Read Gangte THILSIEMBUL 34 Bible Online

THILSIEMBUL 34 - Gangte bible

THILSIEMBUL 34

¹Chun, Leah chanu Dinah, Jakob a hinsak chuh zie gama nungakte chuh mu ding chun a va pawtdawk a.

²Chun, Hiv mi Hamor, zie gam lengpa chapa Sekem chun amah chuh a na mu a, a man a, a kuolpih ta a, tichun, a suzahhuoi ta a.

³Chun, a lungthim chuh Jakob chanu Dinah chung achun a um zing ta, a zie nungak chuh melhawih tak ahi tih a mu a, a lungsiet a, amah chuh paukam pha tak in a hopih a.

⁴Chun, Sekem chun a pa Hamor chuh a hopih a, “Zie nungak hi zi’n ei neihsak un,” a ti a.

⁵Chun, Jakob in a chanu Dinah chuh Sekem in a hihbuok hi tih a na he a; a chapate chuh phul ah ganhawn chingin a um u a; tichun a hung macheng u chun Jakob in bangmah a gen puoi.

⁶Chun, Sekem pa Hamor chuh Jakob hopih dingin a kawmah a chieh a.

⁷Chun, Jakob chapate chun a het phet un phul apat chun a hung u a: chun, Jakob chanu kuolpih in Israel te lak ah thil gilo ngawlhuoi tak, thil hihloh hiel ding chuh, a hih tâk ziekin a lungkham u a, a lungna mah mah tau hi.

⁸Chun, Hamor chun amau chuh a hopih a, “Ka chapa Sekem ngaihtuohna chuh na chanu chungah a um chak kêi a; lungsiet takin zi’n neihsak un la.

⁹Tichun, kilatuoh hiting un; na chanu teu ei neihsak unla, nang un le ka chanuteu nei u.

¹⁰Tichun ka kawm u ah um unla; na nawpna taphawt u ah cheng unla, zie hin um in, sumkawlvei unla, zie tak ahin mun nei un,” a ti a.

¹¹Chun, Sekem chun Dinah pa leh a suohpihte kawmah, “Ei lungsiet unla, ka kawma na gen takphawt u chuh hih ung kau.

¹²Man leh thilpiek chuh bang zat hitaleh gen unla, na tih bang bang un hun pie’ng ka: abang hitaleh nungak chuh zi’n ei neihsak phawt mai un,” a ti a.

¹³Jakob chapate chun a suohpihnuu Dinah chuh a sukminsiet ziekin, Sekem leh a pa Hamor chuh lungthim bawl in a dawng u a,

¹⁴a kawmah, “Zie tawbang thil, zektan loh mi hi ka suohpihnuu pie thei puo’ng kau; zie chuh kei u dingin minsietna ahi ngâl a:

¹⁵Hitibang a na kitiemna ziek mai u hin na tih dân chuh hun lemsakpih ing kau: na laku a pasal taphawt chuh zektan in, keihaw guolin um unla;

¹⁶Khutichun, ka chanuteu chuh hun neihsak ung ka ting, kei un le na chanuteu nei ka tingun, chun, na kawm u ah um ka ting un, chikhat hung hii tiu.

¹⁷Himahlele, zektan thu a ka thuu na zawp loh ding u chun, ka chanu chuh pui ing ka ting un, chieh mai ing kau,” a tiu a.

¹⁸Chun, a thuu chun Hamor leh a chapa Sekem chuh a sukipak a.

¹⁹Tichun tangval chun Jakob chanu chuh a deih bêk ziekin zie thil chuh sawt hal lo in a hih tau hi; amah chuh a pa inkawte chengcheng laka mi zah pên ahi.

²⁰Hamor leh a pa Sekem chun a khuou kulh kawtkhak chuh a tung u a, khuo a mite chuh a hopih u a.

²¹“Zie mite khu ei u tawh kituok takin a um u a, zieziekchun zie gam ahin um in, taka hin sumkawlvei u hen la, amau dingin gam hi a lien hun ngâl a. A chanuteu khu kichênpih hiting un, ei u chanute le neihsak hitiu.

²²Himahlele, chi khat I hih theihna ding u a I kawm u a chen chuh hitibang a I tiemna mai u hin zie mite khun ei lemsakpih ding ahiu hi, zektan ahih bang un, I lak u a pasal taphawt chuh zektan hung hi leuhing.

²³A ganguolteu, a thil neih teu, a ganchateu chengcheng khu ei u a hung hilo ding ahim? A thuu hi lemsakpih mai hitiu, tichun I kawm u ah cheng ding ahiu hi,” a tiu a.

²⁴Chun, Hamor leh a chapa Sekem thu chuh a khuou kulh kawtkhak a pawt cheng chengte chun lem a sau a; a khuou kulh kawtkhak a pawt chengcheng pasal taphawt chun zek a tan vek tau hi.

²⁵Chun, zie nung ni thum ni a, a natsiet lai tak u chun, Jakob chapate laka mi nih, Dinah suohpihte Simeon leh Levi chun, a chemzâm uh chawi gel in, a gûkin khuo chuh a luh u a, pasal chengcheng chuh a that suok kêi u a.

²⁶Tichun, Hamor leh a chapa Sekem chuh chemzâm in a that u a, Sekem In apat Dinah chuh a puidawk u a, a chieh tau hi.

²⁷Jakob chapate cheng chun khawpi chuh a va ûmbichilh u a, a suohpihnu a sukbuok ziek un khuo chuh a sim tau a.

²⁸A belam hawn teu, a bâwng hawn teu, a sabiltung teu, a khuou a thil um haw, a lo u a thil um haw chuh a lâksak u a;

²⁹a neih leh lam cheng u leh, a chasen hawu leh a ziteu tawh, insung a um taphawt chuh a pawmang tau hi.

³⁰Chun, Jakob in Simeon leh Levi kawm achun, “Nang un zie gama um haw lak ahin Kanaan haw leh Periz te hawt in nei siem u a, nei sulungkham mah mah ui tawmcha ka hih ziekin ei do dingin hung kikhawm khawm untin, ei that mai ding ahiu hi; tichun sukmangthai a um ding ka hi, kei leh ka inkawte hi tawh,” a ti a.

³¹Chun, Amau chun, “Ka suohpihnuu hi nawhchizuok bawla a bawl dinguh ka phal puou hi,” a tiu a.