Read Gangte 2 SAMUEL 17 Bible Online

2 SAMUEL 17 - Gangte bible

2 SAMUEL 17

¹Chun, zie nung sawtlo chun Absalom kawmah Ahithophel chun, “Mi singkhat leh sangnih teldawk ing ka ting, chun tuzan hin David delh in kipan ing ka:

²a zawnkhal lai leh a hatloh lai takin va pha bichilh ing ka ting, va hihlau ing ka: tichun a kawma mi um chengcheng chu taimang untin, tichun leng chu va that ing ka;

³chun, mipite chuh na kawmah hun puikit vek ing ka ting; na mi hawl chuh mi chengcheng hungkit tawh kibang ahi ngâl a, khutichun mi chengcheng chu kicham in um tan au,” a ti a.

⁴Tichun zie thu chun Absalom leh Israel upate chengcheng chu a sukipak ta a.

⁵Khutichun Absalom chun, “Ark mi Hushai chu sam phawt unla, amah gen dân le a na ngaitha himhim hitiu,” a ti a.

⁶Chun, Hushai chu Absalom kawm a hung tun chun Absalom chun, “Ahithophel chun hitibang hin a gen a, a gen bang hin ka hih ding ahi die? Ka hihloh ding chun nangin hun gen tie le,” ti’n a na hopih a.

⁷Chun, Hushai chun Absalom kawmah, “Tu chunga Ahithophel lemguot hi a phalo ahi,” a ti a.

⁸Chun, Hushai chun, “Na pa leh a mite chu na he a, sepaih hâng tak, gamlaka savawm a no kilaksak tawbang hiel ahiu a: na pa chu kido mi ahi a, mipi lak ah giek khel puo’n a.

⁹Ngaitie, tuhin le khawitak kawkhuk ahim ah khawitak mun ahim ah kiselgu zing hi’n a: chun, hiti hi hi’n tin, a kido tûng uh a mi kimkhat a puk u chun a he taphawt in, ‘Absalom zuite haw chu a that diek ui,’ ti’n au.

¹⁰Tichun mi hangsan, sakeibaknei lung bang pu hiel le hung chautha mai untin; Israel mi chengcheng chun la na pa chu sepaih hâng tak ahih leh a kawma umte chu kido thiem tak tak ahih u chu a he suok kêi ngâl u a.

¹¹Kei lemguot dân chu a hih leh Israel mite chengcheng chu Dan apat in Beer-sheba tieng hielin tuisuohgiet a pîlnel zah hiel in na kawmah kisamkhawm suok henla; chun, kido na achun nangmah ngêi le va chieh inla.

¹²Khutichun David chu I tuok khakna nau ah leia dâitui kie bang mai in bawh hiting un; chun, amah leh a kawma mi um chengcheng te chu khatchale suohchak sak puoi tiu.

¹³Zielo chun le, khuo a a lut chun Israel mi chengcheng, khauhuol chawiin zie khuo achun chieh hiting un, suong neucha nasan le umlo khawp in lui ah zûk tha suk vek hitiu,” a ti a.

¹⁴Tichun, Absalom leh Israel mi chengcheng te chun, “Hushai lemguot chu Ahithophel lemguot sang chun a phazawi,” a tiu a. LALPA chun Absalom chunga thil phalo a tunsak theihna dingin Ahithophel lemguot phatak chu zuih loh dingin a na ti ta him a.

¹⁵Chun, Hushai chun thiempu Zadok leh Abiathar kawmah, “Hiti bang hin Ahithophel chun Absalom leh Israel upate lem a guotsak a; chun, ken hitihin lem ka guot a.

¹⁶Zieziekchun, ‘Tuzan hin chu gamthip a lui kaihmun a chun giek ta lo in kân tei tei in; khutilochun leng leh a kawma um chengcheng te chu that suok kha’n au,’ ti’n David hilh meng un,” a ti a.

¹⁷Jonathan leh Ahimaz chun Jerusalem khuo kawm achun a ngak sek u a, En-rogel kiti mun achun suok numei khat hin thu a va hilh sek a, amau chun leng David a va hilh sawn kit sek u a, khawpi sunga a lut uh mi’n a muh khâk ding u chu a lau ngâl u a.

¹⁸Himahlele, naupang khatin a na mu a, Absalom a hilh a: tichun a nih un a taimang u a, Behurim a mi khat In huongsung a tuisutdawk nei khat kawmah a va chieh u a, tuisutdawk achun a tailut tau a.

¹⁹Chun, zie In neipa zi chun tuisutdawk chu a sitna’n a sin a, a chung achun buh a pho a, kuomah hettheih ahi ta puoh a.

²⁰Chun, Absalom suokte chu ina numei kawm achun a va chieh u a; “Ahimaz leh Jonathan te kha khawi ah a um u?” a tiu a. Chun, numei chun a kawm u ah, “Luigal kai ta’n au,” a na ti a. Chun, a va hawl u a, a mu puou a, Jerusalem ah a vaikit tau a.

²¹Chun, hiti hi ahi a, a chiehdawk nung u chun tuisutdawk apat chu a hung pawt u a, leng David chu a va hilh u a; David kawm achun, “Kipan unla, lui chu kân meng un; aziek chu hitibang hin Ahithopel chun na thihna ding a guonggalh hi,” a tiu a.

²²Khutichun David leh a kawma mi um chengcheng te chu a kipan u a, Jordan lui chuh a kân u a; khuo a hung vak chun khatchale Jordan lui kailo a um ta puou hi.

²³Chun, Ahithophel in a lemguot bang chu a zawp puou hi tih a het in a sabiltung chu a guonggalh a, a kipan a, a khuo lam ah a chieh a, a inkawte khawsak dân ding a hihtup sak diem a, a kikhailum ta a; tichun a thi a, a pa thân ah a vui tau hi.

²⁴Khutichun David chu Mahanaim a va tung a. Chun, Absalom chun a kawma Israel mi chengcheng te tawh Jordan lui a kân u a.

²⁵Chun, Absalom chun Amasa chu Joab thasang in sepaih lawiupa dingin a kawih a. Amasa chu Israel mi Ithra chapa ahi a, a nu chu Nahash chanu Abigail ahi a, Joab nu Jeruiah suohpih ahi.

²⁶Chun, Israel mite leh Absalom chun Gilead gam ah panmun a va guonggalh u a.

²⁷Chun, hiti hi ahi a, David chu Mahanaim a tun chun Amon suonte Rabbah khuo a Nahash chapa Shobi te, Lodebar khuo a Amiel chapa Makir te, Rogelim khuo a Gilead mi Barzillai te chun,

²⁸Mipite chu gamthip a chun a gilkiel un, a tâmsawl un, a dangchâk ta mah mah ui, a tih ziekun zâlkhun te, kuong te,

²⁹leibel te, buh te, buhmanpawl te, changbuong te, buhkan te, bepi te, havai te, bekan-gawt te, khuoizu te, bâwngnawi tuikan te, belam leh bâwngnawi khal te chu David leh a kawma mi umte nek ding chun a hun chawi u a.