Read Gangte THILSIEMBUL 9 Bible Online

THILSIEMBUL 9 - Gangte bible

THILSIEMBUL 9

¹Chun, Pathien in Noah leh a chapate chuh a vangsak a, a kawm u ah, “Chi tamtak suona hung pung in, lei hi luoh dim un.

²Lei chunga sa tin cheng leh, chung leng vacha tincheng leh leichung a bawkvak tincheng leh tuisuohgiet a nga tincheng chun nanguh lauhna leh kihchakna nei un au, na khut u a piek ahih tâk ziekun.

³Thilhing tawithei taphawt chuh nang uh dingin an hi’n au; ancheh-lohing ka hun piek bang khan bangkim ka hun pie vek hi.

⁴Amahvang chuh, sa a hinna thisan um zing puma na nek loh dinguh ahi, a ziek chuh, thisan chuh hinna ahi ngâla.

⁵Chun, na hinna thisan phuba chuh la ngêi ngêi ding ka hi; gamsa tin cheng chungah phuba lang ka ting, mihiem chung ale, mitin a suohpih chung ale mihing hinna phuba chuh la ding ka hi.

⁶Kuole mihiem thisan suoh ta chuh mihiem mah in amah thisan le a suoh ding ahi; mihiem hi Pathien batna nei a siem ahi ngâla.

⁷“Nang u chuh chi tamtak sep in hung pung unla, tichun na suonteu chun lei hi a hun luoh dim theihna dingun,” a ti a.

⁸Chun, Pathien in Noah leh a kawma um a chapate kawm achun thu a gena,

⁹“Keimah ngêi in na kawm u leh na nung u a na suonteu kawm ale ka thugawlh chuh ka sudet hi;

¹⁰Na kawm u a um thilhing tincheng vachate, ganchate, gamsa tin chengte kawma le; lawng apat a hung pawt, leia gamsa tin cheng haw chanin.

¹¹Chun, na kawm a ka thugawlh chuh sudet ing ka ting; thilhing chengcheng tuilet a sukmang in um kit ta puo’n tin; lei susie dingin le tuisang let kit ta puo’n a,” ti’n a gen a.

¹²Chun, Pathien mah in, “Ziehi kei leh nang u leh na kawm u a thilhing tincheng te leh khang um zel ding chana ka thugawlh tawp lo ding tiemtehna chuh ahi.

¹³Mei ah ka sakhizozum ka um sak a, zie chuh kei leh lei kal a ka thugawlh melchikna ding chuh hi’n a.

¹⁴Chun, hiti hi hung hi’n tin, lei chunga meipi ka zam sak chung achun sakhizozum chuh kilang intin,

¹⁵kei leh nang u leh thilhingte kal a ka thuthun chuh hezing ing ka ting, tichun, phehlevo nei cheng sumang dingin tuisanglet kit ta puo’n a.

¹⁶Sakhizozum chuh mei laka ahung zâm tieng zie chuh mu’ng ka ting; kei leh leichung a thilhing um chengcheng tawh kal a kumkhuo a dinga ka thugawlh chuh hezing ing ka.

¹⁷Chun, Pathien mah chun Noah kieng ah, zie chuh keimah leh lei chunga thilhing um chengcheng kal a ka thugawlh sukdet melchikna ahi,” a ti a.

¹⁸Chun, Noah chapate lawng a pawt haw chuh Shem, Ham leh Japheth ahiu a, Ham chuh Kanaan pa ahi.

¹⁹Zie mi thum te chuh Noah chapate ahiu a, zie mite apat chun leichung pumpi ah mihiem a hung kithehzâk tau hi.

²⁰Chun, Noah chuh loneimi a hung hi a, grep hun chîng masapen chuh ahi.

²¹Tichun, uain chuh a dawna, a kham ta a, tichun puon-In achun a kuolsie ta a.

²²Chun, Ham, Kanaan pa chun a pa sangawn a kuol chuh a muh phetin pawlama a suohpihte nih chuh a va hilh a.

²³Tichun, Shem leh Japheth chun puon a lau a, a liengko u a zawn in kinungchawn in a chieh u a, a pau kuolsie chuh a khuh tau a; a mai un lehlam a ngau, a pau kuolsie chuh a mu puou hi.

²⁴Chun, Noah chuh a uain kham a hung pil phetin, a chapa naupang zaw’n a chunga a thilhih zie chuh a he ta a.

²⁵Khutichun, “Kanaan chuh hansie dawl in um hen la; A suohpihte suokte suok in um hen,” a ti a.

²⁶“LALPA, Shem Pathien chuh pahchak in um hen la; Kanaan chuh a suok in um hen.

²⁷Pathien in Japheth chuh sulien henla, Shem puon-In haw achun cheng henla; Kanaan chuh a suok in um hen,” a ti a.

²⁸Chun, Noah chuh tuilet nung chun kum zathum leh kum sawmnga a dam a,

²⁹Tichun, Noah damsung chuh kum zakuo leh kum sawmnga ahi a: chun, a thi ta a.