Read Gangte 2 SAMUEL 14 Bible Online

2 SAMUEL 14 - Gangte bible

2 SAMUEL 14

¹Khutichun Zeruiah chapa Joab chun leng lungthim chuh Absalom chung ah aum zing hi tih a na he a.

²Tichun Joab chun Tekoa khuo ah mi a sawl a, zie a numei pil khat chu a va puih sak a, a kawmah, “Lusûn bangin kisiem inla, lusûn puon silh inla, sathau le kinuh lo in numei sawttak apat mithi sun tawbang in um in:

³Tichun leng kawmah chieh inla, hilh dinga ka hun tih hi va gen in,” a ti a. Khutichun Joab chun amahnu chuh a gen ding chuh a hilh ta a.

⁴Chun, Tekoa khuo a numei chun leng kawm a thu a gen ding chun maia lei si’n a bawkkhup a, chibai a bûka, “Aw lengpa, ei panpih in,” a ti a.

⁵Lengpa chun a kawmah, “Bangti zie ahi tam le?” a ti a. Chun amah chun a dâwng a, “Meithai ka hi a, ka pasal chu a thi ta a.

⁶Na suok nu hin chapa nih a nei a, a nih u chun lo ah a kisuol u a, kuomah a phelh ding umlo in, khat chun khat chu a zêpa, a that ta a.

⁷Chun, ngaitie, a inkawte chengcheng chun na suoknu hi ei kilanpih tau a, ‘A suohpihpa thatpa chu a suohpihpa a thah zieka ka thah thuk theihna dingun ei pieu in, tichun goluoh ding le hih mangthai ngâl ing kau,’ a tiu a: khutibang chu a hih u chun chapa beiin ei kawih untin, ka pasal chu min neilo in leh lei chunga suon himhim nei lo a um mai ding ahi,” a ti a.

⁸Chun, leng chun numei kawm achun “Na In ah chieh phawt inla, na chungchâng thu a chun thu hun pie kit mai ing ka,” a ti a.

⁹Chun, Tekoa khuo a numei chun leng kawm achun, “Aw lengpa, hepu, sukkhelhna mawlh chu kei chunga leh ka inkawte chungah kie mai hen: leng leh leng chutphah chun mawhpuo kihen,” a ti a.

¹⁰Chun, leng chun “Kuole na chunga bang ahim gen ta chu kei kawmah hun pui inla, hun subuoi kit ta hiel puo’n au” a ti a.

¹¹Chun, numei chun, “Hepu, ka inkawte ka chapa thihna zieka phuba lâkna mawhpuo chengcheng chun ka chapa dangte that a thil gilo lienzaw sem a hih loh na dingun LALPA na Pathien kawmah ngên in,” a ti a. Chun, David in, “Na chapa samzang khat le tuol ah kie puo’n a, ti’n LALPA hing zing min salin ka gen hi,” a ti a.

¹²Khutichun numei chun, “Na suoknu hin lengpa ka pu kawma hin thu kam khat hun gen kit ing ka,” a ti a. Chun, amah chun, “Gen ta leh,” a ti a.

¹³Chun, numei chun, “A hih leh bang ziekin ahim Pathien mite dodal a hitibang a hi hih na guot? zie thu haw apat hin leng chu thiemloh na kichan sak ahi, na gen bang taka chu nangmah chapa ngêi le a taihmang na apat a chu a hung vaihkit na phal loh ziekin.

¹⁴Ka bawn u a ka thih ngêi dinguh ahi tai, tuisik tuola kibuo luok kit theih loh tawbang ka hiu a; Pathien in kuomah zah chuom a nei puoh a; himahleh leng chun mi gâltai chu bangti ahim a sapkitna ding lampi ngaihtuoh thei ding ahi.

¹⁵Khutichun ka pu, leng kawma zie thu gen dinga ka hung hi le mi ka lauh ziek ahi a: na suoknu hin leng kawmah gen phawt leng, leng chun a suoknu ngetna chu a pitin sak kha mawh die ti ka hi.

¹⁶Leng chun kei leh ka chapa hi Pathien piek go luoh ka hih na ding apat hih mangthai guote apat na suoknu hi hukdawk dingin ei na ngaihthak sak ina ka ti a.

