Read Gangte 2 SAMUEL 16 Bible Online

2 SAMUEL 16 - Gangte bible

2 SAMUEL 16

¹Chun, David chun tângsip kaltohna neukhat a vak khel chun, ngaitie, Mephiboseth suokpa Ziba chun a na muok a, sabiltung nih, chângthâk tang zanih leh grep phogawt bawk zakhat leh theipi gah zakhat leh uain bûk khat a puok sak a.

²Chun, leng chun Ziba kawm achun, “Ziehaw hi bangti dân ahi ta le?” a ti a. Chun, Ziba chun, “Sabiltung hi leng inkuote chutna ding hi’n tin; chângthâk leh theipi haw hi tangvalte nek ding hi’n tin, chun uain hi chu gamthip a tâmsawl taphawtte dâwn ding hi’n a,” a ti a.

³Chun, leng chun, “Ahih leh na pu chapa chuh khawi ahi?” a ti a. Chun, Ziba chun leng kawmah, “Ngaitie, Jerusalem ah a um hi: ‘Tuni hin Israel te chun ka pu gam ei pie kit ding ahiu hi,’ a ti ngut kha uo,” a ti a.

⁴Chun, leng chun Ziba kawm achun, “Ngaitie, Mephiboseth thil neih chengcheng chu nanga ahi suok tai,” a ti a. Chun, Ziba chun, “Chibai ka hun bûk tak zet na hi; aw lengpa, hepu, na mit tun zel guo’ng ka,” a ti a.

⁵Chun, leng David Behurim a tun chun ngaitie, Saul inkawte laka mi Gera chapa amin Shimei a hung pawt. a, samsie kawm kawmin a hung pawt a.

⁶David chu suongin a sep a, leng David suok cheng chengte le a sep a: chun, mipi chengcheng leh sepaih hangsan haw cheng chu a changlam leh a veilam ah a um u a.

⁷Chun, Shimei chun a sapsiet lai in hiti hin a ti a, “Chiehmang kêi in, chiehmang kêi in, nang thisan suoh chîng leh panna beipa:

⁸tamtak na tuolthih sak ta a; Saul inkawte thisan chu LALPA’n na chungah a hun lehkit sak ta a; LALPA chun gam chu na chapa Absalom a na pie ta a; ngaitie thisan suoh chîng mi na hih ziekin nangmah a dinga vangsietna na kihihdawk ahi tai,” a ti a.

⁹Khutichun Zeruiah chapa Abishai chun leng kawmah, “Bangati a zie uicha hin ka pu chu hansie a buok maimai? a lu va la di’ng ka,” a ti a.

¹⁰Chun, leng chun, “Nang haw Zeruiah chapate haw, nanghaw’n nei hetsak dinguh bang aum hi? LALPA’n a kawma, ‘David samsie’n,’ ti ahih chun samsie mai heh, ‘Bangti a khutibanga chu hih na hi?’ kuo’n a ti dinga ahim?” a ti a.

¹¹David chun Abishai leh a suokte chengcheng kawm achun, “Ngaitiem u, ka chapa, ka gil a gah ngêi chun ei thah guo ahi a; zie Benjamin mi hin a guo nasa zaw sem na ding e, bangmah lawh kiu inla, samsie mai hen; LALPA’n samsie dinga a tih ahi ngâla.

¹²LALPA chun ka gimtheih zie hi hun muntin, tunia ei sapsiet na hi apha lam in ei dit sak kit mai thei le ahi,” a ti a.

¹³Khutichun David leh a mite chu lampi achun a chieh zel tau a: Shimei chu a gal uh tângpang achun a chieh zel a, a chieh kawm chun a samsie zel a, suonghaw poh in a sep a, leivui poh in a theh a.

¹⁴Chun, leng leh a kawm a mi um chengcheng chun châwl takin a tung u a; tichun zie tak achun a kichawldam u a.

¹⁵Chun, Absalom leh mipi chengcheng, Israel mite chu Jerusalem ah a chieh u a, a kawmah Ahithophel le a tel a.

¹⁶Chun, hiti hi ahi a, Hushai, David guolpa chu Absalom kawm a tun in, “Pathien in leng hukdam hen, Pathien in leng hukdam hen,” ti’n a kiko a.

¹⁷Chun, Absalom chun Hushai kawmah, “Hitibang hi ahi maw na guolpa na lungsiet dân chu? Bangati a na guolpa kawma chieh lo na him?” a ti a.

¹⁸Chun, Hushai chun Absalom kawmah, “Chieh puo’ng ka; LALPA leh zie mipite leh Israel nam cheng chengin a tel uh thu thu’n um ing ka ting, a kawmah um zawng ka.

¹⁹Chun, kuo na ahim ka sep ding? Ka pu chapa na ka sep ding hilo ahim? na pa na ka sep bang khan nang na le sem ing ka,” a ti a.

²⁰Khutichun Absalom in Ahithophel kawmah, “Bang I bawl ding u na ngaihdan gen tie” a ti a.

²¹Chun, Ahithophel in Absalom kawmah, “Na pa meite, In ngaka a nutsieh teu kawmah va lut inla va kuolpih in; tichun Israel mi chengcheng in na pa’n a hun mudah hi tih hun heu intin; tichun nang lama pang te chengcheng khut chu hung hât ding ahi,” a ti a.

²²Khutichun in chungah Absalom dingin puon-In a zak u a; tichun Israel mite chengcheng mitmuh in a pa meite kawm achun a lut a, a va kuolpih ta a.

²³Zie laia lemguot, Ahithophel lemguot chu, Pathien thu banga ngaih ahi sek a: khutibang mah chun Ahithophel lemguot chu David leh Absalom chun a zuih sek uh ahi.