Read Gangte THILSIEMBUL 44 Bible Online

THILSIEMBUL 44 - Gangte bible

THILSIEMBUL 44

¹Chun, Joseph in a suokpa kawm achun, “Ziete haw dip kha a puok theih hun dingun buh sung dim inla, a dangka chiet u chuh a dip uh kam chin chietah kawih in.

²Chun, ka khawn, ka dangka khawn kha, a naupangpen dip sung ah kawih in, a buhman dangka kha tawh,” ti’n thu a pie a. Tichun ama’n Joseph thugen bang chun ahih tai.

³Khuo a vak phetin amau chuh a sabiltung hawu chu tawh a kipandawk tau a.

⁴Khuo apat a chiehdawk uh, a tun gamlat mau chun Joseph in a suokpa kawm achun, “Kipan inla, mihaw kha va delh in; na delhphak tieng leh a kawm u ah, ‘Bangti dana thilpha thil phalo a na dit uh ahim?

⁵Bang zieka ka pu sana khawn na gûk uh ahim? Zie kha ka pu uain dawnna leh a phunsanna khawn ahi ngâl a. Thil pha lo tak tak hihna hiu hi!’ va ti’n,” a ti a.

⁶Chun, amau haw chuh a delhphak phetin zie thu haw chuh a kawm u ah a gen a.

⁷Amau chun a kawmah, “Hepu, bangti dân ahim hitibang thu na gen chuh? Na suokte hin zie bang thil chuh ka hih loh ding zie mai u chuh.

⁸Ngaitie, ka dip sung u a dangka ka muh hawu khale Kanaan gam apat in na kawmah ka hun puo kit u kha la: bangti dân in ahim na pu In a dangka ahim, sana ahim ka gûk theih ding uh?

⁹Na suokte lak ahin kuole na muh na tâk chuh thi hen, kei u le ka puu suok in um mai ing kau,” a tiu a.

¹⁰Chun, amah chun, “Awle, na thuu bang zel chun hi hen: amahvang chuh kuole ka muh na pên chuh ka suok in um hen; a danghaw vang chuh chieh thei in lau,” a ti a.

¹¹Ziephet chun, kintakin amau dip chiet chuh tuol ah a kawihtha chiet u a, dip chuh a hawng chiet u a.

¹²Amah chun, a upapen ah a pan a, a naupangpen chanin a hawl a: tichun khawn chuh Benjamin dip achun a mu ta a.

¹³Ziephet chun a puonhawu a bawtthêk u a, amau sabiltung chiet chuh a puoksak kit chiet u a, khawpi achun a vaikit tau hi.

¹⁴Chun, Juda leh a suohpihte chuh Joseph In a va tung u a; amah chuh zie chun a na um nalai a: a ma achun a khupbawk chiet tau a.

¹⁵Joseph chun a kawm u ah, “Bang thil a hi tâm na hih uh? Kei tawbang mi hin phun a san thiem hi tih helo na hiu em?” a ti a.

¹⁶Juda chun, “Hepu, na kawmah bang ka gen ta ding u? Bang ahim ka paulap ding uh? Bangti’n a ka kigen âwng tâk ding uh? Pathien in na suokte gitlohna chuh a mudawk ahi ta hi; hepu, na suokte ka hi tau hi, kei mau leh a khuta khawn kimuhna hi tawh,” a ti a.

¹⁷Chun, amah chun, “Zie tawbang a chuh ka hih loh ding zie mai chuh! A khuta khawn kimuhna pa mai hi ka suok in um in a; nang haw chu vang lungmuong takin na pau kawmah va chieh tau in,” a ti a.

¹⁸Ziephet chun, Juda chun Joseph a va naih a, “Aw hepu, lungsiet takin, hepu, na suok hi na kawma thu kamkhat ei gensak inla, na suok chung ahin na lung chuh natsak ki’n la: nang chuh Pharaoh bang mai na hi ngâl a.

¹⁹Hepu, nangin, ‘Pa ahim, suohpih ahim na nei um?’ ti’n na suokte hi nei dawng a.

²⁰Hepu, kei un na kawmah, ‘Pa teksie tak leh a teklam cha naupang cha khat ka nei ui, zie pa u chuh a thi a, a nu hin lak achun amah mai chuh a uma, a pa chun amah chuh a lungsiet mah mah hi,’ ka tiu a.

²¹Chun, nangin na suokte kawm ahin, ‘Amah chuh ka mit a ka muh theihna dingin ka kawmah hun puisuk un,’ na ti a.

²²Kei un na kawmah, ‘Bawipu chun a pa taihsan thei puo’n a: a pa chuh a taihsan chun chuh a pa chuh thi mai ding ahi ngâl a,’ ka tiu a.

²³Nangin na suokte kawm ahin, ‘Na nau neupen u chu tawh na hung kitawn loh u chun ka mel mu kit ta puo’n lau,’” na ti a.

²⁴Chun, na suok ka pau kawm ka tun kit phet u chun, na thugen chuh ka hilh u a.

²⁵Ka pau chun, “Chieh kit tau in la, buh tawmcha bêk ei u dingin va chaw kit un,” a ti a.

²⁶Chun, kei un, “Va chieh kit thei puo’ng kau: ka nau neupen u hih ka kawm u a a tel loh chun zie pa mel chuh mu thei lo ding ka hiu hi,” ka tiu a.

²⁷Chun, na suok ka pau chun ka kawm u ah, “Ka zi Rachel in chapa nih ei hinsak hi tih na heu a,

²⁸a khat chuh ka kawm apat in a chiehdawk a, zie apat chuh ka muh kit takloh ziekin gamsa’n a bawhtel hi ngêi ina,” ka ti a.

²⁹Tichun amah hi le ka kawma pata na puihmang u a tuohsie a tuok chun, ka sam kâng hi lungkham na’n thân ah ei muolliem sak ding na hiu hi, a ti a.

³⁰“Khutichun, bawipu hi ka kawm u a tello ana suok, ka pau kawm ka va tun kit u chun, a hinna chuh bawipu hinna tawh kizawm kêi ahih ziekin, hiti hi hin ti’n,

³¹Bawipu hi a tel puoi tih a het het leh thih lawh ding ahi, tichun, na suokte hin, na suok, ka pau chuh lungkham in than ah muolliem sak ding ka hiu hi.

³²Na suok hin, na kawma ka hun puihkit loh u chun naupang chung châng thu ahin ka kisung ta ngâl u a.

³³Khutichun, lungsiet takin na suok hi, bawipu thasang in na suok in ei umsak inla, bawipu hi a ute kawmah chieh toh sak in.

³⁴Bawipu ka kawma tello in ka pa kawmah bangti’n ka chieh to thei die? Ka pa chunga sietna tung ding chuh ka mu ngam puoi,” a ti a.