Read Gangte THILSIEMBUL 49 Bible Online

THILSIEMBUL 49 - Gangte bible

THILSIEMBUL 49

¹Chun, Jakob in a chapate chuh a sama, hiti hin a gen a, “Tunung a na chung u a thil hungtung ding chuh ka hun hilh theihna dingin hung kikhawm un:

²“Nang uh Jakob chapate, hung kikhawm unla, ngaithau in: na pau Israel thugen hi ngaithau in.

³“Reuben nang hi ka cha lutîl, ka thilhih theihna, ka hatna gah masapen na hi; Sânpenna leh thuneihna chuh nanga ahi.

⁴Himahleh, tui banga detlo na hi a; chungnun pên na chuh chang puo’n la; Na pa zalkhunpi na kaih ziekin; zielai chun zie chuh na hih buok a.

⁵“Simeon leh Levi hi unau ahiu a; A chemzâm hawu chuh thisan suohna matchâk ahi a,

⁶Aw ka thagau, a kiholim nau achun tel ki’n la, Ka lopina, nang vang a kikhawpkhawm nau achun le, chanmun nei diek ki’n, A lungnat un mi a that u a; a genhak un bâwngchal tha a sat u a,

⁷A lungnat nau achun hansie dawl u hen, lauh-um tak ahi ngâl u a: A lungnatnau achun le hansie thuok u hen, nunsie tak ahi ngâl u a: Jakob achun amau chuh hih dalh ing ka ting, Israel lak achun thehdalh ing ka.

⁸“Juda, nang vang na suohpihte’n hun pakcha’n au. Na khut chuh na melmate ngâwng ah nga’n na tin; na pa chapate chuh na masang ah khun un au.

⁹Juda chuh sakeibaknei bang ahi a, A sa nek ding that a, a kul lama vai kit a, Kizeh a, kuol tawbang ahi, Kuoma’n a subuoi ngam puou hi.

¹⁰Leng mawlh chuh Juda apat chun mang puo’n tin, Vaihawmna mawlh chule a kengkal apat in mang diek puo’n a; Shiloh hung masangsieh chun; chun, namtin in amah thu awi un au.

¹¹A sakawlno chuh grep gui ah a hen a, a sabiltung no chuh Grepgui hawih chi achun a hên a; a silhlechen hawu chuh uain ah a sawp a, A puon chu le grep tui san in a sawp a,

¹²A mit haw chuh uain in hih san intin, A ha haw chule bâwngnawi a hih vam in um ina.

¹³“Zebulun chuh tuisuohgiet pang ah cheng intin: Lawngchawlhna mun hung hi’n a. A gamgi chuh Zidon chan hi’n tin;

¹⁴“Issakar hi sabiltung hattak, Belam huong kal a bawk ahi.

¹⁵Kichawlh chuh pha’n a he a, Gam chule nuom a sa a; Tichun, thil gik puo dingin a liengko a hih niem a, pawngbawl a nasep sak dingin suok in a hung um ta a.

¹⁶“Dan hin a mite chuh, Israel nam laka nam khat hi dingin vaihawm sak in a.

¹⁷Dan hi lamlien a gulsie um tawbang hi’n tin, Lampanga gulsie, A chunga chuongte a thalngadêk a kie khawp hiela, sakawl keng bawm chu sek bang hi’n a.

¹⁸“Aw LALPA, na hukdamna chuh ka ngak zing hi.

¹⁹“Gad hi gâl in nawh intin, Himahleh amah chun lehnawh in, delhzui zaw’n a.

²⁰“Aser hi a nek lim in tin, Lengte nek chi lim taktak hihdawk in a

²¹“Naphtali hi sazukpi thahdawk ahi; Thu phatak haw a gen sek hi.

²²“Joseph hi bâk gah nuom tak ahi, Tuikhuk panga bâk gah nuom tak chuh; A bâkneu haw chun suong bang a zam khum a.

²³A melmate chun amah chuh nasatak in a do u a, A kap u a, nasa takin a hosie sek u a:

²⁴Himahlele, amah thalpo chuh khauh tak in a um zing a, A bân tha haw chuh hihhat in a um a, Jakob Mi Hat Pathien khut ngêi leh, (zie apat chun Belam chingpa Israel te Suongpi chuh ahung uma.)

²⁵Na pa Pathien, nang hun panpih ding a Bangkim hihtheipa, Chunglam van vangsakna haw, Nuoi lam a tui thuk tak vangsakna haw, nawitui leh sûla vangsakna haw, Nang mah hun vangsak ngêi ding pa, Bangkim hihtheipa sukhat in a um a.

²⁶Na pa hun vangsakna te hin, ei suonte vangsak sakna te chuh; Kumsawt tâng tâwp dawng chanin a khup zaw ta ahi. Ziehaw chuh Joseph lu chung ah um intin, A suohpihte kawm apat kawih chuom a um lusip achun um ina.

²⁷“Benjamin hi ngei gawlham tak bang ahi a, Zingkal in a sapeh chuh ne’n tin, Nitâk lam leh a gâllâk chuh hawm ina,” a ti a.

²⁸Ziehaw cheng hih Israel nam sawmlenihte chuh ahiu a: zie thu chule amau haw vangsakna a a pau thugen chuh ahi: vangsakna a chan ding bang chiet un vang a pie chiet tai.

²⁹Chun, amau chuh thugo sieh a pie a, a kawm u ah, “Ka chipihte kawma puih a um ding ka hi tai: Hit mi Ephron lo a kâwlhâwm,

³⁰Kanaan gama Mamre zawn a Makpelah lo a kâwlhâwm, Abraham in kivuihna mun go ding a,

³¹Hit mi Ephron apat a a lo puma a châwk a khan ei hun vui un.

³²Zie tak achun Abraham leh a zi Sarah chuh a vuiu a; zie tak achun Isak leh a zi Rebekah chuh a kivui a; zie tak mah achun Leah le kavui hi.”

³³Chun, Jakob in a chapate kawma thu a vaithak zawh chun, a keng haw chuh zâlkhun ah a khang kai a, a hat a hung tawpa, a chipihte kawm a puih in a um tai.