Read Gangte 2 SAMUEL 15 Bible Online

2 SAMUEL 15 - Gangte bible

2 SAMUEL 15

¹Chun, hiti hi ahi a, zie thil haw nung chun Absalom chun kangtalai leh sakawlte leh mi sawmnga a masanga tai dingin a guonggalh a.

²Chun, Absalom chu zingkal matak in a tho a, kulh kawtkhak lampi achun a na ding sek a; leng kawma thukhawk hun gen guo taphawtte chu a na sama, “Kuo khuo a um na hi?” a na ti zel sek a. Chun, Na suok hi Israel laka nam khat ka hi a ti zel sek u a.

³Chun, Absalom chun, “I aw, na thu chu a pha’n a dik a; himahlele a ngaihtuoh ding leng in kuomah a guot puoi,” a na ti sek a.

⁴Chun, Absalom mah chun, “Mitin thukhawk gen ding nei ahim, nget ding nei ahim taphawt chu ka kawma a hung na dingun, kei hi zie gam vaihawm ding hin ei siem leh ka ti na e aw, khutichun kitûp taka vaihawm sak sek ding hi veng,” le a na ti sek a.

⁵Hitibang hin le a na hih sek a, kuo hileh amah chibai bûk dinga hun naih taphawtte chu a na bân a, a tu a, a na châwp sek a.

⁶Khutichun, Israel mi leng kawma thugen dinga hung taphawtte chu Absalom chun khutibang chun ana hihzel seka; amah lam ah a na kai pet sek a.

⁷Chun, hiti hi ahi a, kum sawm li a hung beih nung chun Absalom chun leng kawmah, “Hebron khuo a LALPA kawma ka kipautiem na guitun sak dingin ei chieh sak tie.

⁸Na suok hin Suria gama Geshur a ka um lai khan, ‘LALPA’n Jerusalem a nei puihkit phawt chun LALPA na sem ing ka,’ ti’n ka na kipautiem ta ngâl a,” a ti a.

⁹Chun, leng chun a kawmah, “Lungmuong takin chieh mai in,” a ti a. Khutichun a kipan a, Hebron achun a chieh ta a.

¹⁰Himahlele Absalom chun, “Pêngkun gi na zak zak u leh, ‘Absalom chun Hebron ah vai a hawm tai,’ tiu in,” ti’n Israel nam cheng chengte kawm achun mi a sawl gu ta a.

¹¹Chun, Absalom kawm achun a mi chiel, mi zanih Jerusalem apat in a chieh u a, lungthim phatak pu’n a chieh u a, bangmah a he puou hi.

¹²Khutichun Absalom in kithawih nate chu a piek lai in, Gilon mi, Ahithophel, David vaihawmpih chu a khuo Giloh apat in a vak thuthak a. A gûka thil phalo a bawl guot u chu a nasa mah mah ngâl a; Absalom lam achun mipite chu a pung deuh deuh ta mai u a.

¹³Chun, David kawm achun, “Israel mite lunggil chu Absalom lam ah a puk nasa mah mah tai,” ti’n mi a hung a.

¹⁴Chun, David chun Jerusalem a a mi liente chengcheng kawm achun, “Kipan unla, taidawk hitiu, Absalom apat hin kuomah I suohchak theih tuok puoh ngâl un: pawt meng un, khutilochun ei hun delhpha pai zieng untin, I chung u ahin thil phalo tak hun tun untin, chemzâm in khuo hi hun do kha’n au,” a ti a.

¹⁵Chun, a suokte chun a kawmah, “Ngaitie, na suokte hi ka puu, ka leng un a guot taphawt hih dingin ka kisazo zing ui,” a tiu a.

¹⁶Chun, leng chu a pawt a, a inkawte cheng chengin a zui u a. Chun, leng chun In ngak dingin a meite numei sawm a nusieh a.

¹⁷Chun, leng chu a pawt a, mipi chengcheng chun a zui u a; chun, gamla deuh mun khat Beth-merhak a chun a kichawl u a.

¹⁸Chun, a suokte cheng chun a makhelh u a; mahleh Kent-mi chengcheng te, Peleth-mi chengcheng te, Git-mi chengcheng te, mi zagup, Gath apat a David hun zui haw chun leng chu a bel zel u a.

¹⁹Khutichun leng chun Git-mi Itai kawm achun “Bangati a nang hi hung na hi? vaikit inla, leng kawmah um in; nang hi malzin gamdang mi na hi ngâl a, nangmah mun lam ah vaikit in.

