Read Gangte THILSIEMBUL 50 Bible Online

THILSIEMBUL 50 - Gangte bible

THILSIEMBUL 50

¹Chun, Joseph chuh a pa luong chung achun a bawk a, a kap a, a mai chuh a châwp a châwp a.

²Chun, Joseph in a suokte, damdawi thiem haw chuh a pa luong chuh muot thei lo a siem dingin thu a pie a; tichun, damdawi thiem haw chun Israel luong chuh muot theilo in a siem tau a.

³A luong siemna’n ni sawmli a luta, khutia muot theilo a siemna ding chun ni sawmli a lut a. Aigupta mite zie zat chuh lut sek mawng ahi; chun Aigupta te chun amah chuh ni sawmsagih a sun u a.

⁴A sûnnau hun chuh a kichaih phetin, Joseph in Pharaoh miliente chuh a hopih a “Na mit ka tun chun, lungsiet takin Pharaoh zak in,

⁵Ka pa’n, thi ding ka hita a Kanaan gama ka thân dinga ka guonggalh sa a um a, zie tak ngêi achun ei hun vui un ti’n ei kihâksiel saka. Zieziekchun, lungsiet takin, ka pa vui dingin ei chieh sak inla, hungkit pai zieng ing ka, a tii, ti’n va gen un,” a ti a.

⁶Tichun, Pharaoh chun, “A hun kihâksiel sak bang chun na pa chuh va vui ta le,” a ti a.

⁷Tichun, Joseph chuh a pa vui ding chun a chieh ta a, chun, Pharaoh suokte chengcheng, a inkawte laka upate leh Aigupta gama upa chengcheng te leh,

⁸Joseph inkawte chengcheng leh, a suohpihte leh a pa inkawte chun a zui u a; a cha neucha chateu leh, a belam hawn u leh, a bâwng hawn hawu mai chuh Gosen gam achun a nusieh u a.

⁹Chun, a kawm u ah kangtalaite leh sakawl chung chuong mite’n le a zui u a; tichun lawiting tak mai ahiu hi.

¹⁰Chun Jordan lui gala Atad buhphuol chuh a tung u a, zie chun nasa takin a kah tau a: Joseph in a pa sûnna ni sagih sung a siem a.

¹¹Zie gama mi Kanaan haw chun Atad buhphuol a a mithi sun u chuh a muh un, “Ziehi Aigupta te mithi sûnna nasatak ahi hi,” a tiu a, zieziekchun, zie mun min ding chun Abel-Mizraim a sa tau a, zie chuh Jordan lui gala um ahi.

¹²Khutichun, a chapate chun thu a piek bang takin a hih sak u a,

¹³a chapate chun Kanaan gam ah a zawn lut u a, Abraham in kivuihna mun go ding a Hit mi Ephron apat a a lo tawh a chawkkhawm, Mamre zawn a Makpelah lo a kâwlhâwm achun a vui tau hi.

¹⁴Chun, Joseph chuh a pa a vuih zawh chun, amah tawh a suohpihte tawh, a pa vui dinga va chieh cheng chengte chu tawh Aigupta gam ah a chieh kit tau hi.

¹⁵Chun, Joseph suohpihte chun a pau thih chuh a ngaihtuoh u leh, “Joseph in ei mudah intin, a chunga I thil hihkhelh cheng chenguh phuba khah I chung u ahin la khâna ie aw,” a tiu a.

¹⁶Tichun Joseph hilh dingin mi a thuthak u a, “Na pa chun a thih makhan, hiti hin a gena,

¹⁷‘Lungsiet takin na suohpihte bawhsietna leh a gitlohnau chuh ngaidam in, na chungah thil vang ana hihkhiel uh ahi,’ ti a na gen ding u ahi, ti’n thu ei pie a, tichun lungsiet takin na pa Pathien suokte sukkhelhna chuh ngaidam in,” a tiu a. Chun, a kawma thu a gen lai u chun Joseph chuh a kap ta a.

¹⁸A suohpihte chuh la a va chieh u a, a masang achun a bawkkhup tau a; “Ngaiin, na suok in um ung kau,” a tiu a.

¹⁹Himahlele, Joseph chun a kawm u ah “Lau kiu in, Pathien thasang ka hi a ahim?

²⁰Nang un vang lungthim phalo nei in ka chungah thil gilo hih na guou a; himahlele, Pathien chun tuni banga, mi tamtak hingledam a hukhinna dingin, thilpha a suoh sak guot ahi zaw ngâl a.

²¹Khutichun lau kiu in, nangmau haw leh na cha neuchacha teu chuh vak ing ka,” a ti a. Khutichun a thamuon a, zaidam takin amau chuh a hopih a.

²²Chun, Joseph chuh amah leh a pa inkuonte tawh Aigupta gam achun a um u a: Joseph chuh kum za leh sawmkhat a dam a.

²³Chun, Joseph chun Ephraim cha, a tute khang thum chan a mu a: Manasseh chapa Makir chate le Joseph pheichung ah a pieng u a.

²⁴Chun, Joseph in a suohpihte kawmah, “Thi ding ka hi ta a, himahlele Pathien in hun tawhtha ngêi ngêi intin, zie gam apat hin hun puidawk in, Abraham te, Isak te, Jakob te kawma kihâksiela piek a tiem gam ah hun puito ina,” a ti a.

²⁵Chun, Joseph in Israel suonte chuh a kihâksiel sak a, “Pathien in hun tawhtha ngêi ngêi ding ahi a, ka guhhaw hi zie apat ahih na zawn toh dinguh ahi,” a ti a.

²⁶Khutichun, Joseph chuh kum za leh sawmkhat mi ahih in a thi a; tichun, a luong chuh muot thei lo in a siem u a, Aigupta gam ah thankuong ah a siel tau hi.