Read Gangte THILSIEMBUL 5 Bible Online

THILSIEMBUL 5 - Gangte bible

THILSIEMBUL 5

¹Ziehi Adam suonte chuonna lehkhabu chuh ahi. Pathien in mihiem a siem ni khan amah batna nei in a siem a;

²Amau chuh pasal leh numei in a siem a; vang a pie a, siem ahih niu ngêi khan a min dingun “Mihing” ana sa tai.

³Chun, Adam chuh kum za leh sawmthum ahih in amah mel leh amah lim bang pu chapa a nei a; a min dingin Seth a sa a.

⁴Seth a neih nung in Adam chuh kum zagiet a dam a: chanu leh chapate a hing kit hi.

⁵Tichun, Adam damsung chengcheng chuh kum zakuo leh sawmthum ahi a; chun, a thi ta a.

⁶Seth chuh kum za leh nga a hih in chapa Enos a nei a,

⁷Chun, Enos a neih nung in Seth chuh kum zagiet leh sagih a dam a, chanu leh chapate a hing kit a.

⁸Tichun Seth damsung cheng chuh kum zakuo leh sawmlenih ahi a, chun, a thi ta a.

⁹Chun, Enos chuh kum sawmkuo a hih in chapa Kenan a hing a:

¹⁰Kenan a neih nung chun Enos chuh kum zagiet leh sawmlenga a dam a, chanu leh chapate a hing kit a;

¹¹tichun Enos damsung cheng chuh kum zakuo leh nga ahi a, chun, a thi ta a;

¹²Chun, Kenan in kum sawmsagih a hih in chapa Mahalalel a hing a.

¹³Mahalalel a neih nung in Kenan chuh kum zagiet leh sawmli a dam a, chanu leh chapate a hing kita.

¹⁴Tichun Kenan damsung cheng chuh kum zakuo leh sawm ahi a, chun, a thi ta a.

¹⁵Chun, Mahalalel chuh kum sawmgup leh nga a hihin, chapa Jared a hing a,

¹⁶Jared a neih nung in Mahalalel chuh kum zagiet leh sawmthum a dam a, chanu leh chapate le a hing kit a,

¹⁷Tichun Mahalalel damsung cheng chuh kum zagiet leh sawmkuo leh nga ahi a, chun, a thi ta a.

¹⁸Chun, Jared in kum za leh sawmgup le nih a hihin, chapa Enok a hing a,

¹⁹Enok a neih nung in Jared chuh kum zagiet a dam a, chanu leh chapate le a hing kit a,

²⁰Tichun Jared damsung cheng chuh kum zakuo leh sawmgup le nih ahi a, chun, a thi ta a.

²¹Chun, Enok in kum sawmgup leh nga a hihin, chapa Mathusel a hinga:

²²Mathusel a neih nung in Enok chuh kum zathum sung chuh Pathien tawh a kivawp zing u a, chanu leh chapate le a hing kit a:

²³Tichun Enok damsung cheng chuh kum zathum leh sawmgup leh nga ahi:

²⁴Enok chuh Pathien tawh a kivawp zing sek u a: chun, Pathien in a lamang a, a um ta puoh a.

²⁵Chun, Mathusel chuh kum za leh sawmgiet leh sagih ahih in, chapa Lamek a hing a;

²⁶Lamek a neih nung in Mathusel chuh kum zasagih leh sawmgiet leh nih a dam a, chanu leh chapate le a hing kit a:

²⁷Tichun Mathusel damsung cheng chuh kum zakuo leh sawmgup leh kuo ahi a: chun, a thi ta a.

²⁸Chun, Lamek in kum za leh sawmgiet leh nih a hih in, chapa a hing a:

²⁹Zie ngêi hin LALPA hansie lawh lei a I nasepnau leh khut a I sepgimnau ahin ei thamuon tan a, ti’n a min dingin Noah a sa a.

³⁰Noah a neih nung in Lamek chuh kum zanga leh sawmkuo leh nga a dam a, chanu leh chapate a hing kit a:

³¹Chun, Lamek damsung cheng chuh kum zasagih leh sawmsagih leh sagih ahi a, chun, a thi ta a.

³²Noah chuh kum zanga mi ahi a, amah chun chapa thum, Shem, Ham leh Japheth a hing hi.