Read Gangte THILSIEMBUL 45 Bible Online

THILSIEMBUL 45 - Gangte bible

THILSIEMBUL 45

¹Chun, Joseph chuh a kienga ding chengcheng te ma achun a ki-îm zo ta puoh a, “Mi chengcheng ka kawm apat hin pawtdawk sak vek un,” ti’n thu a pie a. Tichun Joseph chuh a suohpihte kawma a kihetsak sung cheng chun a kawmah kuomah a um puou hi.

²Khutichun, ngeih tak in a kap dawk ta a, a kah git chuh Aigupta mite’n a zau a, zie thu chuh Pharaoh inkawte chun le a zau a.

³Chun, Joseph chun a suohpihte kawmah, “Joseph kha ka hi, ka pa a dam nalai em?” a ti a. Himahlele, a suohpihte chun a dâwng thei puou a; a ma achun lawhngaihna helo in a um tau a.

⁴Joseph mah chun a suohpihte kawmah, “Lungsiet takin ei hun naih tiem u,” a ti a. Tichun, a va naih u a. Amah chun, “Na suohpihpau Joseph, Aigupta gama na zawk u khah ka hi.

⁵Himahlele, zie taka chieh dinga hi nei zawk ziek u chun lungkham kiu in la, nangmau leh nangmau le kithiemmawh diek kiu in: mite hinna hukbit dingin Pathien in na mau a ei na sawl masak ahi hi.

⁶Zie gama kiel kiek hi kum nih mai ahi nalai a, kum nga um nalai ding ahi, zie sung cheng chun lokaih tih um puo’n tin, buh ât le um diek puo’n a.

⁷Tichun lei ahin chi hun suon sak ding leh maktak a ka hun hukdawk theihna dingin Pathien in na mau ahih ei na sawl masak ahi.

⁸Khutichun, zie taka ei sawl hi nanguh na hi puou a, Pathien ahi zawi: amah chun Pharaoh leh a inkawte chengcheng chunga lawiupa leh, Aigupta gamsung pumpi chunga gamvaipuo a ei siem ahi hi.”

⁹“Kin takin ka pa kawmah va chieh unla, a kawmah, Na chapa Joseph chun hiti hin a tii, Pathien in Aigupta gam chengcheng chunga lawiupa’n ei siem a: kin takin ka kawmah hungsuk inla, hung khawngai sawt ki’n:

¹⁰Tichun, Gosen gam ah um in na tin, ka kawm ngêi ahin um inla, nang leh na tu leh na chateu tawh, na belam hawnteu leh na bâwng hawnteu tawh, na neih chengcheng teu tawh.

¹¹Zie chun ken hun vak ing ka ting, kiel hi kum nga um nalai ding ahi ngâla; khutilochun hung gimthei kha’n lau, nang leh na inkawte leh, na neih chengcheng tawh, hun tiu in,” a ti a.

¹²Chun, “Ngaitiem u, nangmau mit ngêi leh, ka nau Benjamin mit ngêi in na kawm uh a keimah kam ngeia ka gen ahi tih a mu zing hi.

¹³Aigupta gama ka lopina thu chengcheng leh, na thilmuh teu chengcheng hi ka pa hilh un la; ka pa chuh zie ahi kintaka na hun puihsuk dinguh ahi,” a ti a.

¹⁴Benjamin chuh a ngawngkawih a, a kap ta a; Benjamin inle a ngawngkawih kawm chun a kap a.

¹⁵Tichun, a suohpihte chengcheng chuh a châwp a, a kahkhum a; zie zawh chun a suohpihte chun a holimpih tau a.

¹⁶Chun, “Joseph suohpihte a hung ui,” tih thu Pharaoh In achun het ahih phatin: zie thu chun Pharaoh leh a suokte chuh a sukipak ta a.

¹⁷Chun, Pharaoh chun Joseph kawmah, “Na suohpihte kawmah, ‘Hiti hin hih u; na gancha hawu kha buh puoksak unla, pawt unla, Kanaan gam ah chieh un:

¹⁸Chun, na pau leh na inkawteu hun pui unla, ka kawm ahin hung un, tichun Aigupta gama thilpha hi hun pie’ng ka ting, zie gama thil phapente hi ne ta’n lau,’ ti’n.

¹⁹Thu ka hun piek na hiu hi, hiti hin hih un, na cha neucha cha hawu ding leh na ziteu dingin Aigupta gam apat hin kangtalaite keng unla, na pau hun pui unla, hung un.

²⁰Na thuomphuo hawu le hun ngaihtuoh kiu in, Aigupta gam chengcheng thilpha taphawt hi nang uh a ahi ngâl a,” a ti a.

²¹Tichun, Jakob chate chun khutibang chun a hih tau a: Joseph in Pharaoh thupiek guol chun kangtalai haw a kawm u ah a pie a, lamkal a nek ding le a pie a.

²²A bawn u a dingin silhlechen kithenna ding a pie chiet a; Benjamin vang chuh dangka zathum leh silhlechen kithenna puon nga a pie a.

²³Chun, a pa kawm achun sabiltung sawm, Aigupta gama thilpha puo leh, sabiltungnu sawm lamkal a a pa dinga buh leh chângthâk leh nek ding puo a thak a.

²⁴Khutichun a suohpihte chuh a sawldawk a, a chieh tau a; amah chun a kawm u ah, “Lampi a kina lo dingin chingthei un,” a ti a.

²⁵Chun, Aigupta gam apat chun a chiehto u a, Kanaan gama a pau Jakob kawm chuh a va tung u a.

²⁶“Joseph kha ana dam nalai a, Aigupta gam chengcheng chunga vaihawmpa ahi,” ti’n a hilh u a. Chun, a lung a phuguih a, a thugen u chuh a gingcha thei puoh a.

²⁷Himahleh Joseph thugen chengcheng chuh a hilh u a: a chutna dinga kangtalai Joseph in a thak haw chuh a muh phetin a pau Jakob lungthim chuh a hung halh huoi ta a;

²⁸Jakob chun, “A hun tai; ka chapa Joseph chuh hingledam a ana um nalai ahi hi; ka thih ma’n amah va mu’ng ka ie leh,” a ti tai.