Read Gangte THILSIEMBUL 48 Bible Online

THILSIEMBUL 48 - Gangte bible

THILSIEMBUL 48

¹Chun, zie nung chun hiti hi ahi a, Joseph kawmah “Ngaitie, na pa a dam puoi,” ti’n a hilh u a. Khutichun a chapa te nih Manasseh leh Ephraim chuh a pui a, Jakob en ding chun a chieh tau a.

²Jakob chuh, “Na chapa Joseph chuh nang hun en dingin a hung hi,” tih a hilh phet u chun, theihtawp suoh in zâlkhun chung achun a hung chudawk a.

³Jakob chun Joseph kawmah, “Pathien Bangkim hihtheipa chuh Kanaan gama Luz khuo achun ka kawmah a kilak a, ei vangsak ta a.

⁴Ka kawmah, ‘Chi tamtak hun sepsak ing ka ting, hun supung ing ka ting na suonte chuh nam tamtak hung hiu in tin; zie gam hi na suonte kawmah a kumkhuo go dingun pie’ng ka,’ ei tih ahi,” a ti a.

⁵Jakob chun a gen zawm zel a, “Joseph, na chapate nih, Ephraim leh Manasseh, zie taka ka hung ma a Aigupta gama na neih te hih Reuben leh Simeon kei a a hih mah bang un ka chapate ahiu hi.

⁶Zie nung a chapa na neih kitte vang chuh kei a guola ngaih theih hi ta puou intin, a goluoh ding u chuh Ephraim leh Manasseh apat in hi ta’n a.

⁷Zie hih na nu Rachel zieka ka hin ahi. Ka lungkham na ding dingin, Mesopotamia gama pata ka vaihkit lai in Ephrath apat a gamla lo chah Kanaan gam achun ei thihsan ta a. Ephrath zawtna lamlien pang achun ka vui tai,” a ti a. (Ephrath chuh tu a Bethlehem kiti hi ahi).

⁸Chun, Israel chun Joseph chapate chuh a muh in, “Ziehaw hi kuote ahiu a?” a ti a.

⁹Joseph chun a pa kawmah, “Ziehaw hi ka chapate, Pathien in Aigupta gama ei piekte ahiu hi,” a ti a. Jakob chun, “Lungsiet takin ka kawm ahin hun pui nai in, tichun amau haw chuh ana vangsak ing ka,” a ti a.

¹⁰Israel chuh a upat tâk ziekin a mit chuh a thim a, a muchien thei ta puoh a. Joseph chun a pui a, amah chun a na châwp a, a na pawm a.

¹¹Chun, Israel chun Joseph kawmah, “Na mel muh hi kinem talo ka hi a, himahlele, Pathien in na suonte mel tieng le ei muhsak ahi ta hi,” a ti a.

¹²Joseph in amau chuh a pa khûp kal apat chun a kaidawk a, a maia leisi’n a bawkkhup a.

¹³Chun, Joseph chun a nih u chun a kai a Ephraim chuh a khut changlam in Israel khut veilam pang ah a kai a Manasseh chuh a khut veilam in Israel khut changlam pang ah a kai a, a hun pui naia.

¹⁴Himahleh Israel chun a khut a thun kalh a, a khut changlam chuh Ephraim, a naupangzaw lu chung achun a nga a; a khut veilam chuh a upazaw Manasseh lu chung achun a nga ta a.

¹⁵Zie chun Joseph chuh a vangsak a, “Ei suonte Abraham leh Isak in a na a sep sek uh Pathien, zie naupangte hi vang pien!

¹⁶Gitlohna chengcheng apat a ei hukdawk sek vânsâwlchâk chun, naupangte hi vangsak hen! Chun, ka min leh ei suonte Abraham leh Isak min chuh zie naupangte chung ahin um zing hen! chun, khawvel lailung ah mipi nasa tak hiding in hung pung u hen,” a ti a.

¹⁷A pa’n a khut changlam Ephraim luzâng a a ngak chuh Joseph in a muh phetin a ki-awi ta puoh a; tichun, a pa khut chuh Ephraim luzâng apat a Manasseh luzâng a chawn dingin a dawm kâng a.

¹⁸Chun, Joseph in a pa kawmah, “Hepa, khuti ding chuh ahi puoi: cha lutîl chuh zie hih ahi, na khut changlam hi a luzâng ahin nga zawh,” a ti a.

¹⁹Himahlele, a pa chuh a ut puoh a, “Ka hêi, ka chapa, ka hêi. Manasseh suonte hi nam lopitak hung hi ding ahiu hi. Amahvang chuh a suohpih naupangzaw chuh amah sangin hung lopi zaw’n tin, chun, a suonte chuh nam lopitak hung hi ding ahiu hi,” a ti a.

²⁰Khutichun zie ni chun vang a pie ta a, “Israel chate chun vangsakna thu a sam tieng u leh na min un sâm in au, ‘Ephraim leh Manasseh guolin Pathien in hun siem hen,’ ti’n au,” ti’n a gen a, zie guol hin Jakob chun Ephraim chuh Manasseh masang achun a kawih ta a.

²¹Chun, Israel chun Joseph kawmah, “Ngaitie, thi ding ka hi ta a, himahlele, Pathien chuh na kawmah um intin, na pilepute gam ahin hun puikit in a.

²²Zielo chule, na suohpihte chanvo sangin chan khatin ka hun pie tam zawi, ka chemzâm leh ka thalphel Amor te khuta pat ka lâksak ngêi khah,” a ti a.