Read Gangte THILSIEMBUL 43 Bible Online

THILSIEMBUL 43 - Gangte bible

THILSIEMBUL 43

¹Zie gama kiel chuh a khawksie deuh deuh mai ta a,

²Jakob inkawte chun Aigupta gam apat a buh a puok toh u kha a nek zawh phet u chun, Jakob in a kawm u ah, “Chieh kit tau inla, ei u a dingin buh neukhat bêk va chaw kit uh,” a ti a.

³Tichun Juda chun a kawmah, “Zie pa chun, ‘Na nau uh na kawm u a a tel loh chun ka mel mu puo’n lau,’ ti a ei tiem chak kêi ahi.

⁴Ka nau u hi nei zuih sak chun buh hun va châwksak ing kau;

⁵nei zuih sak loh le chu vang va chieh puo’ng kau: zie pa chun ka kawm u ah. ‘Na nau uh na kawm u a a tel loh chun ka mel mu puo’n lau,’ a ti kei ngâl a,” ti’n a gen hi, a tiu a.

⁶Chun, Israel chun a kawm u ah, “Bang zieka nau dang na neih naklai thuu na hun gen khelkhel u a, kei dinga thil phalo tak na hih u a?” a ti a.

⁷Amau chun, “Zie pa chun, na pau chuh a dam nalai em? Suohpih dang na nei nalai um?” ti’n ka chanchin u leh ka chanauteu chanchin ei dawng chien kei ngâl a; tichun zie a thu ei dawt guol zel chun ka hilh uh ahi; “Na nau uh hun puisuk un, ti’n a tih kuo a he thei ding?” a tiu a.

⁸Juda chun a pa Israel kawmah, “Bawipu chuh ei zuih sak ah, tichun kipan ing ka tingun, chieh mai ing kau; kei u leh nang leh I cha neucha cha hawu hi thilo a I hin theihna dingun.

⁹A chungchâng thu ahin kei kisung zel ing ka; kei mawh ei puoksak na’n la: amah chuh na kawma ka hun puihkit loh a, na masang a ka dinsak kit loh chun a mawh chuh kumkhuo’n puo zaw’ng ka:

¹⁰um sawt lo hi leu hing chuh tuhin a nih veina le hungtung kit ta ngêi ngêi ding ka hiu a,” a ti a.

¹¹A pau Israel chun a kawm u ah, “Khutichu a hih ngâl chun hiti hin hih un; na dip hawu akhan zie gama thilpha khenkhat, thingnai damdawi haw, khuoizu haw, thil gimlim haw leh murra haw, theihawng haw, makha haw hi neukhat chiet zie pa a ding chun kipahman in puoksak un:

¹²dangka a lehnih keng unla, na dip kam u a dangka a hun piek kit u khale keng kit un; a hihkhelh khakpalh uh ahi mawh die!

¹³Na nau u chu le pui un la, kipan unla, zie pa kawm achun chieh kit un.

¹⁴Tichun na suohpihpau khat leh Benjamin chuh a hun thahdawk na dingin, Pathien Bangkim hihthei chun zie pa chuh nanguh hun lungsiet sak hen. Ka chate chuh ka chân leh ka chân hi mai ven ti,” a ti a.

¹⁵Tichun, amau chun kipahman chuh a keng u a, dangka chuh a lehnih a keng u a, Benjamin le a pui u a; a kipan u a, Aigupta gam ah a chieh tau a, Joseph ma achun a ding kit tau hi.

¹⁶Chun, Joseph in Benjamin a kawm u a um chuh a muh phetin, a in ngakpa kawm achun, “Amau khuh In sung ah puilut inla, sa that inla, guonggalh in; amau khun sun leh ka kawma an ne ding ahiu hi,” a ti a.

¹⁷Tichun amah chun Joseph in thu a piek guol chun a hih ta a, Joseph In achun a puilut ta a.

¹⁸Chun, Joseph In a puih lut a a um ziek u chun a lau u a, “I chieh masak chunguh a I dip u a dangka ei piek kit haw ziek khan ahi hi ei puihlut uh; I chung u a lemchâng hawl a ei bawl sie’n, ei u leh I sabiltung hawu hi tawh suok a ei mat guot uh ahi hi,” a tiu a.

¹⁹Joseph In ngakpa kawm achun a va chieh u a, kawtkhak bul achun a hopih u a,

²⁰“Aw hepu, ka hung masak chung u khan buh chaw ding mai a hung ka hiu a:

²¹Chun, hiti hi ahi a, giehbuk ka tun u a ka dipteu ka vak phel u leh, ka dangkau chuh ka dip kam chiet u ah a na um a, ka dangkau chuh a bûk zah zah in a na um a: tichun ka hun chawi kit u a.

²²Buh chawkna dingin dangka dang le ka hun keng kit u a; ka dangkau chuh ka dip u a kuo’n a kawih ahim ka he puoh ngâl u a,” a tiu a.

²³Amah chun, “Thamuong takin um unla, lau kiu in: na Pathien uh, na pau Pathien chun na dip hawu achun go a hun piek na hiu chu: na dangkau kha ka mu ngâl a,” a ti a. Simeon chuh a kawm u ah a hun puihdawk sak ta a.

²⁴Amau haw chuh Joseph In sung ah a puilut a, tui a pie a, a keng uh a sil tau a; a sabiltung hawu chule an a pie a.

²⁵A kipahman chawih u chuh Joseph an ne a a hung ma’n a na siemtup masau a: zie achun an ne ding ahiu hi tih a he ngâl u a.

²⁶Chun, Joseph chuh a In a a hung phet chun, a khut u a kipahman um chuh In sung ah a kawmah a chawi lut u a, leisi’n chibai a bûk chiet u a.

²⁷Amah chun a chanchin uh a dawng a, “Na pau a chanchin na gen uh teksepu kha a dam pet ahi? Hing le dam in a um na maw?” a ti a.

²⁸Amau chun, “Ka pau, na suok chuh a dam nalai a, hing leh dam in a um hi,” a tiu a. A luu khun in chibai a bûk kit u a.

²⁹Amah chuh a dâk dawk a, a nau Benjamin, a nu chapa chuh a mu a, a kawmah, “Zie pa hih na suohpihpau naupangpen a chanchin nei hilh u khah ahim? Pathien in vang hun pie hen, ka chapa,” a ti a.

³⁰Joseph in a nau a muh chun a kitu zo ta puoh a, kintakin kahna ding mun a hawl ta a, a indan sung ah a lut a, zie chun a kap dawk ta a.

³¹Zie zawh chun a mai a phiet a, a va pawt kit a, a kidêk hâm hâm a, “An nek ding siem u le,” a ti a.

³²Tichun, amah a ding ankuong chuom a siem sak a, a suohpihte a ding ankuong chuom a siem a, Aigupta mi a nekpihte ding a chuom in a siem sak a; Aigupta te’n Hebrai haw chuh a nekpih thei puoh ngâl u a; khutibang hih chuh Aigupta te ding chun a thienglo ahi.

³³Tichun a upapen chuh a cha lutîl hihna bangin, a naupangpen chuh a neupen hihna bangin a chuu a, khutichun maksa takin a a ki-entuoh u a.

³⁴A chan ding dawl chiet u chuh Joseph dawhkân apat chun piekdawk ahiu a. Benjamin chan vang chuh adang cheng chengte chan sang chun a leh nga a tamin a siem saka; Tichun, amah chu tawh nekhawm dâwnkhawm in kipâk takin a um tau hi.