Read Gangte THILSIEMBUL 32 Bible Online

THILSIEMBUL 32 - Gangte bible

THILSIEMBUL 32

¹Chun, Jakob chuh a chieh zel a, chun Pathien vânsâwlchâkte’n a na kituokpih u a.

²Jakob in amau chuh a muh in, “Ziehaw hi Pathien sepaihte ahiu hi,” a ti a: tichun zie mun min ding chun Mahanaim a sa a.

³Chun, Jakob chun Edom gam lama a u Esau kawm achun thangko a sawl masa a.

⁴A kawm u ah, “Ka lalpa Esau kawm achun hiti ahi na gen dinguh ahi, ‘Na suokpa Jakob in hiti hin a gen a: Laban kawm achun malzin ka hi a, tuchan hin ka va um zing a;

⁵bâwngchal haw, sabiltung leh belam haw, suoknu leh suokpa haw le ka nei a; tichun na mittung ka hih theih na dingin ka lalpa hilh dinga mi ka hun sawl ahi,’ a tii,” ti’n amau chu thu a pie a.

⁶Chun, thangko haw chuh Jakob kawmah a hungkit u a, “Na u Esau kawm ka va tung u a, mi zali hun pui in nang tuok dingin a hung bawn hi,” ti’n a gen u a.

⁷Khutichun, Jakob chuh a lau mah mah ta a, a lung a dawng a: tichun a kawma mi um haw, belam hawn haw, bâwng hawnhaw, sangawngsau haw chuh hawn nih a suoh a,

⁸“Esau chuh lawikhat te kawm a hungtun a, a thah chun, lawikhat um nalaite chuh a taihmang theihna dingun,” a tih ahi.

⁹Chun, Jakob chuh a paucham a, “Aw, ka pu Abraham Pathien, ka pa Isak Pathien, Aw LALPA, ‘Na gam lam leh na inkawte kawmah chieh kit ta’n, tichun hun bawlpha’ng ka,’ ei tipa,

¹⁰na suok chunga lungsietna chengcheng na suklat leh thutak chengcheng na suklat haw lak ahin a neupen le mu tâk ka hi puoi; zie Jordan lui hi ka mawlh mai tawh ka kân a; tuhin vang lawinih hiel ka hung hi tau hi.

¹¹Lungsiet takin ka u khut apat, Esau khut apat ngêi hin, ei hukdawk in: numei leh naupanghaw puma ei thah ding ka lau ngâl a.

¹²Nangin, ‘Hun bawlpha ngêi ngêi ing ka ting, na suonte chuh tuisuohgiet a pîlnel simsenloh khawp hiela a tam guolin hun siem ing ka,’ na ti a,” a ti a.

¹³Zie zan chun zie tak achun a giek ta a; a thil neih haw lak ah a u Esau dinga kipahman dingin a kawihchuom a:

¹⁴kelpi zanih leh kel chal sawmnih, belampi zanih leh belamchal sawmnih,

¹⁵sangawngsau nawi thawklai sawmthum, a no haw tawh, bâwngpi sawmli leh bâwngchal sawm, sabiltungpi sawmnih leh sabiltungno sawm ahiu hi.

¹⁶Ziehaw chuh a chuom chietin a suokte khut ah a kawlsak a; a suokte kawm achun, “Ka ma ah chieh unla, lawi tin hi kikal neihsak zel u,” a ti a.

¹⁷Chun, a masa pa kawm achun, “Ka u Esau in a hun kituokpih a, ‘Kuo mi na him? Khawia chieh ding na him? na masanga um haw hi kuo a ahim?’ ti a a hun dawt tak leh,

¹⁸Na suok Jakob a ahi; ka pu Esau, nang dinga kipahman a a hun thak ahi; amah le ka nung u akhun a hung hi, tiu in,” ti’n thu a pie a.

¹⁹Chun, a bân a leh a bân kit a leh, ganhawn pute chengcheng kawm ale, “Esau na muh tak u leh khuti bangmah a chuh na gen dinguh ahi;

²⁰‘Ngaiin, na suok Jakob chuh ka nung u akhun a um hi,’ tiu in,” ti’n thu a pie chiet a. “Kipahman ka ma a a chieh chun a lung sudam ing ka ting, zie nung chuleh a mel mu’ng ka; tichun ei na lawp kha mawh die,” a tih ahi.

²¹Khutichun kipahman chuh a masangah a thak masa a, zie zan chun a lawite lak achun a giek ta a.

²²Zie zan mah chun a tho a, a zite nih leh, a suoknute nih leh, a cha sawmlekhatte chuh a pui a, Jabok lui kaihmun achun galkai tau a.

²³Tichun amau chuh a pui a, lui chuh a galkaih sak a, a neih chengcheng u le a thak kai a.

²⁴Chun, Jakob chuh amah mai in a um ta a; tichun, mi khatin amah chuh phalvak chanin a buon a buon zieng ta a.

²⁵Chun, a zo puoi tih a kihet phetin a malpi guh kisuktuohna chuh a khawihsak a, tichun a buon lai chun Jakob malpi guh kisuktuohna chuh a hung kipel ta a.

²⁶Chun, amah chun, “Ei thah ah, phalvak hi ding ahi tai,” a ti a. Jakob chun, “Nei vangsak loh leh hun thah puo’ng ka,” a ti a.

²⁷Chun, amah chun a kawmah, “Na min bang ahi?” a ti a. Amah chun, “Jakob,” a ti a.

²⁸Amah chun, “Na min chuh Jakob hita puo’n tin, Israel hizaw ta’n a; Pathien leh mihing na suol a, na zo ta ngâl a,” a ti a.

²⁹Chun, Jakob in amah chuh a dâwng a, “Lungsiet takin na min ei hilh in,” a ti a. Amah chun, “Bang zieka ka min nei dawt ahi?” a ti a. Chun, zie tak achun a vangsak ta a.

³⁰Tichun, Jakob in zie mun min ding chun Peniel a sa a; “Pathien chuh kimaichangtuoh in ka mu a, ka hinna hi hawih ahi ngâl a,” a tih ziek ahi.

³¹Chun, Peniel a khel phet chun ni a hung suok a, amah chuh a hun khawh a, a malpi ziek chun a kibai ta a.

³²Zieziekchun tuni chan hin Israel suonte chun malpi guh kisuktuohna a kâwng a thagui hi a ne ngei puou hi: Jakob malpi guh kisuktuohna a a khelpi tha khawihsak ahih ziekin.