûk ahi tih Jakob in a he puoh ngâla.

³³Chun, Laban chuh Jakob puon-In haw, Leah puon-In haw, suoknu nih te puon-In haw achun a lut zel a; himahleh a mu zo puoh a. Chun, Leah puon-In apat chun a pawt a, Rachel puon-In achun a lut kit a.

³⁴Rachel chun milim haw chuh a na la a, sangawngsau van haw lak achun ana kawih a, a na chutphah tai. Tichun, Laban chun a puon-In sung chengcheng chuh a hawl suok kêi a, himahleh a mu puoh a.

³⁵Chun, Rachel chun a pa kawmah, “Na ma a ka dindawk theih loh ziek hin, ka lalpa lungna hiel ki’n; numei dân ngeina chuh ka neih lai tak ahi ngâl a,” a ti a. Tichun a hawl a hawl a, himahlele milim haw chuh a mu zo ta puoh a.

³⁶Tichun, Jakob chuh a lungna ta a, Laban chuh a hânkhum a, “Banga ka sukkhelhna, banga ka gitlohna, nei hun nung delh hiel mai a?

³⁷Ka thuomphuo chengcheng na phetlek vek ale, na insung thuomphuo himhim banga na muh um? Eite nih kalthu hi ngaihtuoh ahih theihna dingin ka suohpihte leh na suohpihte ma ahin suklat hi hen.

³⁸Kum sawmnih hiel na kawmah ka um ta a; na belam haw leh na kelpihaw chuh ano asie kha puoh a, na belam hawn laka a chal haw le ka meh kha puoh ngâl a.

³⁹Gamsa peh haw le na kawmah ka hun tut kha puoh a; ken a manghaw thasang chun ka thuok zaw sek a; suna kigu ahim, zan a kigu ahim haw chule ka hun ditkit na ngek sek hi.

⁴⁰Hitibang hin ka um sek a; suna nisa leh zan a khawvawt in ei sugimthei mah mah sek a; ih le ka ip kha sek puoi.

⁴¹Zie kum sawmnih sung cheng chuh na In ah ka um a; na chanu te nih lawh dingin kum sawm leh li na na ka sem a, na ganchate lawh dingin kum gup ka sem kit a; ka lawh chuh la sawmvei hiel nei suklamdang sak nalai a.

⁴²Ka pa Pathien, Abraham Pathien, Isak in a lauh chuh, ka kawma umlo hile vang chuh, tuhin le ngawnchang a ei chieh kit sak ngêi ngêi ding na hi hi. Pathien in ka liengvaih dân leh ka sepgim dân hi a mu a, thangnitak a chuh a hun hilhgaih ahi chu,” a ti a.

⁴³Laban chun a dâwng a, Jakob kawmah, “Zie numei haw hi kei chanu te ahiu a, naupanghaw hi kei naupanghaw ahiu a, gancha haw hi kei gancha ahiu a, na muh chengcheng hi kei a ngên ahiu hi: tuni hin zie ka chanute chung leh a cha hinteu chung ahin bangmah hih theih ka nei puoi.

⁴⁴Hung tie, kei leh nangin thugawlh siem hiti: zie chuh kei leh nang kal a hetpih ding hi hen,” a ti a.

⁴⁵Tichun, Jakob chun suong a la a, suongpi khuom dingin a phut a.

⁴⁶Chun, Jakob in a mite kawm achun, “Suong hun lakhawm u,” a ti a, chun, suong a lau a, a tiengkhawm u a: chun, suong tienkhawm kawm achun an a neu a.

⁴⁷Laban in zie suong tienkhawm chuh Jegar-sahadutha, a sa a: Jakob in chuh Galead a minvawh hi.

⁴⁸Chun, Laban chun, “Zie suong tienkhawm hi tuni hin kei leh nang kal a hetpih ahi hi,” a ti a.

⁴⁹Zieziekchun a min dingin Galead sak ahi tai. Mizpah le sak ahi a, Laban in, “I kikhen tak u leh LALPA chun ei veng gel henla,

⁵⁰Ka chanute hi na sukgimtheih a, ka chanute tih loh hi zi dang na hun neih chun, I kawmah kuomah a um puoh na a chuh, en in, Pathien chuh nang leh kei kal a hetpih ahi,” a ti a.

⁵¹Chun, Laban mah in Jakob kawmah, “Zie suong tienkhawm hi en inla, nang leh kei kikala zie suong ka phuh hi hetzingna ding ahi.

⁵²Thil kisuksiet sak dingin, ken zie suong tienkhawm hi kan in nang kawm lam ah hung puo’ng ka, tih leh, nang le zie suong tienkhawm leh zie suongphuh hi khel in ka kawm lam ah hung lo ding na hi tih, zie suong tienkhawm hi ei hetpih hi henla, zie suongphuh hile ei hetpih hi hen.

⁵³Abraham Pathien, Nahor Pathien, a pileputeu Pathien chun I kalthu hi ngaihtuoh hen,” a ti kit a. Chun, Jakob chun a pa Isak kihchak chuh sâm in a kihâksiel ta a.

⁵⁴Chun, Jakob chun tâng achun kithawihna a siem a, a mite chuh chângthâk ne dingin a sama: tichun chângthâk a neu a, tâng achun a giek tau a.

⁵⁵Chun, zingkal matak in Laban chuh a tho a, a tute leh a chanute a châwp a, vang a pie a; tichun a kipan a, amah umna lam zuonin a chieh kit ta a.