Read Gangte THILSIEMBUL 38 Bible Online

THILSIEMBUL 38 - Gangte bible

THILSIEMBUL 38

¹Zielai chun hiti hi ahi a, Juda chun a suohpihte chuh nusieh in, Adullam khawpi a um, Hirah chuh a vabel ta a.

²Chun, Juda chun zie tak achun Kanaan numei khat Shua chanu chuh a mu a. Amah chuh a kichênpih a, a kuolpih a.

³Tichun, nau a vawp a, chapa a hing a, chun, Juda’n a min Er a sa a.

⁴Chun, nau a vawp kit a, chapa a hing kit a, chun, a nu’n a min dingin Onan a sa a.

⁵Chun, chapa a hing kit zel a, a min dingin Selah a sa a: zie lai chun Juda chuh Chezib khuo ah a um hi.

⁶Chun, Juda chun a chapa upapen Er chuh zi a neihsak a, a min chuh Tamar ahi.

⁷Chun, Juda chapa upapen Er chuh LALPA mitmuh in migilo tak ahi a; tichun LALPA’n amah chuh a that ta a.

⁸Chun, Juda chun Onan kawmah, “Na u zi chuh kuolpih inla, suohpih pasalte hih ding chuh hihsak in, na u ding chun chi suon sak in,” a ti a.

⁹Himahleh, Onan in chi suon ding chuh amah suon hilo ding ahi tih a he a, a u zi a kuolpih cheng leh a u dinga suona neihsak lohna dingin a chi chuh tuol ah a vatthak sak sek hi.

¹⁰Chun, a thilhih dân chun LALPA a sukipak puoh a: tichun, amah chule a that ta a.

¹¹Chun, Juda chun a monu Tamar kawm achun, “Ka chapa Selah hi a pitin masieh na pa In lam ah pasal nei lo in va um phawt mai in,” a ti a. “Khutilochun amah hile a ute guolin thi kha’na” a tih ahi. Tichun, Tamar chuh a pa In lam ah a va um tai.

¹²Chawmkhat hal chun Juda zi Shua chanu chuh a thi a; chun, Juda chuh a lunghel a hung phat phetin Timnah khuo a a belam mulmette kawm achun, a mah leh a guolpa Adullam mi Hirah chuh a chieh to u a.

¹³Chun, Tamar chuh a talpupa belam mul met dingin Timnah khuo a chieh to ding ahi tih chuh a hilh u a.

¹⁴Tichun, amah chun a meithai van haw chuh a suttha a kikhuhna puon in a kikhuh a, a kituom a, Timnah khaw lampi a Enaim kulh kawtkhak achun a na chu a; Selah chuh piting ta mahleh, a pa chun a zi dingin a neihsak lo ding ahi tih a he ngâl a.

¹⁵Chun, Juda chun amah chuh a muhin nawhchizuok hiding in a gingcha a; a mai a khuh chak kêi ziekin,

¹⁶Tichun, lamsîk a numei lam chuh a va zuon a, “Hung tie, lungsiet takin kipawl hiti,” a ti a: a monu khah ahi tih a he puoh ngâl a. Chun, amah chun, “Nei pawl theihna dingin, bang nei pie die leh?” a ti a.

¹⁷Amah chun, “Ganguol laka kelno hun thak ing ka,” a ti a. Amah nu chun, “Zie chuh nei hun thak ma’n kitukkhapna ding bang ahim bêk nei pie dem?” a ti a.

¹⁸Chun, amah chun, “Kitukkhapna ding banga ka hun piek ding?” a ti a. Amah chun, “Na min namna leh na khauhuol, na khuta na tiengkhut kha tawh,” a ti a. Tichun a pie a, a pawl ta a, amah apat chun nau a vawp tai.

¹⁹Tichun, Tamar chuh In lam ah a chieh ta a, a kikhuhna puon chuh a kawihtha a meithai silhlechen haw chun a kivan kit tai.

²⁰Juda chun a kitukkhapna chuh numei apat a chuh la dingin a guolpa Adullam mi khut achun kelno chuh a thak a; himahlele amah chun amahnu chuh a va mu zo puoh a.

²¹Khutichun, numei umna muna mihaw kawm achun, “Lampang a Enaim nawhchizuok um kha khawia um ahi ta’m?” ti’n a dawng a. Amau chun, “Zie hin nawhchizuok a um kha puoi,” ti’n a dâwng u a.

²²Tichun, amah chuh Juda kawm achun a kilehkit a, “Amah chuh ka mu zo puoi; a muna mihaw’n le, ‘Zie hin nawhchizuok a um kha puoi,’ a tiu hi,” a ti a.

²³Chun, Juda chun, “Chang den mai heh, khutilochun zahhuoi kha’ng ka: zie kelno hi ka thak a, amah na mu zo puoh ngâl a,” a ti a.

²⁴Chun, tha thum vel nung chun mi’n Juda kawm achun, “Na monu Tamar in tangval a kivawppih a; zaucha a pai hi,” ti’n a hilh u a. Juda chun, “Puidawk unla, hâl lum un,” a ti tai.

²⁵Chun, a hun puihdawk phet u chun Tamar in, “Zie thil neipa apat hin ahi, nau ka vawp,” ti’n a talpupa kawm achun mi a sawl ta a: “Lungsiet takin zie min namna haw, khauhuolhaw, mawlhhaw hi kuo a ahim enchien in,” a ti a.

²⁶Chun, Juda chun zie thil haw chuh amah a ahi tih a he a, “Amah chuh kei sangin a diktat zawi, ka chapa Selah chuh ka neihsak ta puoh ngâl a,” a ti a. Juda chun amah chuh a kuolpih kit ta puoi.

²⁷Chun, a nauhanat lai chun hiti hi ahi a, a sûl achun nau kiphik ana um a.

²⁸A nauhanat lai chun khat chun a khut a hun thadawk a: tichun naudawm mi chun, “Zie hih a suok masa zaw ahi hi,” ti’n a tu a, a khut achun pat san a buhsak a.

²⁹A khut a zuk lut kit lai chun, a suohpihpa chuh a hung pawt ta a: tichun naudawmmi chun, “Bang zieka pawtna na kisiem ahim?” a ti a, zieziekchun a min dingin Perez a sau a.

³⁰Chun, zie nung chun a u, a khut a pat san but kha a hung pawt kit a: a min dingin Zerah a sau hi.