Read Gangte THILSIEMBUL 8 Bible Online

THILSIEMBUL 8 - Gangte bible

THILSIEMBUL 8

¹Chun, Pathien in Noah leh a kawma thilhing tincheng leh, gancha um haw chengcheng chuh a hezing a; chun, Pathien in lei chung achun huih a nun sak a, tichun tui chuh a hung kiem pan ta a;

²Tui thuk tak nak haw leh van tukvanhaw chu le a hung kikhak ta a, van apat a guoh hung zu chule sukhaih in a um ta a;

³Tichun tui chuh lei chung apat chun a kiem deuh deuh ta a: tichun ni za leh ni sawmnga a beih nung in tui chuh a hung tawm deuh deuh ta a.

⁴Tichun, tha sagihna ni sawm leh ni sagih ni chun lawng chuh Ararat tângah a hung kinga ta a.

⁵Chun, tui chuh tha sawmna tiengin atawm deuh deuh zel a: tha sawmna ni khat ni chun tângsip haw chuh a hung kilang pan ta a.

⁶Chun, ni sawmli nung chun hiti hi ahi a, Noah chun lawng tukvan a siem kha a vak hawng a:

⁷Chun, va-âk khat a lendawk sak a; lei apat a tui chuh a kan nai loh ziekin a leng viel a leng viela.

⁸Chun, lei chungah tui a kâng ta’m tih hetna dingin vakhu a lendawk sak kit a;

⁹Himahlele, vakhu chun chukna ding himhim a mu puoh a, tichun, a kawmah lawng ah a vaikit ta a, tui chun lei chung chengcheng achup naklai ziekin; Tichun, a khut a vak thadawk a, a man a, lawng sung ah a kawmah a la lut ta a.

¹⁰Chun, ni sagih dang a ngak kit tadih a; tichun, lawng apat chun vakhu chuh a thahdawk kit a;

¹¹Chun, ngaitie, vakhu chuh olive nah kilotha tûng a mûk a hun tawk in nitâk lam chun a kawmah a hung lut kit a; khutichun, Noah chun leichung ah tui atawm tai tih a heta a.

¹²Chun, ni sagih dang a ngak kit a; vakhu chuh a lendawk sak kit a: himahleh, a kawmah a hung vaikit ta puoi.

¹³Chun, hiti hi ahi a, Noah chuh kum zagup leh kum khat ahih kum, a tha khatna, a ni khat ni chun, tui chuh lei apat a kâng zo ta a; tichun Noah chun lawng khuhna chuh a ladawk a, a en a; chun ngaitie, lei chung chuh a hung hul huoi ta a.

¹⁴Chun, a tha nihna ni sawmnih leh ni sagih ni chun lei chuh a hung hul zo ta a.

¹⁵Chun, Pathien in Noah kawm achun a gena, “Lawng apat pawt inla,

¹⁶nang leh, na zi leh, na chapate zite le nang kawmah pawt u hen.

¹⁷Phehlevo chengcheng laka thilhing tincheng na umpih hawu kha, vachate, ganchate, ganhing lei chunga bawkvaka chieh tin cheng haw kha tawh na kawmah puidawk in, lei ahin no nei in, chi tamtak suona a hung pun theihna dingun,” ti’n a gen a.

¹⁸Tichun, Noah chuh a chapate tawh a zi tawh a chapate zite tawh lawng apat chun a pawtdawk tau a:

¹⁹gamsa tin chengte, ganhing tin chengte, vacha tin chengte, lei chunga tawithei tincheng chuh amau haw chi dungzui chietin lawng apat chun a pawtdawk tau a.

²⁰Noah chun LALPA dingin maichâm a siem a; sa thieng lak apat leh vacha thieng lak apat chuh a la a, maichâm achun hâlmang thilpiek in a pie ta a.

²¹Chun, LALPA’n zie gimlim chuh a he a; LALPA chun a lunggil in, “Lei hi mihiem ziekin hansie lawh kit ta puo’ng ka, mihiem lunggil ngaihtuohna haw chuh a naupan lai apat in a gilo ngâl a; tu a ka gawt bang hin thilhing tincheng le gawt kit ta puo’ng ka,

²²Lei umsung chengin thai chîn hun leh agah lawh hun, nipi leh phalbi te, sun leh zan bei ta puo’n a,” a ti a.