Read Gangte THILSIEMBUL 35 Bible Online

THILSIEMBUL 35 - Gangte bible

THILSIEMBUL 35

¹Chun, Pathien in Jakob kawm achun, “Kipan inla, Bethel ah chieh inla, zie chun um ah: Na u Esau kawm apat a na taihmang lai a na kawma kilak Pathien ding khan zie chun maichâm siem in,” a ti a.

²Chun, Jakob in a inkawte leh a kawma um cheng chengte kawm achun, “Na lak u a midang pathien um haw chuh kawihmang kêi un; kisuthieng unla, na silhlechen hawu theng un:

³Kipan hiting un, Bethel ah chiehto hitiu; tichun ka lungzîn laia ei dâwng a, ka chieh na cheng a ka kawma um zel Pathien a ding khan maichâm siem ding ka hi,” a ti a.

⁴Tichun midang pathien a khut u a um chengcheng leh a bil u a bilbah a bah chengcheng u chuh Jakob a pieu a; chun, Jakob chun Sekem khaw kienga gangpi thing nuoi achun a vui tai.

⁵Chun, Jakob leh a chate chuh chieh dinga a kipat lai u chun, a kimvel uh a mite chung achun lauhna nasatak a tung ta a, a delhzui ngam ta puou hi.

⁶Khutichun, Jakob chuh a kawma um cheng cheng tawh Luz khuo a tung u a, zie chuh tu a Kanaan gama Bethel kiti hi ahi.

⁷Chun, zie tak achun maichâm a siem a, a u kawma pata a taihmang lai khan zie taka chuh a kawma Pathien a kilak ziekin, a mun chuh El-Bethel a sa ta a.

⁸Chun, Rebekah dawnnu Deborah chuh a thi a. Bethel suohlam a gangpi thing nuoi achun a vui u a: gangpi thing min chuh Allon-bakuth a sa ta a.

⁹Chun, Jakob chuh Mesopotamia gam apat a a hung in Pathien a kawmah a kilak kita, vang a pie a.

¹⁰Pathien chun a kawmah, “Na min hi Jakob ahi a; na min chuh Jakob kiti ta puo’n tin, na min chuh Israel hi zaw ta’n a,” a ti a: tichun a min ding chun Israel a sa tai.

¹¹Chun, Pathien mah in a kawmah, “Kei Pathien Bangkim hihtheipa chuh ka hi: chi tamtak suongin hung pung in; chi tih kham zet leh nam chuom chuom tamtak le nang apat in hung pieng intin, na khalbe apat in lengte le hung pawt in au;

¹²Chun, Abraham leh Isak gam ka piek hi hun pie’ng ka, na nunga na suonte le gam hi pie zel ing ka,” a ti a.

¹³Chun, Pathien in amah a hopihna mun apat chun Jakob chuh a chieh toh san ta a.

¹⁴A hopihna mun achun Jakob in hetzingna suong a phut a, a chung achun thillat dâwn chi a sunga.

¹⁵Chun, Pathien in a hopihna mun min chuh Jakob in Bethel a sa ta a.

¹⁶Chun, Bethel apat chun a chieh u a, Ephrath khuo tunna ding chuh gamla tak ahi nalai a: chun, Rachel chuh a nauhanat ta a, a gim mah mah mai a.

¹⁷Chun, hiti hi ahi a, na taka nau a vei lai in naudawmte chun, “Lau kih, chapa dang nei ding na hi hi,” a tiu a.

¹⁸Amah chuh thi ding kuon a na hi a, a thagau in a taihsan ding kuon chun, a chapa min ding chun Benoni a sa a, a pa chun Benjamin a sa ta a.

¹⁹Tichun, Rachel chuh a thi a, Ephrath lampi achun a vui a, Ephrath chuh tu a Bethlehem kiti hi ahi.

²⁰Chun, a thân chung achun Jakob in suong a phut a: zie chuh tuni chan hin Rachel thân suongphuh ahi zing tai.

²¹Chun, Israel chuh a chieh zel a, Migdol Eder khel achun puon-In a zak ta a.

²²Israel chuh zie gama chuh a um lai in, Reuben in a pa mei Bilhah chuh a va kuolpih a: Israel in zie chuh a zata a Chun. Jakob chapate chuh sawmlenih ahiu a.

²³Leah chapate chuh Reuben (Jakob cha lutîl) Simeon, Levi, Juda, Issakar leh Zebulun ahiu hi.

²⁴Rachel chapate chuh Joseph leh Benjamin ahiu a: chun,

²⁵Rachel suoknu Bilhah chapate chuh Dan leh Naphtali ahiu a:

²⁶Chun, Leah suoknu Zilpah chapate chuh Gad leh Aser ahiu a: ziehaw chuh Jakob chapa, Mesopotamia gama a neih te chuh ahiu hi.

²⁷Chun, Jakob chuh Kiriatharba khuo a Abraham leh Isak ana chênnau Mamre a a pa Isak kawm chuh a tung ta a (Kiriatharba chuh Hebron ahi.)

²⁸Chun, Isak damsung chuh kum za leh sawmgiet ahi a.

²⁹Tichun, Isak chuh khûp leh kha kichih a dam in a thi a, a chipihte kawm a puih in a um ta a; a chapate Esau leh Jakob chun a vui tau hi.