Read Gangte THILSIEMBUL 40 Bible Online

THILSIEMBUL 40 - Gangte bible

THILSIEMBUL 40

¹Chun, zie thil haw nung chun hiti hi ahi a, Aigupta leng uain piepa leh a chângthâk siem lawiupa pên chun a puu Aigupta leng chuh a sulungnau a.

²Tichun Pharaoh chuh a suokte laka lawiupa nih chungah, a uain pie lawiupa pên leh a chângthâk siem lawiupa pên chung achun a lungna ta a,

³tichun, mi vengpawl lawiupa in a suongkul, Joseph kikhumna achun a khum tai.

⁴Mi vengpawl lawiupa chun Joseph chuh amau haw a etkawl saka tichun, amah chun a nau a sep saka, suongkul achun ni bang zat ahim a tâng tadih u a.

⁵Zan khat chuh suongkul sung achun Aigupta leng uain piepa leh chângthâk siempa chun umzie chuom gel nei, mang a nei u a.

⁶Zingkal a Joseph a kawm uh a a va chieh leh lungkham melpu takin a va mu a.

⁷Tichun amah chun, “Bang ti dân ahim tuni chun lungkham mel na pu nau e?” ti’n Pharaoh suok lawiupa, a pu In a a suongkul tânpih te chuh a dâwng a.

⁸Amau chun a kawmah, “Mang ka nei u a, ei hilhchien thei kuomah a um puoh ngâl u a,” a tiu a. Joseph chun a kawm u ah, “Mang hilhchetna chuh Pathien a hilo ahim? Lungsiet takin ei hun hilh tiem u,” a ti a.

⁹Tichun uain pie lawiupa pên chun a mang chuh Joseph a hilh a, a kawmah, “Ka mang in ngaiin, ka masang ahin grep gui a na um a;

¹⁰grep gui achun bâk thum a um a: a seldawk guolin a hung um a, a pak haw a hung pawt a; a pak haw chun grep min haw a hun suoh ta a.

¹¹Chun, Pharaoh khawn chuh ka khut ahin a na um a; tichun grep gah haw chuh ka lo a, Pharaoh khawn achun ka thawk a, khawn chuh Pharaoh khut achun ka na pie a,” a ti a.

¹²Joseph chun a kawmah, “Ziehi a hilhchetna ahi: bâk thum chuh ni thum ahi;

¹³tu apat ni thumna ah Pharao’n na luchang dawmsang intin, na nasep chuh hun sepsak kit in a: tichun a uain piepa na hih lai a na piek dan ngei khan Pharaoh khawn chuh a khuta pie kit ding na hi chu.

¹⁴Amahvang chuh chanpha na chan kit phat leh ei hun hezing inla, lungsiet takin hehpihna ka chungah hun sulang inla, Pharaoh kawmah ka chanchin hun gen inla, zie In apat hin ei puidawk in.

¹⁵Hebraite gama pata mi’n a gûka ei gûk mang uh ka hi a, zie gam ahin le suongkul a ei khumna ding khawp un bangmah ka hihkhiel diek puoi,” a ti a.

¹⁶Chun, chângthâk siempa chun hilhchetna chuh aphâi tih a het phetin, Joseph kawm achun, “Ken le mang ka nei a, chângthâk vam bawm thum ka luchang ah ka na khu a:

¹⁷Bawm chungnung pên achun Pharaoh an, chângthâk siempa siem, chi chuom chuom hi a na um a; ziehaw chuh vachate’n ka bawm khuk apat chun a na ne sausau u a,” a ti a.

¹⁸Joseph chun a dâwng a, “Ziehi a hilhchetna ahi: bawm thum chuh ni thum ahi;

¹⁹tu a kipat ni thum ah Pharao’n na taksa apat na luchang tan intin, thinglêk ah hun khâi in a; tichun vachate’n na sa chuh ne sausau ding ahiu chuh,” a ti a.

²⁰Zie nung a ni thum ni, Pharaoh pien champhaphâk ni ahi a, leng chun a miliente chengcheng dingin guolvakna a siem a: a nasemte laka uain pie lawiupa pên luchang leh chângthâk siem lawiupa pên luchang chuh a dawmsang ta a.

²¹Joseph in amau a hilhchet sak guol tak khan, uain pie lawiupa pên chuh uain pie’n a pansak kit a; tichun, khawn chuh Pharaoh khut achun a pie ta a;

²²chângthâk siem lawiupa pên vang chuh a khailum ta a.

²³Himahlele uain pie lawiupa pên chun Joseph chuh a hepha ta hiel puoh a, a hengilh kêi tai.