Read Gangte THILSIEMBUL 4 Bible Online

THILSIEMBUL 4 - Gangte bible

THILSIEMBUL 4

¹Chun, Adam in a zi Evi a kuolpih a; tichun nau a vawp ta a, chapa a nei a, “LALPA panpihna’n chapa ka nei tai,” a ti a. A min dingin Kain a sa a,

²Chun, chapa dang khat Abel a nei kit a. Abel chuh belam ching in a um a, Kain vang chuh lobawlmi ahi.

³Hun chawmkhat zawh chun hiti hi ahi a, Kain chun LALPA kawma piek dingin lo a thai gah a hun la a.

⁴Chun, Abel in le a belam hawn laka pieng masapente leh athau hawih diek haw chuh a hun kai a, a that a, a kithawi ta a. Tichun, LALPA chuh Abel leh a thilpiek achun a kipâk a.

⁵Kain leh a thilpiek vang chuh a kipahpih puoi. Tichun Kain chuh a lungna mah mah ta a, a maisuoh chuh a hung duptha zieng ta a.

⁶Tichun LALPA’n Kain kawmah, “Bang dinga lungna na hi? Bang dinga na maisuoh duptha zieng ahi?

⁷Thil na hihphat leh pawm a um lo ding na him? Na hih phatloh leh vang chuh gitloh kawtkhak bul ah a bawk zing a, na chunga thuneih a ut a, himahleh zo ngêi ding na hi,” a ti a.

⁸Chun, Kain in anau Abel kawmah, “Lo ah chieh hiti,” a ti a. Tichun, lo a a umlai u chun Kain chun anau Abel chuh a suol a, a that ta a.

⁹Tichun LALPA chun Kain kawm achun, “Na nau Abel khawia um a?” a ti a. Amah chun, “Ka he puoi, ka nau chingpa ka hi a mawh?” ti’n a dâwng a.

¹⁰LALPA chun, “Bang hih na hi ta’m? Na nau thisan aw chun lei apat in ei uou hi.

¹¹Zieziekchun, na khuta pata na nau thisan chukna dinga a kam a na ka leisiet apat hin hansiedawl na hi tai.

¹²Lei na leh tieng lele lei chun bangmah suoh ta puo’n tin, lei ahin taimang leh vak chavai hung hi ta’n la,” a ti a.

¹³Chun, Kain chun LALPA kawmah, “Nei gawtna hi a huoisie taluo a thuok zo puo’ng ka;

¹⁴Ngaiin, tuni hin lei chung apat nei nawhdawk ta ngâl a; na mit muh phakloh a sel a um ding ka hi ta a; lei ahin vakmang leh vakvai hung hiding ka hi ta ngâl a; tichun kuole ei mu taphawt in ei that mai in au,” a ti a.

¹⁵Chun, LALPA Pathien chun a kawmah, “Hilo e, kuole Kain that taphawt chuh aleh sagih in a chunga phulak hi’n a,” a ti a. Tichun, mi’n amah a muh u a a thah lohna dingun LALPA’n Kain chuh a tiemteh ta a.

¹⁶Tichun Kain chuh LALPA kawm apat chun a pawt a, Eden suohlam a Nod gam achun a um ta a.

¹⁷Chun, Kain in a zi a kuolpih a, chun, nau a vawp a, Enok a hinga. Chun, Kain chun khawpi a siem a, a min ding chun a chapa min chawiin Enok a sa a.

¹⁸Enok chun chapa Irad a nei a, Irad chun chapa Mahujael a nei a, Mahujael chun chapa Methusael a nei a, Methusael chun chapa Lamek a nei hi.

¹⁹Chun, Lamek chun zi nih a nei a: khat min chuh Adah ahi a, a dang min chuh Zillah ahi.

²⁰Adah in Jabal a hing a: amah chuh puon-In haw a chênga gancha vak haw suonpa ahi.

²¹A suohpihpa min chuh Jubal ahi a: amah chuh kingkang leh châmngai tum haw chengcheng hun suonpa chuh ahi.

²²Chun, Zillah chun Tubal-Kain dakguo leh thik matchâk chichuom chuom sêk pa a hing a: chun, Tubal-Kain suohpihnu chuh Naamah ahi.

²³Chun, Lamek chun a zite kawm achun: “Adah leh Zillah te haw, ka aw ngaithau inla; Lamek zite haw, ka thugen hi ngaiun: Ei sukliem ziekin mi ka that a, Ei zêp thidup ziekin tangval ka that hi.

²⁴Kain phu bawn aleh sagih a a lak ding u chun Lamek phu chuh a leh sawmsagih leh sagih in la ngêi ngêi in au,” a ti a.

²⁵Chun, Adam in a zi a kuolpih kit a: tichun amah chun chapa a hing kit a, a min dingin Seth a sa a. “Pathien in Abel thasang in chisep ding dang ei guotsak tai, Kain in amah a that ta ngâl a,” a ti a.

²⁶Chun, Seth inle chapa a nei ta a; a min dingin Enos a sa ta a. Zielai chun mite’n LALPA min a hun sam pan tau hi.