Read Gangte THILSIEMBUL 37 Bible Online

THILSIEMBUL 37 - Gangte bible

THILSIEMBUL 37

¹Tichun, Jakob chuh a pa malzinna gam, Kanaan gam achun a cheng zing ta a.

²Zie hi Jakob inkuonte chanchin ahi. Joseph chuh kum sawm leh sagih a upa ahih in a suohpihte tawh ganhawn a ching u a; amah chuh naupang ahi nalai a; a pa zite Bilhah leh Zilpah chate kawmah a um a. A suohpihte thilhih chuh a pa kawm achun a gen zel sek hi.

³Chun, Israel chun Joseph chuh a teklam cha ahih ziekin a cha dang te cheng sang chun a hehpih zaw a; tichun, puonâk chuol zie chuom chuom a pawl a siem sak a.

⁴Chun, a pau chun amah chuh a ute cheng sang chun a hehpih zawi tih a ute chun a hun he tau a; tichun, amah chuh a mudah tau a; kampha himhim in le a hopih thei ta puou hi.

⁵Chun, zan khat chuh Joseph in mang a nei a, a ute kawm achun a gen a: tichun amau chun a mudah zaw diek tau a.

⁶Chun, amah chun a kawm u ah, “Lungsiet takin ka mang hi ngaitha tiem u:

⁷Ngaitiem u, lo ahin buhphal haw I na kân khawm u a, chun, ngaitiem u, kei buhphal chuh a hung tho a, a dingdawk ta maia chun, ngaitiem u; nanguh buhphal haw chun a hun ûmkimvel u a, kei buhphal masang achun a bawkkhup ui” a ti a.

⁸Chun, a ute chun a kawmah, “Nang cha hin maw ka chung u a vai na hawm ding? Nang cha hin maw ka chung u a thu na neih mai ding?” a tiu a. Tichun a mang ziek leh a thugen ziek chun amah chuh a mudah zaw diek tau hi.

⁹Chun, mang dang a nei kit a, a ute chuh a hilh kit a, “Ngaitiem u, mang ka nei kit a; nisa leh thapi leh aksi sawmlekhatte khun bawkkhup in chibai ei na bûk veu,” a ti a.

¹⁰A pa le a mang chuh a hilh a, tichun a pa chun a hilhgaih a, a kawmah, “Na mang neih hi bang mang ahi a ahim: kei leh na nu leh na ute hin leisi’n chibai hun bûk hiel ding ka hiu maw?” a ti a.

¹¹Chun, a ute chun amah chuh a mitthîp u a; a pa vang chun a thugen chuh a lungthim ah a vawp zinga.

¹²Chun, a ute chuh Shekem ah a pau ganhawn chingin a chieh u a.

¹³Israel chun Joseph kawmah, “Na ute Shekem a ganching a um hilo ahiu em? Hung tie, a kawm u a hun sawl ding ka” a ti a. Chun, amah chun a kawmah, “Ei sawl ta,” a ti a.

¹⁴Chun, amah chun a kawmah, “Va chieh inla, na ute chuh a dam nau em va en inla, ganhawn haw le a dam nau em va en in, thu ei hun hilh kit in,” a ti a. Khutichun Hebron guom apat chun a sawldawk a, amah chuh Shekem a va tung a.

¹⁵Chun, mi kuo ahim in gama a vak vielviel chuh a mu a, a kawmah, “Banga na hawl?” a ti a.

¹⁶Amah chun, “Ka ute hawl ka hi: lungsiet takin a ganhawn chinnau nei hilh thei die?” a ti a.

¹⁷Amah chun, “Zie apat hin a pawt tau hi: ‘Dothan lam ah chieh hitiu,’ a kitih uh ka hêi” a ti a. Joseph chun a ute chuh a delh a, Dothan achun a va mu tai.

¹⁸Chun, amau chun gamla tak apat in a na muu a, tichun a kawmuh a hungtun ma’n, amah thahna ding thu a na ngaihtuoh tau a.

¹⁹“Entiem u, mangneipa a, hung khu, kisau, that hiting un, kawkhuk khat ah khiei tingun,

²⁰‘Gamsa’n a pet tai,’ tii tiu; tichun, a manghaw chuh bang a hung ti um em he mai ding I hiu hi,” a kitiu a.

²¹Chun, Reuben in zie chuh a na he a, a khut u apat hukdawk a guo a, “Thah hiel chuh hih puoi tiu,” a ti a.

²²Reuben mah chun, a pa kawma puihkitna dingin a khut u apat a hukdawk theihna dingin, a kawm u ah, “Thisan chuh suoh kiu in; thaleka tuikhuk ahin khieu inla, khut vang a chung ah tha kiu in,” a ti a.

²³Chun, hiti hi ahi a, Joseph chuh a ute kawm a va tun chun, a puonâk chuol ziechuom chuom a pawl a âk chuh a na sutsak u a.

²⁴Tichun a pui u a, kawkhuk achun a khe tau a; kawkhuk chuh tui um tak lohna ahi a.

²⁵Chun, an ne dinga a chutkhawm lai u chun Ishmael te Gilead gam apat a Aigupta zuona zinte chuh a vak mu phut u a. A sangawngsau teu chun gimlim leh thingnai damdawite leh murra te a puou a.

²⁶Chun, Juda chun a suohpihte kawmah, “I nau uh I thah u a, a thisan I suoh u a, I îmgûk u chun banga phachuom ding?

²⁷Hung tiem u, a chunga khuttha lo in, Ishmael te kawm ahin zuok zawi tiu; amah hi I suohpihpau, I phehlevo ngei uh ahi ngâl a,” a ti a. A suohpihte chun le a thu chuh a zawp tau a.

²⁸Midian haw sumkawlveite a hung u a, tichun Joseph chuh kawkhuk apat chun a khaidawk u a, Ishmael te kawm achun Joseph chuh dangka sawmnih in a khawng tau a. Tichun, Joseph chuh Aigupta lam ah a pui tau hi.

²⁹Chun, Reuben chuh kawkhuk lam achun a va chieh kit a, Joseph chuh kawkhuk achun aum ta puoi tih a muh phet chun a silhlechen haw a bawtthêk a.

³⁰Chun, a suohpihte kawmah a chieh kit ta a, “Bawipu kha a um ta puoi! Kei hi bang ka ti ta dem?” a ti a.

³¹Chun, Joseph puonâk chuol chuh a lau a, kêlchal a that u a, a thisan achun puonâk chuol chuh a dieh u a;

³²chun, puonâk chuol ziechuom chuom a pawl chuh a pau kawm achun a hun chawi u a; “Zie hih ka mu hâm u a, na chapa puonâk hilo ahim enchien tie?” a tiu a.

³³Chun, amah chun a na he zieng a, “Ka chapa puonâk chuol ahi hila; gamsa’n a peh hi’n tin; Joseph chuh gamsa’n a bawhtel zawh hita ngêi ding ahi chu,” a ti a.

³⁴Tichun, Jakob chun a silhlechen haw chuh a bawtthêk a, saidippuon a cheng a, ni sawttak a chapa chuh a sûn a.

³⁵Chun, a chapate chengcheng leh a chanute chuh amah thamuon dingin a hung u a; himahleh amah chuh thamuon theih ahi puoh a; “Pûlthuok kawmin thân ah ka chapa kawmah chieh suk ing ka,” a ti a. Tichun, a pa chuh amah ngaiin a kap-akap sek a.

³⁶Chun, Midian te chun Joseph chuh Aigupta gam ah a pui u a, Pharaoh nuoia lawiupa khat, mi veng lawiupa, Potiphar kawm achun a khawng tau hi.