Read Gangte THILSIEMBUL 7 Bible Online

THILSIEMBUL 7 - Gangte bible

THILSIEMBUL 7

¹Chun, LALPA’n Noah kawm achun, “Nang leh na inkuonpihte chengcheng chuh lawng achun lut un; nang chuh tulai khanga mite lak ahin ka mitmuh in mi diktat na hi tih ka hun hêi”

²Sa thieng tincheng lak ah a chal leh a nu tuok sagih zelin, sa thienglo lak ah, a chal leh a nu, tuok khat zelin;

³chung leng vachate lak ah, a nu leh a chal tuok sagih zelin; lei chung pumpi a chi suoh dinga hinsuoh dingin na kawma na puih ding ahi.

⁴Chun, ni sagih a um nalai a, zie nung chuleh lei chung ahin ni sawmli leh zan sawmli sung guoh zuk sak ing ka ting; leichung a ka thilhing siem tincheng hi sumangthai ing ka, a ti a.

⁵Tichun Noah chun LALPA’n a kawma thu a piek bang tak chun ahih ta a.

⁶Chun, Leia tui a hung let lai chun Noah chuh kum zagup mi ahi a.

⁷Tui a let ding ziekin Noah chuh lawng achun a lut a; a chapate leh a zi leh a chapate zite le a lut u a.

⁸Chun, Pathien in Noah kawma thu a piek bang khan sa thieng laka leh sa thienglo laka le, chung leng vacha lak ale, lei a bawkvaka chieh tincheng lak ale

⁹anu leh achal, a tuok tuok in, Noah kawmah lawng achun a lut tau hi.

¹⁰Chun, ni sagih nung chun lei ahin tuisang a hung let ta a.

¹¹Noah chuh kum zagup a hih kum, a tha nihna ni sawm leh sagih ni chun, zie ni ngêi chun tui thuk lientak tak nak haw chengcheng chuh ahung puok zak a, van tukvanhaw le a hung kihawng ta a.

¹²Ni sawmli leh zan sawmli sung chuh lei ahin guohpi a zu ta a.

¹³Zie ni ngêi chun Noah leh a zi, a chapate Shem, Ham leh Japheth leh a ziteu chu tawh lawng achun a lut u a;

¹⁴Gamsa chitin cheng amau haw chi bang zelin, gan guol tincheng amau haw chi bang zelin, ganhing leia bawkvak tincheng amau haw chi bang zelin, vacha tincheng amau haw chi umdan bang zelin, tha nei chitin amau a chi bang zel in a lut u a.

¹⁵Tichun Phehlevo nei cheng leh a naka hinna hu nei taphawt chuh a kawp kawp in Noah kawma lawng sung achun a lut tau a.

¹⁶Chun, Pathien in a kawm u a thu a piek guolin Phehlevo nei chengcheng laka anu leh achal zelin a lut u a; chun LALPA’n amah chuh a khakkhum ta a.

¹⁷Chun, Tui chuh lei ahin ni sawmli sung cheng a let a; tui chuh a hung khang a, lawng chuh a lap kâng a, lei chunglam ah a lap kâng ta a.

¹⁸Tui chuh leichung ahin a um zeizui zieng ta a, nasatak in a hung khang ta a, lawng chuh tui chung achun a kilap to zel a.

¹⁹Tichun, tui chuh lei chung ahin akiting zeizui zieng ta a; leichung a tâng sang chengcheng chuh achup suok vek ta a.

²⁰Chun, tui chuh tângsip sang haw chengcheng chung ale a khangto nalai a, tawng sawm leh nga hiela thuk in tânghaw chuh achup suok kêi ta a.

²¹Tichun, phehlevo nei, lei chunga tawithei chengcheng, vachate, gamsate, ganhing lei a bawkvaka chieh cheng leh mihiemte chuh a thi vek tau a.

²²Tichun, leichung hul a cheng, a nak u a hinna hu neita phawt chuh a thi suok tau hi.

²³Tichun, lei chunga thilhing tincheng, mihing leh ganguol, leia bawkvakte chung leng vachate cheng tawh sukmang in a um tau a; Noah leh lawng a a kawma um haw chauh chuh a suokcha tau hi.

²⁴Tichun, tui chuh ni zakhat leh sawmnga sung cheng chuh lei ahin a um zeizui mai ta a.