Read Gangte THILSIEMBUL 6 Bible Online

THILSIEMBUL 6 - Gangte bible

THILSIEMBUL 6

¹Chun, hiti hi ahi a, lei chunga mihiem a hung pun a, chanute a hun neih zel lai un.

²Pathien chapate chun mihiem chanute chuh melhawih takin a muu a; tichun a deih takphawt u chuh zi’n a nei tau a.

³Tichun LALPA chun, “Ka thagau in mihiem chuh chenpih zing puo’n a, amau haw chuh phehlevo ahi ngâl u a; himahleh kum za leh sawmnih chuh dam in au,” a ti a.

⁴Zielai chun Nephilim te chuh lei ahin a um u a; zie nung chun le Pathien chapate’n mihiem chanute chuh a kivawppih u a, amau haw a cha a neih sek lai u khan le a um u a: ziehaw chuh malaia mihat, mi minthang haw kha a hiu hi.

⁵Chun, LALPA chun, lei ahin mihiem nunsiet dân chuh huoisie tak ahi tih leh, a lunggil u a gitlohna ngaihtuoh zing zing ahiu hi tih a mu a.

⁶Tichun, lei ahin mihiem a na siem tâk ziekin LALPA chuh a kisik a, a lunggil a nat lawh ta a.

⁷Tichun LALPA chun, “Ka mihiem siem hi lei chung apat hin sumangthai mai ing ka; mihiemte, gamsate, bawka vak ganhingte, chung leng vachate natieng in ka na siem tâk ziekin ka kisik hi,” a ti a.

⁸Noah vang chun LALPA mit a tung a.

⁹Ziehaw hi Noah suonte chuh ahiu hi. Noah chuh mi diktat ahi a, a khanguolpih haw lak achun gensiet bei ahi: Noah chuh Pathien tawh a kivawp sek u a.

¹⁰Noah chun chapa thum a nei a Shem, Ham leh Japheth ahiu hi.

¹¹Chun, lei hi Pathien mitmuh in a sie zo ta a, lei hi kipawngbawlna’n a dim zo tai.

¹²Chun, Pathien in lei hi a en a, ngaitie a sie zo tai tih a mu a, leichung a hinna nei chengcheng umdan chuh a thanhuoi tâk ziekin.

¹³Chun, Pathien in Noah kawm achun, “Phehlevo chengcheng tawpna chuh ka ma ah a hung tung tai; amau haw ziekin lei hi kipawngbawlna’n a dim zo ta ngâl a; tichun ngaiin, a lei pum in sumangthai ding ka hi.

¹⁴Nang a dingin châk thing in lawng siem inla, lawng sung achun a pindan haw siem in na tin, a sunglam leh a pawlam chuh châknai a na châl suok ding ahi.

¹⁵Chun, na siem ding dân chuh hiti hi ahi: lawng dunglam chuh tawng zathum hi’n tin, a sânlam chuh tawng sawmthum hi’n tin, a let dân chuh tawng sawmnga hi’n a.

¹⁶Lawng achun tukvan siem in la, a chunglam tawng khat hal achun na zawh ding ahi; lawng kawtkhak chuh a pang ah na siem ding ahi: dan nuoinung leh dan nihna leh dan thumna nei a na siem ding ahi.

¹⁷Ngaiin, keimah ngêi in lei ahin tui let sak ing ka ting, phehlevo nei, amau a hinna hu nei taphawt chuh vannuoi apat in sumang ding ka hi; lei a thil um tincheng hi thi vek in au.

¹⁸Himahleh, ka thugawlh chuh na chungah sudet zaw’ng ka ting; lawng a chuh na lut ding ahi a, nang na lut ding ahi a, na chapate tawh: na zi tawh, na chapate zite le nang kawma a lut dinguh ahi.

¹⁹Chun, Phehlevo nei ganhing cheng, akawp kawp in nang kawma hinsuoh ding in lawng sunga chuh na puihlut ding ahi a; anu leh achal hiding ahi.

²⁰Vacha chikim, gamsa chikim leichung a bawkvak ganhing chikim nih zelin hinsuoh dinga na kawma a hung dinguh ahi.

²¹Chun, an na nêk theih chi chengcheng uh lakhawm inla, na kawmah kawihkhâwm in, tichun nang leh amau a dingin an hin au,” a ti a.

²²Chun, Noah chun khutibang tak chun ahih a, Pathien in a kawma thu a piek bang tak chun ahih ta a.