¹⁷Khutichun na suoknu ding hin, lengpa ka pu thu chu lungmuon um tak hi henla: a sie apha na khen dingin lengpa ka pu chu Pathien vânsâwlchâk tawbang ahi ngâl a: LALPA Pathien chu na kawmah um hen ka tii,” a ti a.

¹⁸Chun, lengpa chun a dâwng a, numei kawm achun, “Ka hun dawt taphawt chu kei kawmah bangmah îm nei ki’n aw?” a ti a. Chun, numei chun, “Lengpa ka pu chun hun gen in le,” a ti a.

¹⁹Chun, leng chun, “Zie thu ahin Joab in telna a nei himhim hi?” a ti a. Chun, numei chun a dâwng a, “Lengpa hepu, na thagau hinna sâlin ka gen hi, lengpa ka pu’n a gen tâksa chu kuoma’n changlam ahim, veilam ahim ah pumpelh thei puou intin: na suok Joab chun ei sawl a, zie thu haw chengcheng hi na suoknu a mawp suok kêi hi:

²⁰thil umdan hih lamdang dingin zie thil haw hi na suok Joab chun a hih ahi: chun, ka pu chu khawvel a thil um chengcheng he thei in Pathien vânsâwlchâk bang mai in a ching ahi,” a ti a.

²¹Chun, leng chun Joab kawmah, “Na thil deih chengcheng chu hih dingin thupukna ka siem tai. Chieh inla tangval Absalom chu va puikit in” a ti a.

²²Khutichun Joab chun maia lei si’n a bawkkhup a, chibai a bûk a, leng chu a vangsak a: chun, Joab chun, “Aw lengpa hepu, lengpa chun a suok ngetna chu a pitin sak ziekin tuni hin na suok hin na mit ka tung hi tih ka hun he tai,” a ti a.

²³Khutichun Joab chu a kipan a, Geshur achun a chieh a, Absalom chu Jerusalem ah a pui ta a.

²⁴Chun, leng chun, “Amah in lam ah chieh hen, a mel ka mu nuom puoi,” a ti a. Khutichun Absalom chu amah in lam ah a chieh a, leng mel chu a mu ta puoh a.

²⁵Israel te chengcheng lak ah Absalom tawbanga melhawih leh pahchak lawh kuomah a um puou a: a keng mawng apat in a sip tiengin dem umna himhim a um puoh a.

²⁶A sam a met chun (kum beih cheng leh a met sek a, a sam chu a gik bêk ziekin a met sek ahi) a sam chu, a bûk sek a, leng teh dana sekel nih ting sek ahi.

²⁷Chun, Absalom in chapa thum leh chanu khat a nei a, a chanu min chu Tamar ahi a, numei melhawih tak ahi.

²⁸Khutichun, Absalom chu kum nih pumlum Jerusalem ah a um a; himahlele leng mel himhim chuh a mu puoi.

²⁹Khutichun Absalom chun leng kawma sawl dingin Joab chu a thuthak a; himahleh a chieh nuom puoh a; a thuthak pha kit a, himahlele a chieh nuom diek puoh a.

³⁰Ziephet chun a suokte kawmah, “Joab lo chu kei lo kawma um ahi a, buhmanpawl a nei a, va hâltum un” a ti a. Tichun Absalom suokte chun lo chu a va hâl tau a.

³¹Khutichun Joab chu a kipan a, Absalom kawm achun a In ah a chieh a a kawmah, “Bang zieka na suokte’n ka lo a hâl uh ahi?” a ti a.

³²Chun, Absalom chun Joab chu a dâwng a, “Ngaitie, bang dinga Geshur apat a hung ka him? zie tak achun um zing leng kei a dinga phazaw ta ding; ti a leng kawma sawl dingin ka hun thuthak a; leng mel chu ei muh sak inla; chun, gitlohna nei ka na hih chun ei that mai un, ti a sawl dinga ka hun thuthak leh na hung nuom puoh a ahi,” a ti a.

³³Khutichun Joab chu leng David kawm achun a chieh a, Absalom thu gen chengcheng chu a hilh a; chun, leng chun Absalom chu a sama, a kawmah a chieh a, leng masang achun a maia lei si’n a bawkkhup a: leng chun Absalom chu a châwp ta a.