²⁰Thangni cha a kha hung na hi a, tuni hin ka kawm u a hunga a suk a to a ei zui ding na hi a ahim? Khawi lama ka chieh ding u bawn kihe lo a, nang chu vaikit inla, na suohpih te chengcheng hi puikit in; LALPA lungsietna leh a ginumna chun hun umpih zing hen,” a ti a.

²¹Chun, Itai chun leng chu a dâwng a, “LALPA hinna leh leng, ka pu hinna sâlin ka gen hi, leng, ka pu hi na umna tâk achun, thih leh thih hi’n tin, dam le dam hi’n tin, na suok hi le um zel ina” a ti a.

²²Chun, David chun Itai kawm achun, “Chieh unla, chieh zel un le,” a ti a. Tichun Git-mi Itai chu a mite chengcheng leh a chalenauteu chu tawh a chieh u a.

²³Chun, David a nungzuite’n a nutsieh phet u chun mipite chu ngeih tak in a kap tau a, Leng chun Kidron lui chu a kân a, a mite chun a zui u a, a bawn u chun gamthip lam zuon chun a chieh tau a.

²⁴Chun, Zadok le Pathien thugawlhna bawm zawn in Levi-haw chu tawh a kawmah a chieh u a; Pathien bawm chu a ngau a, mipi chengin khuo a pawtsan thieng kei ma cheng u chun a kinga zing u a, thiempu Abiathar le tak achun a um a.

²⁵Chun, leng chun Zadok kawmah, “Pathien bawm chu khawpi sung ah leh zawn lut kit un: LALPA mit tunga ka um chun ei lehpuih kit intin, Pathien bawm leh a umna chu ei muhsak kit ina;

²⁶amahvang chuh, ‘Na chungah kipahna him ka nei puoi,’ a tih chun ngaitie hiti mai hi ka hi a, pha a sak bang bangin ka chung ahin hih mai hen,” a ti a.

²⁷Chun, leng chun thiempu Zadok kawm achun, “En in, na chapate nih, na chapa Ahimaz leh Abiathar chapa Jonathan tawh lungmuong takin khawpi ah vaikit un.

²⁸Ngaitie, kei chu chanchin nei hun hetsak kit macheng in gamthip a lui kaihmunhaw ahin a na um ing ka,” a ti a.

²⁹Khutichun Zadok leh Abiathar chun Pathien bawm chu Jerusalem ah a puo kit u a; zie tak achun a um tau a.

³⁰Khutichun David chu olive tâng chieh tohna achun a kalto a, a chieh toh kawm chun a kap zel a; a luchang a khuh a, keng ngawnin a chieh a: a kawma um cheng chengte chun le a luchang uh a khuh u a, kap kawm zelin a chieh u a.

³¹Chun, kuo ahim in David chu, “Ahithophel chu Absalom lama pang in mithahna ding guonggalh te lak ah a tel hi,” ti’n a hilh a. Chun, David chun, “Aw LALPA, Ahithophel lemguotna chu ngawlna suok sak dingin ka hun ngên hi,” a ti a.

³²Chun, hiti hi ahi a, David chu Pathien hona tângsipa a va kaldawk chun, ngaitie, Ark mi Hushai chu Puonâk tel neuno in, a luchang a leivui kai neu no in amah muok dingin a hung a.

³³Chun, David chun a kawmah, “Kei kawma na hung chun keia dingin puokgik hin na tin:

³⁴amahvang chuh khawpi lama chu na vaihkit a, Absalom kawma, ‘Aw, lengpa, na suok in pang ing ka, tuma lama na pa suok a ka um bang khan tuhin le na suok in um ing ka,’ na va tih le vang chuh Ahithophel lemguot ei dal sak hi zaw’n la.

³⁵Zie tak achun na kawma thiempu Zadok leh Abiathar le a um uh hilo ahim? chun, hiti hi hi’n tin, leng ina thu pawt na het takphawt chu thiempu Zadok leh Abiathar hilh sek in na tin.

³⁶Ngaitie, a chapateu nih Zadok chapa Ahimaz leh Abiathar chapa Jonathan le a kawm u ah a um u kha; na thil zak taphawtte chu ei hung hetsak dingin amau haw chu na dawp sak sek ding ahi,” a ti a.

³⁷Khutichun David guolpa Hushai chu khawpi a hung lut tak chuh Absalom chule Jerusalem a hung tung a.